શતરંગ / જ્યારે 2 વખતની વર્લ્ડ ચેમ્પિયનને હરાવી ભારતે ક્રિકેટ વિશ્વને ચોંકાવી દીધું

- પન્ના પલટીએ

ભારતમાં અનેક ધર્મોના લોકો વસે છે, હિન્દુ, મુસ્લિમ, સીખ, પારસી... પણ આ બધા લોકો પોતાના આ ધર્મની સાથે એક બીજો ધર્મ પણ પાળે છે... ક્રિકેટ. હા, ભારતમાં ક્રિકેટ માટે લોકોમાં જે હદનું ગાંડપણ છે, ઝનૂન છે તે કોઈ ધર્મથી સ્હેજ પણ ઉતરતું નથી. દરેક ધર્મમાં હોય તેમ આપણે આ ધર્મમાં પણ ભગવાન શોધી લીધા છે. જોકે, ભારતમાં કાયમથી ક્રિકેટને લઈને આટલો ક્રેઝ નહોતો. લોકો રસ લેતા હતા પણ તે સિમિત હતો પણ વાત બદલાઈ 1983થી... એકદમ ચોક્કસ રીતે કહીએ તો 25 જૂન 1983થી.