મરતાં બાળકો અને ભાજપના MLAનું '156 ઈંચ'નું હાસ્ય : બાળકો ભલે ભુંજાઈ મર્યાં, પણ ભેંસ તો સલામત છે ને?

તુષાર દવે

હાસ્યને માપવાના કોઈ ચોક્કસ પરિમાણ નથી હોતા, પણ રાજકોટના ગેમ ઝોનમાં ચાલતા હુતાશનમાં બાળકોની બલિ ચડી રહી હતી ત્યારે ફાયર સેફ્ટિનો સવાલ પૂછાતા - 'હવે આમાં તો હવે હું ય શું કહી શકું હવે...' કહીને 'હીહી હીહી હસ દેવે' કરી દેનારા ભાજપના ધારાસભ્ય રમેશ ટીલાળાના હાસ્યનું માપ કાઢશો તો એનું વજન ચોક્કસ જ '156 સીટ' નીકળશે! આછી-પાતળી બહુમતી ધરાવતી સરકારના ધારાસભ્યની હિંમત જ ન થાય કે એ જ્યાં લોકોના લાડકવાયા જીવતા ભૂંજાઈ રહ્યા હોય ત્યાં શરમને ય શરમાવે એવું 156 ઈંચનું સ્મિત રેલાવી શકે. રમેશ ટીલાળાનું એ હાસ્ય મોરબી કાંડ બાદ પણ 'જહાંપનાહ તોહફા કૂબુલ કરો'ના નારા સાથે 156 બેઠકો તાસક પર ધરી દેનારી જનતા માટે છે. એ જનતાની મશ્કરી છે. એ હાસ્ય જાણે પુછી રહ્યું છે કે - ક્યોં, આ ગયા સ્વાદ?