શતરંગ / ભારતની સંસદમાં વિજ્ઞાનનું પ્રતિનિધિત્વ

- વિજ્ઞાન વિહાર

એક વખત હું મારા એક અમેરિકન વૈજ્ઞાનિક મિત્ર સાથે ભારત અને અમેરિકામાં વૈજ્ઞાનિક અભિગમ બાબતે ચર્ચા કરી રહ્યો હતો. અમેરિકામાં ત્યાંની પબ્લિક કાર્લ સેગન, રિચર્ડ ફાઈનમેન, કે નવી પેઢીમાં બિલ નાય અને નીલ દ ગ્રાસ ટાયસન જેવા વૈજ્ઞાનિકો અને સાયન્સ કમ્યુનિકેટર્સને સેલિબ્રિટીની જેમ ટ્રીટ કરે છે જે મને ખુબ પ્રભાવિત કરે. એટલે એ વિશે મે મિત્રને વખાણ કરતા કહ્યું કે તમે અમેરિકન લોકો તમારા વૈજ્ઞાનિકોને રોક સ્ટારની જેમ ટ્રીટ કરો છો જે ખુબ પ્રશંશનીય છે. મારા એ હાજરજવાબી મિત્રએ તરત જ વળતો જવાબ આપ્યો કે અમે તો અમારા ગમતા વૈજ્ઞાનિકોને માત્ર રોક સ્ટાર તરીકે ટ્રીટ કરીએ છીએ. તમે ભારતીયોએ તો તમારા પ્રિય વૈજ્ઞાનિકનું સન્માન તમારા દેશના સર્વોચ્ચ પદ, એટલે કે રાષ્ટ્રપતિપદ ઉપર બેસાડીને કર્યું હતું. અમે અમેરિકનોએ હજુ તમારી પાસેથી ઘણું શીખવાનું છે.