IAEA કર્યો ચોંકાવનારો ખુલાસો, ઈરાન ટૂંક સમયમાં બનાવી લેશે પરમાણુ બોમ્બ 

યુનાઈટેડ નેશન્સની ઈન્ટરનેશનલ એટોમિક એનર્જી મોનિટરિંગ એજન્સી (IAEA) એ ઈરાન વિશે ચોંકાવનારો અહેવાલ આપ્યો છે. IAEA અનુસાર, ઈરાને પરમાણુ શસ્ત્રો બનાવવા માટે પૂરતું યુરેનિયમ એકઠું કર્યું છે. આ અહેવાલમાં, ઈરાનને અપીલ કરવામાં આવી છે કે તે તાત્કાલિક પોતાનો પરમાણુ ઈરાદો બદલે અને એજન્સીની તપાસમાં સંપૂર્ણ સહયોગ કરે. IAEAના આ અહેવાલે સમગ્ર વિશ્વમાં હલચલ મચાવી દીધી છે. 

GSTVની એપ્લિકેશન ડાઉનલોડ કરો

   

આખું વિશ્વ ઈરાનની આ ગતિવિધિથી અચંબામાં છે કે, શું વાસ્તવમાં ઈરાન પરમાણુ બોમ્બ બનાવવા જઈ રહ્યું છે. કારણકે, તાજેતરમાં તેણે બે મોટા સંકેતો આપ્યા છે, જે એ હકીકત તરફ ઈશારો કરી રહ્યા છે કે ઈરાન કંઈક મોટું કરવાની તૈયારી કરી રહ્યું છે.

ઈરાને આપ્યો પહેલો પુરાવો

IAEAના અહેવાલમાં જણાવાયું છે કે ઈરાને 60%ની શુદ્ધતાનું યુરેનિયમ એકઠું કર્યું છે. આ સ્તર શસ્ત્ર-સ્તર (90%) થી થોડું ઓછું છે, પરંતુ નિષ્ણાતો માને છે કે આનાથી પરમાણુ બોમ્બ બનાવવા તરફ આગળ વધવું ખૂબ જ સરળ બને છે. આ યુરેનિયમનો ઉપયોગ કેટલાક અન્ય સંસાધનોની સાથે પરમાણુ શસ્ત્રો બનાવવા માટે થઈ શકે છે.

બીજો પુરાવો: ઈરાને હવાઈ ક્ષેત્ર બંધ કરી દીધું

બીજો મોટો સંકેત એ છે કે ઈરાને તાજેતરમાં અચાનક તેના ઘણા વિસ્તારોના હવાઈ ક્ષેત્ર બંધ કરી દીધા છે. આવી સ્થિતિ સામાન્ય રીતે યુદ્ધ કવાયત, મિસાઈલ પરીક્ષણ અથવા મોટા લશ્કરી કાર્યવાહી પહેલા જોવા મળે છે. એવા અહેવાલો પણ છે કે ઈરાન મિસાઈલ પરીક્ષણની તૈયારી કરી રહ્યું છે, જે આ શંકાને વધુ મજબૂત બનાવે છે કે તે તેની પરમાણુ ક્ષમતા અંગે કોઈ મોટું પગલું ભરવા જઈ રહ્યું છે.

IAEA અને અમેરિકાએ આપી ચેતવણી

IAEA એ ઈરાનને તેના યુરેનિયમ કાર્યક્રમને તાત્કાલિક બંધ કરવાની માંગ કરી છે. રિપોર્ટ અનુસાર, ઈરાને ઘણી વખત IAEA મોનિટરિંગ ટીમોને રોકવાનો પ્રયાસ કર્યો છે, જે તેના ઈરાદાઓ વિશે વધુ શંકા ઉભી કરે છે. અમેરિકાએ ચેતવણી આપી છે કે જો ઈરાન તેના કાર્યક્રમમાં પારદર્શિતા નહીં બતાવે તો તેના પર વધુ કડક પ્રતિબંધો લાદવામાં આવશે.

ઈઝરાયલે સેનાને એલર્ટ રહેવા કહ્યું

ઈઝરાયલે ઈરાનના યુરેનિયમ સ્ટોકને તેના અસ્તિત્વ માટે ખતરો ગણાવ્યો છે. ઈઝરાયલે ખુલ્લેઆમ કહ્યું છે કે જો ઈરાન પરમાણુ બોમ્બ બનાવે છે, તો તેને રોકવા માટે લશ્કરી વિકલ્પોનો પણ ઉપયોગ કરી શકાય છે. આનાથી સ્પષ્ટ થાય છે કે મધ્ય પૂર્વમાં તણાવ ચરમસીમાએ પહોંચી ગયો છે. ઈઝરાયલે પોતાની સેનાને પણ ઈરાનની કવાયત પર એલર્ટ રહેવા આદેશ આપ્યો છે.

શું ઈરાન ખરેખર પરમાણુ બોમ્બ બનાવશે?

ઈરાન સતત કહેતું રહ્યું છે કે તેનો પરમાણુ કાર્યક્રમ શાંતિ અને ઉર્જા ઉત્પાદન માટે છે, પરંતુ તેની પ્રવૃત્તિઓમાં પારદર્શિતાનો અભાવ, દેખરેખમાં વારંવાર અવરોધ અને હવે હવાઈ ક્ષેત્ર બંધ કરવું જેવી ગતિવિધિઓ વિશ્વને શંકામાં મૂકી દીધું છે. જો ઈરાન ખરેખર પરમાણુ શસ્ત્રો બનાવે છે, તો તે ફક્ત એક દેશની વાત નહીં હોય, પરંતુ તે સમગ્ર વિશ્વ માટે ખતરો બની શકે છે.