Last Update :
18 May 2025
IPL 2025 પાછી ટ્રેક પર આવી ગઈ છે, પરંતુ 17 મેના રોજ રમાનારી રોયલ ચેલેન્જર્સ બેંગલુરુ (RCB) અને કોલકાતા નાઈટ રાઈડર્સ (KKR) વચ્ચેની મેચ વરસાદને કારણે ધોવાઈ ગઈ હતી. આ રીતે બંને ટીમોને એક-એક પોઈન્ટથી સંતોષ માનવો પડ્યો. સાંજે 6 વાગ્યાની આસપાસ શરૂ થયેલો વરસાદ અવિરત ચાલુ રહ્યો, જેના કારણે ટોસ પણ ન થઈ શક્યો અને આખરે મેચ રદ કરવી પડી. આ સાથે, RCB એ પ્લેઓફ તરફ વધુ એક મજબૂત પગલું ભર્યું, જ્યારે KKR પ્લેઓફની રેસમાંથી બહાર થઈ ગઈ.
GSTVની એપ્લિકેશન ડાઉનલોડ કરો
RCBના હવે 12 મેચોમાં 17 પોઈન્ટ છે અને બાકીની બે મેચોમાંથી એક જીત પ્લેઓફમાં સ્થાન મેળવવા માટે પૂરતી હશે. તે હાલમાં પોઈન્ટ્સ ટેબલમાં ટોપ પર છે, ગુજરાત ટાઈટન્સ (GT) 16 પોઈન્ટ સાથે બીજા નંબર પર છે. હવે વાત કરીએ આજે (18 મે) યોજાનારી બે મેચ વિશે, જે પ્લેઓફનું ચિત્ર ઘણી હદ સુધી સ્પષ્ટ કરી શકે છે.
હકીકતમાં, પ્લેઓફની રેસમાં સામેલ ટીમો માટે, દરેક મેચ હવે નોકઆઉટ મેચ જેવી છે. આજની બે ખૂબ જ મહત્ત્વપૂર્ણ મેચ પછી ઘણી ટીમોનું ભાવિ નક્કી થઈ શકે છે. ચાલો આજની મેચો અનુસાર ક્વોલિફિકેશનનું સંપૂર્ણ સમીકરણ જાણીએ.
આજે પહેલી મેચ રાજસ્થાન રોયલ્સ (RR) અને પંજાબ કિંગ્સ (PBKS) વચ્ચે રમાશે. જ્યારે, બીજી મેચમાં ગુજરાત ટાઈટન્સ (GT) નો મુકાબલો દિલ્હી કેપિટલ્સ (DC) સામે થશે. જો RRની ટીમ PBKSને હરાવે છે, તો RCB પ્લેઓફ માટે ક્વોલિફાય થઈ જશે. બીજી તરફ જો PBKS મોટા માર્જીનથી મેચ જીતશે તો પહેલા નંબર પર પહોંચી જશે.
3 ટીમોનું નસીબ ચમકી શકે છે
બીજી તરફ, જો GT સાંજની મેચમાં DC સામે જીતી જાય છે, તો RCB અને GT બંને પ્લેઓફ માટે ક્વોલિફાય થઈ જશે અને DCનો રસ્તો મુશ્કેલ બનશે. જો પંજાબ રાજસ્થાનને અને ગુજરાત દિલ્હીને હરાવે છે, તો ત્રણ ટીમો - PBKS, RCB અને GT પ્લેઓફમાં પ્રવેશ કરશે.
ફેન્સ બંને મેચની રાહ જોઈ રહ્યા છે
જો પંજાબ રાજસ્થાનને અને દિલ્હી ગુજરાતને હરાવે, તો કોઈપણ ટીમ હાલમાં સત્તાવાર રીતે ક્વોલિફાય નહીં થાય. આ જ કારણ છે કે ફેન્સની નજર આજે બંને મેચ પર ટકેલી છે. દરેક બોલ અને દરેક ઓવર પ્લેઓફનું ચિત્ર બદલી શકે છે. આજનો દિવસ ચારેય ટીમો RCB, GT, PBKS અને DC માટે ખૂબ જ મહત્ત્વપૂર્ણ છે. હવે જોવાનું એ છે કે કોનું નસીબ ચમકે છે અને કોણ પ્લેઓફની રેસમાંથી બહાર થાય છે.
