Last Update :
13 Apr 2025
IPL 2025માં સતત પ્રથમ પાંચ મેચમાંથી ચાર જીતનાર ગુજરાત ટાઈટન્સ (GT) ની ટીમને છઠ્ઠી મેચમાં 6 વિકેટથી કારમી હારનો સામનો કરવો પડ્યો છે. લખનૌ સુપર જાયન્ટ્સ (LSG) સામેની આ મેચમાં, ગુજરાત ટાઈટન્સે પ્રથમ બેટિંગ કરીને 20 ઓવરમાં 6 વિકેટ ગુમાવીને 180 રન બનાવ્યા હતા, જેને LSGની ટીમે 19.3 ઓવરમાં 4 વિકેટ ગુમાવીને ચેઝ કરી લીધા હતા. આ મેચમાં, LSG માટે એડન માર્કરામ અને નિકોલસ પૂરને બેટ સાથે મહત્ત્વપૂર્ણ ભૂમિકા ભજવી હતી. બંને બેટ્સમેન અડધી સદી ફટકારવામાં સફળ રહ્યા હતા.
GSTVની એપ્લિકેશન ડાઉનલોડ કરો
પુરણ અને માર્કરામની પાર્ટનરશિપની મદદથી LSG મેચ જીતી
આ મેચમાં જ્યારે LSGની ટીમ ટાર્ગેટ ચેઝ કરવા માટે ઉતરી ત્યારે રિષભ પંતે એડન માર્કરામ સાથે મળીને તેની ઈનિંગની શરૂઆત કરી અને તેમણે પ્રથમ 6 ઓવરમાં ટીમનો સ્કોર 61 રન સુધી પહોંચાડ્યો હતો. LSGની ટીમને 65 રનના સ્કોર પર કેપ્ટન રિષભ પંતના રૂપમાં પહેલો ઝટકો લાગ્યો, જેને 21 રનની ઈનિંગ રમ્યા બાદ પ્રસિદ્ધ કૃષ્ણાએ આઉટ કર્યો. આ પછી, બેટિંગ કરવા આવેલા નિકોલસ પૂરને માર્કરામને સારો સાથ આપ્યો અને બીજી વિકેટ માટે બંને વચ્ચે 29 બોલમાં 58 રનની પાર્ટનરશિપ થઈ, જેનાથી આ મેચમાં LSGની જીત સંપૂર્ણપણે સુનિશ્ચિત થઈ હતી.
આ મેચમાં એડન માર્કરામે 31 બોલમાં 58 રન બનાવ્યા હતા, જ્યારે નિકોલસ પૂરને 34 બોલમાં 1 ચોગ્ગા અને 7 છગ્ગાની મદદથી 61 રન બનાવ્યા. આ જીત સાથે, LSGની ટીમ હવે ટોપ-4 માં પોતાનું સ્થાન બનાવવામાં સફળ રહી છે, જેમાં તેના 6 મેચમાં ચાર જીત સાથે 8 પોઈન્ટ છે. LSGની આ સતત ત્રીજી જીત હતી. ગુજરાત પહેલા ટીમે મુંબઈ (MI) અને કોલકાતા (KKR) ને હરાવ્યું હતું.
ગુજરાતની ટીમ ગિલ અને સુદર્શનની ઈનિંગનો ફાયદો ન ઉઠાવી શકી
જો આ મેચમાં ગુજરાત ટાઈટન્સ (GT) ની બેટિંગ વિશે વાત કરીએ તો શુભમન ગિલ અને સાઈ સુદર્શને શાનદાર અડધી સદીની ઈનિંગ્સ રમી હતી, બંને વચ્ચે પ્રથમ વિકેટ માટે 120 રનની પાર્ટનરશિપ પણ થઈ હતી. આ બાદ એક પછી એક વિકેટ પડવા લાગી, અને ટીમ ફક્ત 180 રનના સ્કોર સુધી પહોંચી શકી. LSG માટે બોલિંગ કરતા શાર્દુલ ઠાકુર અને રવિ બિશ્નોઈએ 2-2 વિકેટ લીધી, જ્યારે દિગ્વેશ રાઠી અને આવેશ ખાને પણ 1-1 વિકેટ લીધી હતી.
