Last Update :
03 Jul 2025
વિશ્વના ધનિકોની યાદીમાં મોટો ઉલટફેર જોવા મળ્યો છે. ઓરેકલના સહ-સ્થાપક લેરી એલિસન(Larry Ellison) હવે આ યાદીમાં ત્રીજા સ્થાને પહોંચી ગયા છે જ્યારે એમેઝોનના જેફ બેઝોસ ચોથા સ્થાને સરકી ગયા છે. બ્લૂમબર્ગ બિલિયોનેર ઇન્ડેક્સ અનુસાર, બુધવારે એલિસનની કુલ સંપત્તિમાં $10.3 બિલિયનનો વધારો થયો. આ સાથે, તેમની કુલ સંપત્તિ $246 બિલિયન પર પહોંચી ગઈ અને તેઓ ધનિકોની યાદીમાં ત્રીજા સ્થાને આવ્યા. આ વર્ષે તેમની કુલ સંપત્તિમાં $54.2 બિલિયનનો વધારો થયો છે. બીજી તરફ, બેઝોસની કુલ સંપત્તિમાં $672 મિલિયનનો ઘટાડો થયો છે અને તેઓ $241 બિલિયન સાથે ચોથા સ્થાને આવી ગયા છે.
GSTVની એપ્લિકેશન ડાઉનલોડ કરો
આ દરમિયાન, વિશ્વના સૌથી ધનિક વ્યક્તિ એલોન મસ્કની કુલ સંપત્તિમાં $10.7 બિલિયનનો વધારો થયો છે. તેમની EV કંપની ટેસ્લાના શેરમાં 4.97%નો વધારો થયો છે. મંગળવારે અગાઉ, તેમની કુલ સંપત્તિમાં $12 બિલિયનથી વધુનો ઘટાડો થયો હતો. મસ્કની કુલ સંપત્તિ $361 બિલિયન છે. આ વર્ષે તેમની કુલ સંપત્તિમાં સૌથી વધુ 71.2 બિલિયનનો ઘટાડો થયો છે. વિશ્વની સૌથી મોટી સોશિયલ મીડિયા કંપની મેટા પ્લેટફોર્મ્સના સીઈઓ માર્ક ઝુકરબર્ગ(Mark Zuckerberg) $252 બિલિયનની કુલ સંપત્તિ સાથે બીજા નંબરે છે. ઝુકરબર્ગ અને એલિસનની કુલ સંપત્તિ વચ્ચે હવે ફક્ત $6 બિલિયનનું અંતર છે.
ટોચના 10 માં કોણ છે?
વિશ્વના ટોચના ધનિકોની યાદીમાં, માઈક્રોસોફ્ટના સહ-સ્થાપક બિલ ગેટ્સ 175 અબજ ડોલર સાથે પાંચમા ક્રમે છે. સ્ટીવ બાલ્મર (170 અબજ ડોલર) છઠ્ઠા ક્રમે, ફ્રાન્સના બર્નાર્ડ આર્નોલ્ટ (162 અબજ ડોલર) સાતમા ક્રમે, લેરી પેજ (162 અબજ ડોલર), સેર્ગેઈ બ્રિન (152 અબજ ડોલર) અને વોરેન બફેટ (144 અબજ ડોલર) દસમા ક્રમે છે. ભારત અને એશિયાના સૌથી ધનિક વ્યક્તિ મુકેશ અંબાણી (111 અબજ ડોલર) આ યાદીમાં 16 મા ક્રમે છે અને ગૌતમ અદાણી (85.2 અબજ ડોલર) 20 મા ક્રમે છે.
