2028માં લોસ એન્જલસમાં મળવાના વચન સાથે પેરિસ ઓલિમ્પિક્સનું રંગારંગ સમારોહ સાથે સમાપન

ફ્રાન્સની રાજધાનીમાં આયોજિત 33મી સમર ઓલિમ્પિક ગેમ્સનું રવિવારે રંગારંગ સમારોહ સાથે સમાપન થયું. 16 દિવસ સુધી ચાલેલા ખેલ મહાકુંભમાં 206 દેશોએ 32 રમતોમાં 329 ગોલ્ડ મેડલ માટે પડકારોનો સામનો કર્યો હતો. અંતે, અમેરિકા 40 ગોલ્ડ, 44 સિલ્વર અને 42 બ્રોન્ઝ મેડલ સાથે પ્રથમ ક્રમે રહ્યું હતું. અમેરિકાએ પેરિસ ઓલિમ્પિકમાં 126 મેડલ સાથે પોતાનો દબદબો જાળવી રાખ્યો હતો. જ્યારે ચીને 40 ગોલ્ડ મેડલ જીત્યા હોવા છતાં બીજા સ્થાને સંતોષ માનવો પડ્યો હતો. ચીને 40 ગોલ્ડ, 27 સિલ્વર અને 24 બ્રોન્ઝ મેડલ સહિત કુલ 91 મેડલ જીત્યા હતા. જ્યારે જાપાન 20 ગોલ્ડ, 12 સિલ્વર અને 13 બ્રોન્ઝ મેડલ સાથે મેડલ ટેબલમાં ત્રીજા ક્રમે છે.

મનુ ભાકર અને શ્રીજેશે પકડ્યો ત્રિરંગો

પેરિસ ઓલિમ્પિકમાં વિશ્વભરમાંથી 10,500 એથ્લેટ્સ પડકાર આપવા માટે બહાર આવ્યા હતા, જેમાં ભારતના 117 ખેલાડીઓએ ભાગ લીધો હતો અને 1 સિલ્વર અને 5 બ્રોન્ઝ મેડલ જીતીને મેડલ ટેબલમાં 71મા સ્થાને રહ્યા હતા. સમાપન સમારોહમાં મનુ ભાકર અને હોકી ગોલકીપર પીઆર શ્રીજેશ દ્વારા ભારતીય ત્રિરંગો લહેરાવવામાં આવ્યો હતો. મનુ ભાકરે પેરિસ ઓલિમ્પિકમાં બે બ્રોન્ઝ મેડલ જીત્યા હતા અને એક ઓલિમ્પિકમાં બે મેડલ જીતનાર પ્રથમ ભારતીય બની હતી. જ્યારે શ્રીજેશે સતત બીજી વખત ઓલિમ્પિકમાં બ્રોન્ઝ મેડલ જીતીને રમતને અલવિદા કહી દીધું. સમાપન સમારોહમાં નીરજ ચોપરાને ફ્લેગ બિયરર તરીકે પસંદ કરવામાં આવ્યો હતો પરંતુ તેમણે શ્રીજેશનું નામ આગળ કર્યું હતું.