વિનેશ ફોગાટને સિલ્વર મેડલ નહીં મળે, તારીખ પે તારીખ બાદ કોર્ટે અપીલ ફગાવી

પેરિસ ઓલિમ્પિકમાં ભારતની સ્ટાર રેસલર વિનેશ ફોગાટને ફાઈનલ મેચ પહેલા 100 ગ્રામ વજન વધુ હોવાના કારણે ડિસક્વોલિફાય થઈ હતી. રેસલર વિનેશ ફોગાટને સિલ્વર મેડલ મળશે કે નહીં તે મામલે કોર્ટ ઓફ આર્બિટ્રેશન ફોર સ્પોર્ટ્સ (CAS) તારીખ પર તારીખ આપી રહી હતી. ત્યારે આ સ્થિતિ વચ્ચે હવે તેની અપીલ ફગાવી દેવામાં આવી છે. જેના પગલે વિનેશ ફોગાટને સિલ્વર મેડલ મળશે નહીં તે સ્પષ્ટ થઈ ગયું છે.

સીએએસે વિનેશ ફોગાટની અરજી ફગાવતાં ઇન્ડિયન ઓલિમ્પિક એસોસિએશન (IOA)ના અધ્યક્ષ પીટી ઉષાએ આ મામલે નિરાશા વ્યક્ત કરતાં જણાવ્યું કે, કોર્ટનો આ ચુકાદો સાંભળી તેમને ઘણું આશ્ચર્ય થયું છે. અગાઉ પીટી ઉષાએ વિનેશ ફોગાટને ગેરલાયક ઠેરવવા બદલ આંતરરાષ્ટ્રીય સ્તરે વિરોધ પણ નોંધાવ્યો હતો. 

અગાઉ વિનેશ ફોગાટને સિલ્વર મેડલ મળશે કે નહીં તે મામલે 9 ઓગસ્ટે 3 કલાક સુનાવણી હાથ ધરાઈ હતી. જોકે, 10 ઓગસ્ટે નિર્ણયને મોકૂફ રાખ્યો હતો. ત્યારે 13 ઓગસ્ટે કોર્ટ ઓફ આર્બિટ્રેશન ફોર સ્પોર્ટ્સ (CAS) ફરી એકવાર નિર્ણય મોકફૂ રાખ્યો હતો. નિર્ણય 16 ઓગસ્ટે આવશે તેમ જણાવ્યું હતું. જોકે, હવે તેના બીજા દિવસે તેની અપીલ ફગાવી દેવામાં આવી છે.

ભારતીય ઓલિમ્પિક સંઘ (IOA) અને વિનેશ ફોગાટ તરફથી વરિષ્ઠ વકીલ હરીશ સાલ્વેએ કોર્ટમાં દલીલો રજૂ કરી હતી. તેમણે વિનેશને ન્યાય અપાવવા માટે દરેક પ્રકારની કાનૂની દલીલો કરી અને તર્ક રજૂ કર્યા હતા. આ મામલે 9 ઑગસ્ટે આશરે 3 કલાક સુધી સુનાવણી પણ થઈ હતી. એનાબેલે બેનેટે આ મામલે સુનાવણી હાથ ધરી હતી. 

આ ચાર દલીલો વિનેશે સુનાવણી દરમિયાન કરી હતી

વિનેશે દલીલ કરી હતી કે તેણીએ કોઈ છેતરપિંડી કરી નથી.
તેનું વજન શરીરની કુદરતી પુનઃપ્રાપ્તિ પ્રક્રિયાને કારણે હતું.
વિનેશે દલીલ કરી હતી કે પોતાના શરીરની કાળજી લેવી એ એથ્લીટનો મૂળભૂત અધિકાર છે.
વિનેશ વતી એવી પણ દલીલ કરવામાં આવી હતી કે સ્પર્ધાના પહેલા દિવસે તેના શરીરનું વજન નિર્ધારિત મર્યાદા કરતા ઓછું હતું. માત્ર રિકવરીથી વજન વધ્યું છે અને છેતરપિંડીનો કેસ નથી. તેમના શરીરને સ્વસ્થ રહેવા માટે જરૂરી પોષક તત્વો પૂરા પાડવા એ તેમનો મૂળભૂત અધિકાર છે.

વિનેશે સીએએસમાં અપીલ કરી હતી 

ગેરલાયક ઠર્યા બાદ વિનેશે 'કોર્ટ ઓફ આર્બિટ્રેશન ફોર સ્પોર્ટ્સ' (CAS)માં અરજી કરી હતી. વિનેશનું વજન નિયમ કરતા 100 ગ્રામ વધુ હોવાનું સામે આવ્યું હતું. વિનેશે વજન ઘટાડવા માટે શક્ય તમામ પ્રયાસ કર્યા હતા. તેણે પોતાના વાળ કાપ્યા હતા, કપડા પણ નાના કર્યા હતા. પરંતુ તેમ છતાં સફળતા મળી ન હતી. 

શું છે સીએએસ?

વર્ષ 1896માં પહલી વખત ઓલિમ્પિક્સનું આયોજન ગ્રીસમાં કરવામાં આવ્યું હતું. પરંતુ આ પછી કેટલાક વિવાદો ઉભા થવા લાગ્યા. કેટલાક ખેલાડીઓએ નિયમોને લઈને નારાજગી વ્યક્ત કરી હતી. ત્યારે આ બધા વિવાદોને ધ્યાનમાં રાખીને તેમને ઉકેલવા માટે વર્ષ 1984માં 'કોર્ટ ઓફ આર્બિટ્રેશન ફોર સ્પોર્ટ્સ'ની રચના કરવામાં આવી હતી. તેનું મુખ્ય કાર્યાલય સ્વિત્ઝર્લેન્ડમાં સ્થિત છે. આ એક સ્વતંત્ર સંસ્થા છે, જે રમતગમતને લગતા વિવાદોનું નિરાકરણ લાવે છે.

પેરિસ ઓલિમ્પિકમાં ભારતે એક સિલ્વર સાથે કુલ 6 મેડલ જીત્યા

ભારતનું મિશન પેરિસ ઓલિમ્પિક આખરે એક સિલ્વર અને પાંચ બ્રોન્ઝ એમ કુલ મળીને છ મેડલ સાથે સંપન્ન થયું છે. ગત ઓલિમ્પિકનો ગોલ્ડન બોય નીરજ ચોપરા ભાલા ફેંકની સ્પર્ધામાં વર્લ્ડ ચેમ્પિયન તરીકે ઉતર્યો હતો અને તેને સિલ્વર મેડલ જીત્યો હતો. જે પેરિસ ઓલિમ્પિકમાં ભારતનો સર્વોચ્ચ મેડલ બની રહ્યો હતો. નીરજ ઓલિમ્પિકના વ્યક્તિગત સ્પર્ધામાં ગોલ્ડ અને સિલ્વર જીતનારો ઇતિહાસનો પ્રથમ ખેલાડી બન્યો છે. મનુ ભાકરે 10 મીટર એર પિસ્તોલ ઇવેન્ટમાં બે બ્રોન્ઝ મેડલ અપાવ્યા હતા. 

https://twitter.com/ani_digital/status/1823758016849609149