બિહારમાં ચૂંટણી પહેલા નીતિશ કુમારનો માસ્ટર સ્ટ્રોક, પેન્શનમાં કર્યો 3 ગણો વધારો

બિહારની ચૂંટણી પહેલા મુખ્યમંત્રી નીતિશ કુમારે મહિલા સંવાદ સમયે મોટી જાહેરાત કરી છે. રાજ્યમાં તમામ પ્રકારના સામાજિક સુરક્ષા પેન્શનમાં ભારે વધારો કરવામાં આવ્યો છે. વૃદ્ધો સહિત તમામ શ્રેણીના લાભાર્થીઓને 400 ને બદલે હવે દર મહિને 1100 રૂપિયા મળશે. તે દર મહિનાની 10 તારીખે ચૂકવવામાં આવશે. મુખ્યમંત્રીએ સોશિયલ મીડિયા પર પોસ્ટ કરીને આ માહિતી આપી છે. બિહારમાં જુલાઈ મહિનાથી નવા દરે પેન્શન ચુકવણી શરૂ થશે. જીવિકા દીદીઓને પણ હવે જૂથ લોન તરીકે ત્રણના બદલે પાંચ લાખ સુધીની રકમ આપવામાં આવશે. બિહારમાં સરકાર બને તો વિપક્ષના નેતા તેજસ્વી યાદવે તેને વધારીને 1500 અને પ્રશાંત કિશોરને 2000 કરવાની જાહેરાત કરી હતી.

GSTVની એપ્લિકેશન ડાઉનલોડ કરો

   

1 કરોડ 9 લાખ 69 હજાર 255 લાભાર્થીઓને લાભ મળશે

નીતિશ કુમારે ફેસબુક પર પોસ્ટ કરીને જણાવ્યું છે કે, સામાજિક સુરક્ષા પેન્શન યોજના હેઠળ, વિધવા મહિલાઓ, વૃદ્ધો અને અપંગ લોકોને હવે દર મહિને 400 રૂપિયાને બદલે 1100 રૂપિયાનું પેન્શન મળશે. જુલાઈ મહિનાથી જ તમામ લાભાર્થીઓને વધેલા દરે પેન્શન મળશે. આ રકમ મહિનાની 10 તારીખે બધા લાભાર્થીઓના ખાતામાં મોકલવામાં આવશે. મુખ્યમંત્રીએ કહ્યું છે કે વૃદ્ધો સમાજનો એક અમૂલ્ય ભાગ છે અને તેમનું સન્માનજનક જીવન સુનિશ્ચિત કરવું અમારી ટોચની પ્રાથમિકતા છે. આ વધારાનો 1 કરોડ 9 લાખ 69 હજાર 255 લાભાર્થીઓને લાભ મળશે.

મુખ્યમંત્રીની આ જાહેરાત પર રાજકારણ પણ શરૂ થઈ ગયું

મુખ્યમંત્રીની આ જાહેરાત પર રાજકારણ પણ શરૂ થઈ ગયું છે. આરજેડી પ્રવક્તા અજય યાદવે કહ્યું છે કે તેજસ્વી યાદવને આ માટે અભિનંદન આપવા જોઈએ કારણ કે તેમણે તેને 1500 સુધી વધારવાની જાહેરાત કરી હતી. નીતિશ કુમારે તેજસ્વી યાદવના ડરથી આ જાહેરાત કરી છે. જોકે, સમાજ કલ્યાણ મંત્રી મદન સાહનીએ કહ્યું કે આનો ચૂંટણી સાથે કોઈ સંબંધ નથી. તેમણે નીતિશ કુમારનો આ માટે આભાર માન્યો છે. ડેપ્યુટી સીએમ સમ્રાટ ચૌધરીએ તેને ઐતિહાસિક નિર્ણય ગણાવ્યો છે.

બિહારમાં આ વર્ષે ચૂંટણીઓ યોજાવાની છે. બધી પાર્ટીઓની નજર મહિલાઓ અને વૃદ્ધો પર છે. મહાગઠબંધનના નેતા તેજસ્વી યાદવે પહેલાથી જ કહ્યું હતું કે જો તેમની સરકાર બનશે તો પેન્શનની રકમ 400 થી વધારીને 1500 કરવામાં આવશે. પ્રશાંત કિશોરે તેને બે હજાર કરવાની વાત કરી હતી. એવી દલીલ કરવામાં આવી રહી હતી કે મોંઘવારીના આ યુગમાં 400 રૂપિયાથી કંઈ ના વળે. આ દરમિયાન મહિલા સંવાદ કાર્યક્રમ વખતે નીતિશ કુમારે માસ્ટરસ્ટ્રોક માર્યો છે. જણાવી દઈએ કે, બિહારની અડધી વસ્તી પણ નીતિશ કુમારની મજબૂત વોટ બેંક માનવામાં આવે છે.