શેરબજાર સતત ત્રીજા દિવસે ઘટાડા સાથે બંધ થયું ; જાણો, સેન્સેક્સ અને નિફ્ટી કેટલા પોઈન્ટ ઘટ્યા?

એશિયન બજારોમાં સુધારો હોવા છતાં, ભારતીય શેરબજારો મંગળવારે સતત ત્રીજા ટ્રેડિંગ સત્રમાં ઘટાડા સાથે બંધ થયા. યુએસ પ્રમુખ ડોનાલ્ડ ટ્રમ્પ દ્વારા લાદવામાં આવેલા ટેરિફને કારણે રોકાણકારો ઊંચા મૂલ્યાંકન, સેન્સેક્સ ઇન્ડેક્સની સાપ્તાહિક સમાપ્તિ અને વૈશ્વિક અનિશ્ચિતતા વચ્ચે ફસાયેલા હોવાથી બજારોમાં ભારે અસ્થિરતા જોવા મળી છે. 

GSTVની એપ્લિકેશન ડાઉનલોડ કરો

   

આજે ૩૦ શેરોવાળો બીએસઈ સેન્સેક્સ ૮૧,૪૯૨.૫૦ પોઈન્ટ પર મજબૂતીથી ખુલ્યો હતો. જોકે, ખુલતાની સાથે જ તે લાલ રંગમાં સરકી ગયો. ટ્રેડિંગ દરમિયાન, તે ઘટીને ૮૦,૫૭૫.૦૯ પોઈન્ટ પર આવી ગયો. બીએસઈ સેન્સેક્સ ઈન્ડેક્સ આજે ૧,૨૦૦ પોઈન્ટની રેન્જમાં ટ્રેડ થયો હતો. અંતે, તે ૬૩૬.૨૪ પોઈન્ટ અથવા ૦.૭૮% ઘટીને ૮૦,૭૩૭.૫૧ પર બંધ થયો.

એ જ રીતે, મંગળવારે નેશનલ સ્ટોક એક્સચેન્જનો નિફ્ટી-50 પણ 24,786.30 ના વધારા સાથે ખુલ્યો. ટ્રેડિંગ દરમિયાન, તે 24,845.10 પોઈન્ટની ઊંચી સપાટી અને 24,502 પોઈન્ટની ઈન્ટ્રા-ડે નીચી સપાટીએ પહોંચ્યો. અંતે, તે 174.10 પોઈન્ટ અથવા 0.70% ઘટીને 24,542 પર બંધ થયો.

બીએસઈ મિડકેપ ઈન્ડેક્સ 0.52 ટકા ઘટ્યો હતો, જ્યારે સ્મોલકેપ ઈન્ડેક્સ 0.07 ટકા ઘટ્યો હતો. મંગળવારે બીએસઇ પર લિસ્ટેડ બધી કંપનીઓનું કુલ માર્કેટ કેપ રૂ. ૪૪૩ લાખ કરોડ હતું, જ્યારે અગાઉના સત્રમાં તે રૂ. ૪૪૫.૫૦ લાખ કરોડ હતું. આ કારણે, રોકાણકારોને એક જ સત્રમાં રૂ. ૨.૫૦ લાખ કરોડનું નુકસાન સહન કરવું પડ્યું.

ટોપ ગેનર્સ અને લૂઝર્સ

નિફ્ટીના ટોપ ગેનર્સની વાત કરીએ તો આમાં, સૌથી વધુ વધનાર શેર ગ્રાસિમ ઇન્ડસ્ટ્રીઝ હતો, જેમાં ૧.૧૩ ટકાનો ઉછાળો જોવા મળ્યો હતો. ત્યારબાદ શ્રીરામ ફાઇનાન્સનો શેર ૦.૮૯ ટકા, મહિન્દ્રા એન્ડ મહિન્દ્રાનો શેર ૦.૬૯ ટકા, બજાજ ઓટોનો શેર ૦.૫૯ ટકા અને સિપ્લાનો શેર ૦.૨૧ ટકા વધ્યો હતો.

નિફ્ટીના ટોપ લૂઝર્સની વાત કરીએ તો આમાં અદાણી પોર્ટ્સના શેરમાં સૌથી વધુ ૨.૪૪ ટકાનો ઘટાડો થયો હતો. આ પછી, અદાણી એન્ટરપ્રાઇઝના શેરમાં ૧.૯૧ ટકા, બજાજ ફિનસર્વના શેરમાં ૧.૮૩ ટકા, કોલ ઇન્ડિયા લિમિટેડના શેરમાં ૧.૭૨ ટકા અને પાવર ગ્રીડના શેરમાં ૧.૬૪ ટકાનો ઘટાડો થયો હતો.

શેરબજારમાં ઘટાડાનું કારણ શું હતું?

૧. મજબૂત યુએસ ટ્રેઝરી યીલ્ડ અને વૈશ્વિક વેપાર અંગે અનિશ્ચિતતા વચ્ચે વિદેશી રોકાણકારો દ્વારા વેચાણને કારણે મંગળવારે નાણાકીય અને આઇટી શેરોમાં ઘટાડો થયો. આનાથી ભારતીય શેરબજાર નીચે ખેંચાયું.

2. તે જ સમયે, ઈરાની એલપીજી આયાત અંગે યુએસ તપાસ અંગે વોલ સ્ટ્રીટ જર્નલના અહેવાલ બાદ અદાણી ગ્રુપના શેરમાં થયેલા ઘટાડાએ પણ બજારની ભાવનાઓને અસર કરી.

રિયલ્ટી ઇન્ડેક્સ એક ટકાથી પણ વધુ વધ્યો

સેક્ટરલ ઇન્ડેક્સની વાત કરવામાં આવે તો નિફ્ટી પ્રાઇવેટ બેન્ક ઇન્ડેક્સમાં એક ટકાથી પણ વધારે ઘટાડો નોંધાયો. આ પછી નિફ્ટી પીએસયુ બેંક ઇન્ડેક્સમાં 0.59 ટકા, નિફ્ટી આઇટી ઇન્ડેક્સમાં 0.67 ટકા અને નિફ્ટી એફએમસીજી ઇન્ડેક્સમાં 0.49 ટકાનો ઘટાડો થયો હતો. બીજી તરફ, નિફ્ટી રિયલ્ટી ઇન્ડેક્સમાં 1 ટકાથી વધુનો વધારો થયો હતો.

અદાણી ગ્રુપના શેરમાં ઘટાડો થયો હતો

અદાણી એન્ટરપ્રાઇઝના શેરમાં 2 ટકાથી વધુનો જ્યારે અદાણી પોર્ટ્સમાં પણ 2 ટકાથી વધુનો ઘટાડો થયો. વોલ સ્ટ્રીટ જર્નલમાં પ્રકાશિત થયેલા એક અહેવાલ પછી ગ્રુપના શેરમાં આ ઘટાડો થયો છે. તેમાં કહેવામાં આવ્યું છે કે ગૌતમ અદાણીના નેતૃત્વ હેઠળના ગ્રુપની યુએસ પ્રોસિક્યુટર્સ દ્વારા તપાસ કરવામાં આવી રહી છે.

અહેવાલ મુજબ, અધિકારીઓ તપાસ કરી રહ્યા છે કે શું અદાણીની કંપનીઓએ ઈરાની લિક્વિફાઇડ પેટ્રોલિયમ ગેસ (એલપીજી) ભારતમાં લાવવા માટે મુન્દ્રા પોર્ટનો ઉપયોગ કર્યો હતો. આ પોર્ટ પણ અદાણી ગ્રુપની કંપની દ્વારા સંચાલિત છે.