8th Pay Commissionમાં મૂળ પગાર કેટલો હશે? અહીં સંપૂર્ણ વિગતો જાણો

દેશના એક કરોડથી વધુ કેન્દ્ર સરકારના કર્મચારીઓ અને પેન્શનરો માટે ટૂંક સમયમાં સારા સમાચાર આવી શકે છે. કર્મચારીઓના મૂળ પગારમાં વધારો થવાની સંભાવના છે. સરકાર આઠમા પગાર પંચની રચના કરવાની તૈયારી કરી રહી છે. એવું કહેવામાં આવી રહ્યું છે કે 8મું પગાર પંચ જાન્યુઆરી 2026થી લાગુ થવાનું છે. આવી સ્થિતિમાં સવાલ એ ઊભો થાય છે કે જો 8મું પગાર પંચ રચાય છે અને પગાર અને પેન્શન વધારવાની ભલામણ કરે છે તો કેન્દ્રીય કર્મચારીઓના પગારમાં કેટલો વધારો થશે.

GSTVની એપ્લિકેશન ડાઉનલોડ કરો

   

સાતમું પગાર પંચ જાન્યુઆરી 2016માં લાગુ કરવામાં આવ્યું હતું. 7મું કમિશન 2026માં સમાપ્ત થશે. આ કમિશન બાદ ઉચ્ચ પગાર પંચ લાગુ કરવાની માંગ વધી છે. એવું માનવામાં આવે છે કે સરકાર 1 ફેબ્રુઆરી, 2025 ના રોજ રજૂ થનારા સામાન્ય બજેટમાં આઠમા પગાર પંચની જાહેરાત કરી શકે છે.

8મા પગાર પંચમાં મૂળ પગાર કેટલો હશે?

મીડિયા રિપોર્ટ્સ અનુસાર, કેન્દ્રીય કર્મચારીઓના મૂળ પગારમાં ઓછામાં ઓછા 34500 રૂપિયાનો વધારો થઈ શકે છે. તેમાં 186 ટકાનો વધારો થવાની શક્યતા છે. સરકારને નવા પગારપંચ હેઠળ 2.86 ગણા પગાર વધારાની ભલામણ કરવા કહેવામાં આવ્યું છે. આ 2.86 ના ફિટમેન્ટ ફેક્ટર પર આધારિત હશે. સરકારી કર્મચારીઓનો પગાર અને નિવૃત્ત કર્મચારીઓનું પેન્શન ફિટમેન્ટ ફેક્ટર દ્વારા જ કરવામાં આવે છે. કર્મચારીઓનું માનવું છે કે મોંઘવારીને કારણે જીવનનિર્વાહના વધતા ખર્ચને ઘટાડવા માટે પગારમાં વધારો ખૂબ જ મહત્ત્વપૂર્ણ છે. 7મા પગાર પંચ હેઠળ, 2.57 ના ફિટમેન્ટ ફેક્ટરનો ઉપયોગ કરવામાં આવ્યો હતો. જેના કારણે લઘુત્તમ પગાર 7000 રૂપિયાથી વધીને 18000 રૂપિયા થયો છે. હાલમાં કેન્દ્રીય કર્મચારીઓને 2.57ના ફિટમેન્ટ ફેક્ટર પ્રમાણે પગાર મળે છે.

પેન્શનમાં પણ બમ્પર વધારો

8મા પગારપંચના અમલ સાથે, પગારની જેમ પેન્શનમાં નોંધપાત્ર વધારો થશે. હાલમાં ન્યૂનતમ પેન્શન રૂ. 9000 છે, જે 2.86ના ફિટમેન્ટ ફેક્ટર પ્રમાણે વધીને રૂ. 25,740 થશે. આ ગણતરી માત્ર લઘુત્તમ મૂળભૂત પગાર અને પેન્શન માટે છે. મૂળભૂત પગારની સાથે કર્મચારીઓને મોંઘવારી ભથ્થા એટલે કે ડીએનો લાભ પણ મળશે. જેના કારણે હાથમાં આવતા પગારમાં જંગી વધારો થશે.