Last Update :
01 Apr 2025
ભારતીય શેરબજારમાં આજે મોટો ઘટાડો જોવા મળી રહ્યો છે. શરૂઆતમાં ટ્રેડિંગમાં થોડો ઘટાડો થયો હતો, પરંતુ હવે અચાનક શેરબજારમાં ભારે ઘટાડો જોવા મળ્યો છે. સેન્સેક્સ 1400 પોઈન્ટથી વધુ ઘટ્યો છે અને નિફ્ટી 350 પોઈન્ટ ઘટ્યો છે. આ ઉપરાંત બેંક નિફ્ટીમાં 757 પોઈન્ટનો ઘટાડો જોવા મળ્યો છે.
GSTVની એપ્લિકેશન ડાઉનલોડ કરો
સેન્સેક્સ હાલમાં 76,017 પર ટ્રેડ કરી રહ્યો છે, જ્યારે નિફ્ટી 23,150 પર ટ્રેડ કરી રહ્યો છે. નિફ્ટી બેંક 50,823 પર છે. BSE માર્કેટ કેપિટલાઈઝેશનમાં 3 લાખ કરોડ રૂપિયાથી વધુનો ઘટાડો થયો છે. BSEના ટોપ 30 શેરોમાંથી 29 શેરોમાં ઘટાડો થયો છે, જ્યારે માત્ર એક શેર ઈન્ડસઈન્ડ બેંકમાં વધારો જોવા મળી રહ્યો છે. HDFC બેંકના શેરમાં 3 ટકાથી વધુનો ઘટાડો થયો છે. તેવી જ રીતે, સનફાર્મા, એચસીએલ ટેક, ઇન્ફોસિસ અને બજાજ ફિનસર્વના શેરમાં પણ લગભગ 3 ટકાનો ઘટાડો થયો છે.
બજારમાં આટલો મોટો ઘટાડો કેમ થયો?
ટ્રમ્પનો રેસિપ્રોક્લ ટેરિફ
અમેરિકાના રાષ્ટ્રપતિ ડોનાલ્ડ ટ્રમ્પ આવતીકાલે 2 એપ્રિલના રોજ વિશ્વના ઘણા દેશો પર રેસિપ્રોક્લ ટેરિફ લાદવાની જાહેરાત કરવા જઈ રહ્યા છે. આના કારણે ભારત સહિત વિશ્વભરના શેરબજારો ભયભીત છે. ટ્રમ્પ આ દિવસને અમેરિકા માટે "મુક્તિ દિવસ" કહી રહ્યા છે.
ક્રૂડ ઓઈલના ભાવમાં તીવ્ર ઉછાળો
આંતરરાષ્ટ્રીય બજારમાં ક્રૂડ ઓઈલના ભાવમાં વધારો પણ ભારતીય શેરબજાર માટે નકારાત્મક સમાચાર હતા. બ્રેન્ટ ક્રૂડ ઓઈલનો ભાવ 1.51 ટકા વધીને પ્રતિ બેરલ 74.74 ડોલર થયો, જેના કારણે ભારતના આયાત બિલ અંગે ચિંતા વધી ગઈ. ટ્રમ્પે રશિયાના તેલ ખરીદદારોને પણ ચેતવણી આપી છે.
મંદીનું જોખમ
બ્રોકરેજ ફર્મ ગોલ્ડમેન સેક્સે અમેરિકામાં મંદીની શક્યતા વધારીને 35 ટકા કરી છે. અગાઉ બ્રોકરેજ કંપનીએ મંદીની 20 ટકા શક્યતાની આગાહી કરી હતી. આવી સ્થિતિમાં, બજારમાં જોખમ વધી ગયું છે અને રોકાણકારો ડરેલા હોય તેવું લાગે છે.
આ શેર વધુ તૂટ્યા
રેડિંગ્ટનના શેર 5.58 ટકા, ન્યુલેન્ડ લેબ્સના શેર 5.13 ટકા અને એમ્બર એન્ટરપ્રાઇઝના શેર 4.56 ટકા ઘટ્યા હતા. વોલ્ટાસના શેરમાં 6.75 ટકા, પોલિસી બજારના શેરમાં 4.82 ટકા, ઈન્ફો એજના શેરમાં 5.25 ટકા અને બજાજ હોલ્ડિંગના શેરમાં 4.71 ટકાનો ઘટાડો થયો હતો.
શું ટ્રમ્પ ભારત પર ટેરિફ લાદશે?
અમેરિકાના રાષ્ટ્રપતિ ડોનાલ્ડ ટ્રમ્પે દાવો કર્યો છે કે ભારત 2 એપ્રિલની સમયમર્યાદા પહેલા અમેરિકન માલ પરના ટેરિફમાં "નોંધપાત્ર" ઘટાડો કરવા તૈયાર છે, જેને તેમણે અમેરિકન વેપાર માટે "મુક્તિ દિવસ" તરીકે ઓળખાવ્યો હતો.
આ પગલું એવા સમયે લેવામાં આવ્યું છે જ્યારે ટ્રમ્પ ભારત સહિત અન્ય દેશોથી થતી આયાત પર રેસિપ્રોક્લ ટેરિફ લાદવાની તૈયારી કરી રહ્યા છે. ટ્રમ્પે કહ્યું, "તેમાંથી ઘણા દેશો તેમના ટેરિફ દૂર કરશે કારણ કે તેઓ અમેરિકા સાથે અન્યાયી રહ્યા છે." રાષ્ટ્રપતિએ કહ્યું, "યુરોપિયન યુનિયને પહેલાથી જ પોતાનો ટેરિફ ઘટાડીને 2.5 ટકા કરી દીધો છે. મેં થોડા સમય પહેલા સાંભળ્યું હતું કે ભારત પણ તેના ટેરિફમાં નોંધપાત્ર ઘટાડો કરવા જઈ રહ્યું છે." તેમણે ભારતીય અધિકારીઓ તરફથી કોઈ વધુ માહિતી કે પુષ્ટિ નહતી આપી. ટ્રમ્પે કહ્યું કે જો ભારત ટેરિફ ઘટાડશે તો અમેરિકા પણ ટેરિફ ઘટાડશે.
કાલે શું થશે?
ભારતીય બજારમાં આટલો મોટો ઘટાડો ટેરિફ લાદવામાં આવ્યા પહેલા થયો છે. જો આ ટેરિફ આવતીકાલે એટલે કે બુધવાર, 2 એપ્રિલના રોજ લાગુ કરવામાં આવે તો શેરબજારમાં વધુ ઘટાડો જોવા મળી શકે છે. પરંતુ જો અમેરિકા ભારતને રાહત આપે છે, તો તે બજાર માટે પણ રાહત હશે.
