રાહુલ ગાંધીની નાગરિકતા પર હાઈકોર્ટેનું કડક વલણ, કેન્દ્ર સરકાર પાસે માંગ્યો રિપોર્ટ

સોમવારે અલ્હાબાદ હાઈકોર્ટની લખનૌ બેન્ચે રાહુલ ગાંધીની નાગરિકતા પર કડક વલણ અપનાવ્યું. હાઈકોર્ટે કેન્દ્ર સરકારને રાહુલ ગાંધીની નાગરિકતા અંગે દસ દિવસમાં સ્પષ્ટ અહેવાલ આપવાનો આદેશ આપ્યો છે.

GSTVની એપ્લિકેશન ડાઉનલોડ કરો

   

સોમવારે રાહુલ ગાંધીની નાગરિકતા સંબંધિત કેસની સુનાવણી કરતી વખતે અલ્હાબાદ હાઈકોર્ટની લખનૌ બેન્ચે કેન્દ્ર સરકારને દસ દિવસમાં પોતાનું વલણ સ્પષ્ટ કરવાનો આદેશ આપ્યો છે. હાઈકોર્ટે કેન્દ્ર સરકારને પૂછ્યું કે રાહુલ ગાંધી ભારતીય નાગરિક છે કે નહીં. સોમવારે જસ્ટિસ એઆર મસૂદી અને જસ્ટિસ અજય કુમાર શ્રીવાસ્તવની ડિવિઝન બેન્ચ સમક્ષ કેસની સુનાવણી દરમિયાન કેન્દ્ર સરકારે સ્ટેટસ રિપોર્ટ પણ રજૂ કર્યો હતો. આના પર કોર્ટે કહ્યું કે તે ફક્ત એ જાણવા માંગે છે કે રાહુલ ગાંધી નાગરિક છે કે નહીં. કેન્દ્ર સરકારે સ્ટેટસ રિપોર્ટ રજૂ કરવા માટે વધારાનો સમય માંગ્યો હતો.

આ કેસ એસ વિગ્નેશ શિશિર દ્વારા દાખલ કરાયેલી પીઆઈએલ પર આધારિત છે. આ કેસની આગામી સુનાવણી 5 મેના રોજ થશે. અગાઉ, હાઈકોર્ટે સરકારને ચાર અઠવાડિયામાં સ્ટેટસ રિપોર્ટ દાખલ કરવાનો નિર્દેશ આપ્યો હતો. સરકારે 8 અઠવાડિયાનો સમય માંગ્યો હતો. આ અંગે સુનાવણીની તારીખ 21 એપ્રિલ નક્કી કરવામાં આવી હતી. 19 ડિસેમ્બર, 2024ના રોજ ન્યાયાધીશ રાજન રોય અને ઓમ પ્રકાશ શુક્લાની બેન્ચે એડિશનલ સોલિસિટર જનરલ સૂર્યભાન પાંડેને કેન્દ્રીય ગૃહ મંત્રાલય પાસેથી માહિતી માંગવાનો નિર્દેશ આપ્યો હતો.

ગૃહ મંત્રાલયે હાઈકોર્ટને જણાવ્યું હતું કે તેમણે યુકે સરકારને પત્ર લખ્યો છે. ભારતીય સંઘ વતી હાજર રહેલા વકીલે કહ્યું કે સમય આપવો જોઈએ. સમગ્ર મામલામાં શું તપાસ ચાલી રહી છે? અમે 8 અઠવાડિયામાં તેનો સંપૂર્ણ અહેવાલ તૈયાર કરીને રજૂ કરીશું. આ પછી કોર્ટે સમય આપ્યો હતો.