Last Update :
27 May 2025
પ્રીતિ ઝિન્ટા માત્ર એક મહાન અભિનેત્રી જ નથી, પરંતુ તે એક દયાળુ વ્યક્તિ પણ છે. હાલમાં તે IPL (ઇન્ડિયન પ્રીમિયર લીગ) 2025માં પંજાબ કિંગ્સના માલિક તરીકે ચર્ચામાં છે. પ્રીતિ ઝિન્ટાએ ભારતીય સેના સાઉથ વેસ્ટર્ન કમાન્ડ હેઠળ આર્મી વાઇવ્સ વેલ્ફેર એસોસિએશન (AWWA)ને 1 કરોડ રૂપિયાનું દાન આપ્યું છે.
GSTVની એપ્લિકેશન ડાઉનલોડ કરો
પ્રીતિ ઝિન્ટાએ 24 મે શનિવારના રોજ જયપુરમાં એક કાર્યક્રમમાં ભારતીય સશસ્ત્ર દળો પ્રત્યે હૃદયપૂર્વક પ્રશંસા અને આભાર વ્યક્ત કર્યો હતો. ભારતીય સેનાના સાઉથ વેસ્ટર્ન કમાન્ડ શપ્ત શક્તિ AWWAના પ્રાદેશિક પ્રમુખ અને ઘણા લશ્કરી પરિવારોએ તેમાં ભાગ લીધો હતો. એક સત્તાવાર નિવેદન અનુસાર, પ્રીતિએ ભારતીય સેના સાઉથ વેસ્ટર્ન કમાન્ડના આર્મી વાઇવ્સ વેલ્ફેર એસોસિએશન (AWWA) ને કુલ 1.10 કરોડ રૂપિયાનું દાન આપ્યું છે.
'વીર-ઝારા' અભિનેત્રી પ્રીતિ ઝિન્ટાએ રવિવાર, 25 મેના રોજ તેના ઇન્સ્ટાગ્રામ પર આ કાર્યક્રમનો એક વિડિયો શેર કર્યો હતો, જેમાં તે આર્મી પરિવારોને સંબોધિત કરતી જોવા મળી રહી છે. પોતાના ભાષણમાં અભિનેત્રીએ સૈનિકો અને તેમના પરિવારોની હિંમત અને શક્તિની પ્રશંસા કરી. તેમણે કહ્યું, 'આપણી ભારતીય સેના ખૂબ બહાદુર છે, પરંતુ તેની સાથે તેમના પરિવારો પણ વધુ બહાદુર છે.' આ અમારા તરફથી ખૂબ જ નાની ભેટ છે.
તેમણે પોસ્ટના કેપ્શનમાં એક લાંબી નોંધ પણ લખી છે, જેમાં તેમણે આ કાર્યક્રમમાં પોતાના ભાવનાત્મક અનુભવ વિશે જણાવ્યું છે. તેણે સાઉથ વેસ્ટર્ન કમાન્ડ ઓડિટોરિયમની પોતાની મુલાકાત વિશે વાત કરી અને સૈનિકો અને તેમના પરિવારોની કહાની અને બલિદાનથી તે કેટલી પ્રભાવિત થઈ તે વિશે વાત કરી.
તેણે તેના કેપ્શનમાં લખ્યું, 'જ્યારે હું ભારતીય સેનાના સાઉથ વેસ્ટર્ન કમાન્ડના ઓડિટોરિયમ તરફ ચાલી રહી હતી, ત્યારે મેં નિયમિત સેનાના અધિકારીઓ અને સૈનિકોના પોસ્ટરો જોયા જેમણે વિવિધ બહાદુરી પુરસ્કારો જીત્યા હતા.' કેટલાક આપણા દેશ માટે શહીદ થયાં, જ્યારે કેટલાક યુદ્ધના મેદાનમાંથી ઘા સાથે પાછા ફર્યા. આ લોકો પતિ, પુત્ર, ભાઈ અને પિતા હતા. તેઓ આપણા સશસ્ત્ર દળોનો ભાગ છે અને તેમણે આપણા આવતીકાલ માટે પોતાના આજનું બલિદાન આપ્યું.
22 એપ્રિલે પહેલગામમાં થયેલા આતંકવાદી હુમલામાં 26 લોકોના મોત થયા બાદ ભારતે 6 અને 7 મેની રાત્રે ઓપરેશન સિંદૂર શરૂ કર્યું હતું. ભારતીય સશસ્ત્ર દળોએ પાકિસ્તાન અને પાકિસ્તાન અધિકૃત જમ્મુ અને કાશ્મીરમાં આતંકવાદી ઠેકાણાઓને નિશાન બનાવ્યા હતાં, જેના પરિણામે જૈશ-એ-મોહમ્મદ, લશ્કર-એ-તૈયબા અને હિઝબુલ મુજાહિદ્દીન જેવા આતંકવાદી જૂથોના 100થી વધુ આતંકવાદીઓ માર્યા ગયા.
ભારતના આ ઓપરેશન પછી પાકિસ્તાને જમ્મુ અને કાશ્મીરના ઘણા વિસ્તારોમાં ગોળીબાર અને ડ્રોન હુમલાનો પ્રયાસ કરીને જવાબી કાર્યવાહી કરી, ત્યારબાદ ભારતે વળતો જવાબ આપ્યો અને પાકિસ્તાનના 11 વાયુસેના મથકોને નુકસાન પહોંચાડ્યું હતું.
