Last Update :
04 Jul 2025
ફિલ્મ 'બોર્ડર 2' પર ભારે હોબાળો મચી ગયો છે. FWICE (ધ ફેડરેશન ઓફ વેસ્ટર્ન ઇન્ડિયા સિને એમ્પ્લોયીઝ) એ દિલજીત દોસાંઝની કાસ્ટિંગ અંગે ફિલ્મના નિર્માતાઓને પત્ર મોકલ્યો હતો. જેમાં દિલજીત દોસાંઝને ફિલ્મમાંથી દૂર કરવાની માંગ કરી હતી. તેના દ્રશ્યોનો એક ભાગ બીજા અભિનેતાને રાખીને ફરીથી શૂટ કરવો જોઈએ.
GSTVની એપ્લિકેશન ડાઉનલોડ કરો
આ સમગ્ર મામલો દિલજીતે પાકિસ્તાની અભિનેત્રી હાનિયા આમિર સાથે 'સરદાર જી 3'માં કામ કરવાનું શરૂ કર્યા પછી શરૂ થયો હતો. ભારતમાં ફિલ્મની રિલીઝ બંધ કરી દેવામાં આવી છે. અહેવાલોમાં દાવો કરવામાં આવી રહ્યો હતો કે ભૂષણ કુમાર 'બોર્ડર 2'માંથી દિલજીતને કાઢી નાખશે. પરંતુ 2 જુલાઈના રોજ, દિલજીતે સોશિયલ મીડિયા પર આ ફિલ્મ સંબંધિત એક વીડિયો શેર કરીને પોતાની હાજરીની પુષ્ટિ કરી. નોંધનીય છે કે, 'બોર્ડર 2' આવતા વર્ષે પ્રજાસત્તાક દિવસના અવસર પર રિલીઝ થશે.
તાજેતરમાં, FWICE નેતા બીએન તિવારીએ એક ન્યૂઝ ચેનલ સાથેની વાતચીતમાં આ બાબતે કેટલાક અપડેટ્સ આપ્યા હતા. તેમણે કહ્યું- અમે ભૂષણ કુમારને ઘણી વાર મળ્યા છીએ. તેમણે અમને કહ્યું કે ફિલ્મનું શૂટિંગ લગભગ પૂર્ણ થઈ ગયું છે. એક નાનો ભાગ બાકી છે જેમાં ગીતનું શૂટિંગ બાકી છે. તેમણે અમને કહ્યું કે જો દિલજીતને આ સમયે ફિલ્મમાંથી દૂર કરવામાં આવે તો પ્રોડક્શનને ભારે નુકસાન થશે. તો અમને પણ લાગ્યું કે તે સાચા હતા અને અમે 'બોર્ડર 2' પરથી પ્રતિબંધ ઉઠાવી લીધો છે.
અભિનેતા અને FWICE સમિતિના સલાહકાર અશોક પંડિતે પણ કહ્યું કે ભૂષણ કુમારે લેખિતમાં જણાવ્યું છે કે તેઓ તેમના પ્રોડક્શન હેઠળની કોઈપણ ફિલ્મ માટે દિલજીત દોસાંઝને ફરી ક્યારેય કાસ્ટ કરશે નહીં. અશોકે કહ્યું કે ફિલ્મનું 80-85 ટકા શૂટિંગ થઈ ગયું છે. દિલજીતનું કામ લગભગ પૂર્ણ થઈ ગયું છે. ભૂષણ કુમારે ફિલ્મ પૂર્ણ કરવા માટે ફેડરેશન પાસે પરવાનગી માંગી છે અને ભવિષ્યમાં તેઓ ક્યારેય દિલજીતને કાસ્ટ કરશે નહીં. તે ટૂંક સમયમાં આ અંગે ફેડરેશનના લોકોને એક પત્ર આપવાના છે.
અશોક પંડિતે આગળ કહ્યું કે,અમે નથી ઇચ્છતા કે પ્રોડ્યુસરને નાણાકીય સમસ્યાઓનો સામનો કરવો પડે. અન્ય ફિલ્મ નિર્માતાઓને દિલજીત સાથે કામ કરવાની મંજૂરી આપવામાં આવશે નહીં. ભવિષ્યમાં,જે કોઈ પણ દિલજીત સાથે અમારી ઇચ્છાથી ઉપર ઉઠીને કામ કરશે, તેને આર્થિક નુકસાન થશે અને ફેડરેશનનો આમાં કોઈ વાંક રહેશે નહીં. હાલ પૂરતું, અમે આ પરિસ્થિતિમાં નિર્માતાને ટેકો આપવાનું નક્કી કર્યું છે.
બીએન તિવારીએ કહ્યું- અમે નથી ઇચ્છતા કે એક વ્યક્તિના કારણે આખી ટીમને નુકસાન થાય. આ ફિલ્મમાં સની દેઓલ, વરુણ ધવન અને અહાન શેટ્ટી છે. અમે તે લોકોને સંપૂર્ણ સમર્થન આપીએ છીએ. આ ફિલ્મમાં તેમનો મોટો રોલ છે. શરૂઆતથી જ પ્રોડક્શન સાથે અમારો સારો સંબંધ રહ્યો છે. આ સિવાય ફિલ્મમાં કોઈ પાકિસ્તાની કલાકાર નથી. આ ફિલ્મ આપણી સેના અને રાષ્ટ્રીય મુદ્દાઓ પર આધારિત છે. તેથી અમે ભૂષણ કુમારની વિનંતી સ્વીકારી લીધી છે અને ટીમે દિલજીત સાથે કામ કરવા સંમતિ આપી છે.
