ગુજરાતમાં સાયબર ક્રાઇમની ઘટનાઓમાં વધારો:આ વર્ષે 1.31 લાખ ફરિયાદ નોંધાઇ; 108 કરોડ રિકવર

ગુજરાતમાં ટેકનોલોજીનો ઉપયોગ વધવાની સાથે સાયબર ક્રાઇમની ઘટનાઓમાં પણ વધારો થયો છે.ગુજરાત પોલીસના સ્ટેટ સાયબર ક્રાઇમ સેલ દ્વારા વર્ષ 2024માં સાયબર ગઠીયાઓએ છેતરપિંડી કરીને નિર્દોષ નાગરિકોના આંચકેલા રૂપિયા પૈકી 108 કરોડથી વધુ રૂપિયા રિકવર કર્યા છે. આ સાથે જ એક વર્ષમાં 285.12 કરોડ રૂપિયા ફ્રિઝ કરી તેને રિકવર કરવાની કાર્યવાહી કરવામાં આવી રહી છે. 

GSTVની એપ્લિકેશન ડાઉનલોડ કરો

   

સાયબર ફ્રોડ થયાના ગોલ્ડન અવર્સમાં મળેલી ફરિયાદોમાં નાણાં ફ્રિઝ અને રિકવરી રેટ સૌથી વધુ હોવાથી કોઈપણ સાયબર ફ્રોડની ઘટના બને તો તરત જ ગોલ્ડન અવર્સમાં (ફ્રોડ થયાના પાંચ કલાકની અંદર) હેલ્પલાઇન નંબર-1930 ઉપર સંપર્ક કરવા નાગરિકોને રાજ્યના પોલીસ વડા વિકાસ સહાય દ્વારા અપીલ કરવામાં આવી છે.

વર્ષ 2024માં સાયબર ક્રાઇમની 1.31 લાખ ફરિયાદ નોંધાઇ

રાજ્યમાં 1 જાન્યુઆરી 2024થી 15 ડિસેમ્બર 2024 સુધી સાયબર ક્રાઇમ સંબંધિત કુલ 1.31 લાખ ફરિયાદો નોંધાઇ છે. આ ફરિયાદોની સામે  છેતરપિંડીમાં ગયેલી રકમ પૈકી 285.12 કરોડની રકમ ફ્રીઝ કરવામાં ગુજરાત પોલીસના સ્ટેટ સાયબર ક્રાઇમ સેલને સફળતા મળી છે.

10 દિવસની ઝુંબેશમાં રાજ્યમાંથી 40 હજાર કરતા વધુ અરજીઓ મળી

સ્ટેટ સાયબર ક્રાઇમ સેલના SP ધર્મેન્દ્ર શર્માએ કહ્યું કે, લોક અદાલત મારફતે અરજદારોને તેમના નાણાં પરત અપાવવાના હેતુસર સ્ટેટ સાયબર ક્રાઇમ સેલ દ્વારા 3 ડિસેમ્બરથી 13 ડિસેમ્બર 2024 દરમિયાન 10 દિવસની ખાસ ઝુંબેશ ચલાવવામાં આવી હતી. આ ઝુંબેશમાં રાજ્યભરની કુલ 40,905 અરજીઓના ઓપીનિયન લોક અદાલતમાં સબમિટ કરવામાં આવ્યા હતા જેના ટુંક સમયમાં કોર્ટ ઓર્ડર થશે એટલે સાયબર ફ્રોડમાં ગયેલા વધુ 75 કરોડ રૂપિયા નાગરિકોને પરત મળશે.

આ પણ વાંચો: સુરતમાં વૃધ્ધ બન્યા ડિજિટલ એરેસ્ટનો શિકાર, 8 દિવસ સુધી ધાકધમકી આપી ઠગોએ પડાવ્યા 1.71 કરોડ

મહત્ત્વપૂર્ણ છે કે ગુજરાત પોલીસના રેપિડ એક્શન સહિત હેલ્પલાઇનના ઉત્કૃષ્ટ મેનેજમેન્ટ માટે વિશેષ સન્માન મળ્યું છે. તાજેતરમાં જ કેન્દ્રીય ગૃહ અને સહકાર મંત્રી અમિત શાહના હસ્તે સાયબર હેલ્પલાઇન 1930 માટે શ્રેષ્ઠ કામગીરી બદલ ગુજરાત પોલીસને એવોર્ડથી સન્માનિત કરવામાં આવી હતી.