Last Update :
16 Jun 2025
SIPRI એ કહ્યું કે પાકિસ્તાને ગયા વર્ષે પરમાણુ શસ્ત્રો માટે સામગ્રી એકઠી કરી હતી, જે દર્શાવે છે કે તે પરમાણુ કાર્યક્રમ પર ઝડપથી કામ કરી રહ્યું છે.
GSTVની એપ્લિકેશન ડાઉનલોડ કરો
વારંવાર પરમાણુ બોમ્બની ધમકી આપનારા પાકિસ્તાનને જ્યારે ખબર પડશે કે ભારતે પરમાણુ શસ્ત્રોનો ભંડાર વધાર્યો છે ત્યારે તેને મોટો આંચકો લાગશે. આ વર્ષે ભારતના પરમાણુ શસ્ત્રોની સંખ્યા 180 પર પહોંચી ગઈ છે. સ્ટોકહોમ ઇન્ટરનેશનલ પીસ રિસર્ચ ઇન્સ્ટિટ્યૂટ (SIPRI) ના નવા અહેવાલમાં કહેવામાં આવ્યું છે કે ભારત પરમાણુ શસ્ત્રોના સંદર્ભમાં પાકિસ્તાન પર આગળ વધી રહ્યું છે, અને ભારત ધીમે ધીમે પરમાણુ ડિલિવરી સિસ્ટમ્સ એટલે કે પરમાણુ શસ્ત્રો વહન કરતી મિસાઇલોની સંખ્યા પણ વધારી રહ્યું છે.
SIPRI ના અહેવાલ મુજબ, ભારત પરમાણુ શસ્ત્રોની સંખ્યા ખૂબ જ ઝડપથી વધારી રહ્યું છે અને આ વર્ષે ભારતના પરમાણુ શસ્ત્રોની સંખ્યા 180 પર પહોંચી ગઈ છે, જ્યારે ગયા વર્ષ સુધી તેની પાસે 172 પરમાણુ શસ્ત્રો હતા. ગયા વર્ષે, SIPRI ના અહેવાલમાં કહેવામાં આવ્યું હતું કે પાકિસ્તાન પાસે 170 પરમાણુ શસ્ત્રો છે.
રિપોર્ટમાં કહેવામાં આવ્યું છે કે ભારતની નવી 'કેનિસ્ટરાઇઝ્ડ' મિસાઇલો ખૂબ જ સલામત છે. આ મિસાઇલોમાં પરમાણુ શસ્ત્રો પહેલાથી લોડ કરી શકાય છે અને શાંતિના સમયમાં પણ પરમાણુ શસ્ત્રો વહન કરવામાં સક્ષમ હોઈ શકે છે. આગામી સમયમાં, આ નવી પેઢીની મિસાઇલો એકસાથે અનેક પરમાણુ શસ્ત્રો વહન કરવામાં સક્ષમ હોઈ શકે છે.
રિપોર્ટમાં કહેવામાં આવ્યું છે કે ભારત નવી પરમાણુ પ્રણાલીઓ વિકસાવી રહ્યું છે અને એકવાર તેની નવી કેનિસ્ટરાઇઝ્ડ મિસાઇલો કાર્યરત થઈ જાય, તો એક જ મિસાઇલ પર અનેક વોરહેડ્સ સ્થાપિત કરી શકાય છે.
ભારતની ન્યુ ઝનરેશનની મિસાઇલ સિસ્ટમમાં અગ્નિ પ્રાઇમ (અગ્નિ-પી) અને મલ્ટીપલ ઇન્ડિપેન્ડન્ટલી ટાર્ગેટેબલ રી-એન્ટ્રી વ્હીકલ (MIRV) સક્ષમ અગ્નિ-5 મિસાઇલનો સમાવેશ થાય છે. ભારતીય સંરક્ષણ મંત્રાલયના જણાવ્યા અનુસાર, અગ્નિ-પી એ અગ્નિ શ્રેણીની મિસાઇલોનું સૌથી અદ્યતન પ્રકાર છે. તે એક કેનિસ્ટરાઇઝ્ડ મિસાઇલ છે, જેની રેન્જ 1000 થી 2000 કિલોમીટર છે. ગયા વર્ષે ભારતે MIRV સક્ષમ અગ્નિ-5નું સફળતાપૂર્વક પરીક્ષણ કર્યું હતું. તે 5,000 કિલોમીટરના અંતરેથી પણ લક્ષ્ય પર પ્રહાર કરી શકે છે.
પાકિસ્તાનના પરમાણુ કાર્યક્રમ અંગે, SIPRI એ કહ્યું કે તે પરમાણુ મિસાઇલો પણ બનાવી રહ્યું છે. 2024માં તેણે શસ્ત્રો બનાવવા માટે સામગ્રી એકત્રિત કરી હતી, જે દર્શાવે છે કે તે તેના પરમાણુ કાર્યક્રમ પર કેટલી ઝડપથી કામ કરી રહ્યું છે.
SIPRI એ ગયા મહિને ભારત અને પાકિસ્તાન વચ્ચે 3-4 દિવસની લડાઈ અંગે પણ ચિંતા વ્યક્ત કરી છે. SIPRI સાથે કામ કરતા મેટ કોર્ડાએ કહ્યું કે પરમાણુ મથકો પર હુમલા અને ખોટી માહિતીને કારણે એક સરળ લડાઈ પણ પરમાણુ યુદ્ધમાં ફેરવાઈ શકે છે. તેમણે કહ્યું કે આ તે દેશો માટે એક કડક ચેતવણી છે જે પરમાણુ શસ્ત્રોમાં પોતાનો વિશ્વાસ વધારવા માંગે છે.
