દિલ્હીના નવા CM રેખા ગુપ્તા પાસે કરોડોની પ્રોપર્ટી અને લાખો રૂપિયા રોકડા, જાણો તેમની કુલ સંપત્તિ

ભારતીય જનતા પાર્ટીએ રેખા ગુપ્તાને દિલ્હીના નવા મુખ્યમંત્રી બનાવ્યા છે. શાલીમાર બાગથી ચૂંટણી જીતીને તે પ્રથમ વખત ધારાસભ્ય બન્યા છે. તેમની પાસે લગભગ પાંચ કરોડની સંપત્તિ છે.

GSTVની એપ્લિકેશન ડાઉનલોડ કરો

   

દિલ્હી વિધાનસભા 2025ની ચૂંટણી દરમિયાન ફાઈલ કરવામાં આવેલી એફિડેવિટ અનુસાર રેખા ગુપ્તાની કુલ સંપત્તિ લગભગ 5.3 કરોડ રૂપિયા છે. તેમની આવકનો સ્ત્રોત વકીલ તરીકેનો તેમનો વ્યવસાય અને રાજકીય કારકિર્દી છે. રેખા ગુપ્તા પાસે 1,48,000 રૂપિયા રોકડા છે અને 22 લાખ 42 હજાર 242 રૂપિયા તેમના બેંક ખાતામાં જમા છે. આ સિવાય તેની ઘણી કંપનીઓમાં પણ શેર છે.

રેખા ગુપ્તાના પતિના નામે કાર

રેખા ગુપ્તા અને તેમના પતિ પાસે 53 લાખ 68 હજાર 323 રૂપિયાની જીવન વીમા પોલિસી છે. રેખા ગુપ્તા પાસે કોઈ કાર નથી. તેના પતિના નામે મારુતિ XL6 (2020 મોડલ)ની કાર છે. રેખા ગુપ્તાનું દિલ્હીના રોહિણીમાં એક ઘર છે, જેની કિંમત 30 લાખ રૂપિયાથી વધુ છે.

રેખા ગુપ્તાએ ભાજપમાં આ પદો સંભાળ્યા છે

દિલ્હીના નવા સીએમ બનેલા રેખા ગુપ્તા 2003-2004 સુધી ભાજપ યુવા મોરચા દિલ્હીના સચિવ હતા. 2004-2006 સુધી તેઓ ભાજપ યુવા મોરચાના રાષ્ટ્રીય સચિવ પદે રહ્યા. એપ્રિલ 2007માં, તે ભાજપની ટિકિટ પર ઉત્તર પીતમપુરા વોર્ડમાંથી કાઉન્સિલર બની હતી. 2010માં રેખા ગુપ્તાને ભાજપની રાષ્ટ્રીય કાર્યકારિણીના સભ્ય બનાવવામાં આવ્યા હતા. હાલમાં તે ભાજપ મહિલા મોરચાના રાષ્ટ્રીય ઉપાધ્યક્ષ છે.

છેલ્લી બે ચૂંટણીમાં હાર મળી હતી

રેખા ગુપ્તા છેલ્લી બે વિધાનસભા ચૂંટણીમાં શાલીમાર બાગ બેઠક પરથી ચૂંટણી હારી હતી. 2015માં રેખા ગુપ્તાને વંદના કુમારીએ લગભગ 11 હજાર મતોથી હરાવ્યા હતા. આ વખતે ચૂંટણીમાં રેખા ગુપ્તાએ વંદના કુમારીને મોટા અંતરથી હરાવ્યા છે.

રેખા ગુપ્તા હરિયાણાની રહેવાસી છે

રેખા ગુપ્તા મૂળ હરિયાણાના જીંદની છે. પૈતૃક ગામ નંદગઢ જીંદના જુલાના વિસ્તારમાં આવેલું છે. રેખાના પિતા જય ભગવાનને દિલ્હીમાં નોકરી મળવાને કારણે આખો પરિવાર દિલ્હી શિફ્ટ થઈ ગયો. રેખા ગુપ્તાએ તેમના ગ્રેજ્યુએશન સુધી જ દિલ્હીમાં અભ્યાસ કર્યો હતો. રેખા ગુપ્તાના લગ્ન મનીષ ગુપ્તા સાથે 1998માં થયા હતા. મનીષ ગુપ્તા સ્પેરપાર્ટ્સનો બિઝનેસ કરે છે.

ભાજપે દાયકાઓનો દુષ્કાળ ખતમ કર્યો

2025ની વિધાનસભા ચૂંટણીમાં ભાજપે મોટી જીત નોંધાવી છે. દાયકાઓના દુષ્કાળને ખતમ કરીને રાજધાનીમાં ભાજપ ફરી સત્તા પર આવી છે. આ વખતે 70 સીટોવાળી દિલ્હી વિધાનસભામાં ભાજપે 48 અને આમ આદમી પાર્ટીએ 22 સીટો પર જીત મેળવી છે. દિલ્હી વિધાનસભા ચૂંટણીમાં કોંગ્રેસ સતત ત્રીજી વખત ખાતું પણ ખોલી શકી નથી.