Last Update :
04 Jul 2025
વિશ્વની સૌથી મોટી ટેક કંપનીઓમાંની એક માઇક્રોસોફ્ટે પાકિસ્તાનમાં પોતાનો વ્યવસાય બંધ કરી દીધો છે. બિલ ગેટ્સની કંપનીએ પાકિસ્તાનના આર્થિક વિકાસમાં મોટો ફાળો આપ્યો છે. કંપનીનો વ્યવસાય બંધ થયા પછી પાકિસ્તાન વધુ ગરીબ બનશે. માઈક્રોસોફ્ટ પાકિસ્તાનના વડા જાવેદ રહેમાને તેને એક યુગનો અંત ગણાવ્યો.
GSTVની એપ્લિકેશન ડાઉનલોડ કરો
રિપોર્ટ અનુસાર, માઇક્રોસોફ્ટે 7 માર્ચ, 2000 ના રોજ પાકિસ્તાનમાં તેની કામગીરી શરૂ કરી હતી. ગુરુવાર, 3 જુલાઈ 2025 ના રોજ કંપનીએ પાકિસ્તાનમાં તેનો વ્યવસાય બંધ કરવાની સત્તાવાર જાહેરાત કરી છે. જોકે માઇક્રોસોફ્ટે પાકિસ્તાનમાં તેની કામગીરી બંધ કરવાનું કારણ સત્તાવાર રીતે આપ્યું નથી, ઉદ્યોગ નિષ્ણાતો માને છે કે ટેક કંપની પાકિસ્તાનને આર્થિક અસ્થિરતા ધરાવતો દેશ માને છે અને અહીં વ્યવસાયિક સ્થિતિ અત્યંત નબળી છે.
પાકિસ્તાનના ચલણમાં અસ્થિરતા, ઊંચા કરવેરા, ટેક હાર્ડવેરની સપ્લાય ચેઇનમાં સમસ્યાઓ અને વારંવાર સરકાર બદલાતા રહેવાને કારણે, ટેક કંપનીએ અહીં પોતાનો વ્યવસાય બંધ કરવાનો નિર્ણય લીધો છે. આ ઉપરાંત, પાકિસ્તાનમાં સ્થાનિક પ્રતિભાનો અભાવ છે, જેના કારણે કંપનીને ત્યાં કામ કરવામાં ઘણી મુશ્કેલીનો સામનો કરવો પડી રહ્યો હતો. રાજકીય અને આર્થિક વિશ્વાસના અભાવે માઇક્રોસોફ્ટને પાકિસ્તાનમાંથી પોતાનો વ્યવસાય પાછો ખેંચવાની ફરજ પડી.
આ બધા ઉપરાંત, ભારત અને પાકિસ્તાન વચ્ચેના વર્તમાન વેપાર તણાવને કારણે કંપનીને વધુ નુકસાન થઈ રહ્યું હતું. 2018માં બંને દેશો વચ્ચેનો વેપાર 3 બિલિયન યુએસ ડોલરનો હતો પરંતુ 2024માં તે ઘટીને ફક્ત 1.2 બિલિયન યુએસ ડોલર થવાનો અંદાજ છે. 2025માં તેમાં વધુ ઘટાડો થવાનો અંદાજ છે. પહેલગામ આતંકવાદી હુમલા પછી બંને દેશો વચ્ચેના તણાવને કારણે પાકિસ્તાનમાં રોકાણનું વાતાવરણ વધુ બગડ્યું છે.
જોકે માઈક્રોસોફ્ટ 2022માં પાકિસ્તાનમાં પોતાનો વ્યવસાય વિસ્તારવા જઈ રહ્યું હતું, પરંતુ ત્યાંની વર્તમાન રાજકીય અને આર્થિક પરિસ્થિતિને ધ્યાનમાં રાખીને, કંપનીએ વિયેતનામમાં પોતાનો વ્યવસાય વિસ્તારવાનો નિર્ણય લીધો. આ બધા ઉપરાંત, છેલ્લા બે વર્ષમાં માઇક્રોસોફ્ટે પાકિસ્તાનમાં તેના ઘણા સપોર્ટ પ્રોગ્રામ બંધ કરી દીધા છે. ઉપરાંત, કોઈપણ નવી ભાગીદારી મોકૂફ રાખવામાં આવી છે.
