Last Update :
30 Apr 2025
Pahalgam Attack બાદ ભારતે આતંકવાદીઓ અને તેમના આકાઓને નાશ કરવાની જાહેરાત કરી છે. આ દરમિયાન, પાકિસ્તાનની હતાશા દિવસેને દિવસે વધી રહી છે. હવે પાકિસ્તાનના રાજકારણમાંથી ફરી એકવાર ઉશ્કેરણી અને કટ્ટરવાદથી ભરેલું નિવેદન સામે આવ્યું છે. પાકિસ્તાનની વિપક્ષી પાર્ટી PPPના સાંસદ પલવશા મોહમ્મદ ઝઈ ખાને અયોધ્યા અને ભારતની આંતરિક સાર્વભૌમત્વ પર અત્યંત વિવાદાસ્પદ નિવેદન આપ્યું છે.
પલવશાએ જણાવ્યું કે, બાબરી મસ્જિદના પુનર્નિર્માણની પહેલી ઈંટ પાકિસ્તાની સેનાના જવાનો મૂકશે અને પહેલી અઝાન પાકિસ્તાન આર્મી ચીફ જનરલ આસિમ મુનીર આપશે. આ નિવેદનથી ભારત-પાકિસ્તાનના સંબંધોમાં પહેલેથી ચાલી રહેલા તણાવ વચ્ચે નવો વિવાદ ઊભો થયો છે.
પલવશા, પાકિસ્તાન પીપલ્સ પાર્ટી (PPP)ના પંજાબ સીટના સાંસદ છે. તાજેતરમાં PPPના અધ્યક્ષ બિલાવલ ભુટ્ટો ઝરદારીએ ભારત વિરુદ્ધ ભડકાઉ નિવેદન આપ્યું હતું.
'અમે બંગડી નથી પહેરતા'
પલવશા ખાને તેમના નિવેદનમાં આગળ જણાવ્યું કે, અમે બંગડીઓ નથી પહેરતા. સમય આવશે ત્યારે જવાબ આપીશું. આ નિવેદન માત્ર ભારતીય સેના અને સંવેદનશીલ ધાર્મિક મુદ્દાઓ પર ટિપ્પણી નથી, પરંતુ તે પાકિસ્તાન તરફથી સ્પષ્ટ ઉશ્કેરણીનો પ્રયાસ પણ ગણવામાં આવે છે.
ખાલિસ્તાની આતંકવાદી પન્નુની પ્રશંસા
પલવશા મોહમ્મદ ઝઈ ખાને તેમના ભાષણમાં ભારત દ્વારા આતંકવાદી જાહેર કરાયેલા ખાલિસ્તાની સમર્થક ગુરપતવંત સિંહ પન્નુની પણ પ્રશંસા કરી. તેમણે પન્નુને 'નીડર અવાજ' ગણાવ્યો.
ગુરપતવંત સિંહ પન્નુને ભારત સરકારે UAPA (ગેરકાનૂની પ્રવૃત્તિઓ નિવારણ અધિનિયમ) હેઠળ આતંકવાદી જાહેર કર્યો છે અને તેની પ્રવૃત્તિઓને ભારતની અખંડિતતા અને શાંતિ માટે સીધો ખતરો માનવામાં આવે છે.
નફરત ફેલાવવાનો પ્રયાસ
ભારત સરકાર તરફથી હજુ સુધી આ નિવેદન પર કોઈ સત્તાવાર પ્રતિક્રિયા આવી નથી, પરંતુ રાજદ્વારી વર્તુળોમાં આને ગંભીર ઉશ્કેરણીનું ઉદાહરણ ગણવામાં આવી રહ્યું છે. સુરક્ષા અને વ્યૂહરચના નિષ્ણાતોનું માનવું છે કે પાકિસ્તાની નેતાઓ વારંવાર ભારતના ધાર્મિક અને સંવેદનશીલ મુદ્દાઓ પર બોલીને નફરત ફેલાવવાનો પ્રયાસ કરી રહ્યા છે, જે દ્વિપક્ષીય સંબંધોને વધુ નુકસાન પહોંચાડી શકે છે.
પલવશા મોહમ્મદ ઝઈ ખાને શું કહ્યું?
''આ (ભારત) પાકિસ્તાનને ધમકી આપે છે, તો તેમને ખબર હોવી જોઈએ કે તે સેનામાં વિભાજન છે. તે સેનાનો કોઈ સિખ સૈનિક... કોઈ સિખ જવાન... પાકિસ્તાન પર હુમલો કરવા તૈયાર નથી. પાકિસ્તાન સાથે યુદ્ધ કરવા તૈયાર નથી, કારણ કે તેમના માટે આ ગુરુ નાનકની ધરતી છે. તેમના માટે આ પવિત્ર ધરતી છે. આ ધરતીના ખૂણે-ખૂણે ગુરુ નાનકના ચરણ પડ્યા છે. અહીં સિખોના જે નેતા છે- ગુરપતવંત સિંહ પન્નુ... તેમની હિંમતને આપણે સલામ કરવી જોઈએ. તેમણે કહ્યું છે કે ભારતીય પંજાબમાંથી કોઈ ભારતીય સેના આ તરફ આવવા દેશે નહીં. આ લોકો અમને ધમકી આપે છે કે અમારી લાશો બિછાવશે, તો તેમને ખબર હોવી જોઈએ કે સેના માત્ર છ-સાત લાખ નથી. અહીં 25 કરોડ લોકો છે, જે સમય આવે ત્યારે સેના સાથે ઊભા રહેશે અને ઈન્શા અલ્લાહ તેઓ સૈનિક બનશે. હું મારી વાત પૂરી કરું છું અને કહું છું કે ભુટ્ટો સાહેબે કહ્યું હતું કે અમે હજાર વર્ષ સુધી યુદ્ધ કરીશું. બિલાવલ સાહેબે પણ તે જ વાતનું પુનરાવર્તન કર્યું છે અને કહ્યું છે કે જો અહીં પાણી નહીં વહે, તો નદીઓમાં લોહી વહેશે... હું ફક્ત એટલું જ કહીશ કે તે સમય દૂર નથી, જ્યારે બાબરી મસ્જિદની પહેલી ઈંટ પિંડીથી એક સામાન્ય સૈનિક મૂકશે અને તેમાં પહેલી અઝાન પાકિસ્તાનના સેનાપતિ આસિમ મુનીર આપશે.''
