Last Update :
13 Jun 2025
વડોદરા શહેરના વાડી વિસ્તારમાં રહેતા મહેશ્વરી પરિવારના ઘરે બે દિવસ પહેલા યોજાયેલા લગ્નનો આનંદ માતમમાં ફેરવાઈ ગયો છે. વડોદરાના માહેશ્વરી પરિવારના પુત્ર ભાવિક મહેશ્વરીના લગ્ન 10 જૂને કોર્ટ મેરેજ દ્વારા થયા હતા. પરંતુ હવે આ જ ઘરમાં શોકનો માહોલ છે. લગ્નના બે દિવસ પછી ભાવિકનું વિમાન દુર્ઘટનામાં મૃત્યુ થયું.
GSTVની એપ્લિકેશન ડાઉનલોડ કરો
ભાવિક મહેશ્વરી છેલ્લા ઘણા વર્ષોથી લંડનમાં કામ કરતો હતો. દર વર્ષે તે 15 દિવસ માટે પરિવારને મળવા વડોદરા આવતો હતો. આ વખતે તે વડોદરા આવ્યો ત્યારે જેની સાથે સગાઈ થઈ હતી તેની સાથે પરિવારની મરજી પ્રમાણે 10 જૂને કોર્ટ મેરેજ પણ કર્યા હતા.
લગ્નની ખુશી બે દિવસ પછી જ શોકમાં ફેરવાઈ ગઈ
લગ્ન બાદ નવવધૂએ પતિને હસતાં હસતાં લંડન જવા માટે વિદાય આપી. કોઈએ વિચાર્યું પણ ન હતું કે, આ વિદાય છેલ્લી હશે. બોર્ડિંગ થયાના થોડા સમય પછી સમાચાર આવ્યા કે અમદાવાદથી ઉડાન ભરેલી એર ઇન્ડિયાની ફ્લાઇટ ક્રેશ થઈ ગઈ છે. આ વિમાનમાં જ ભાવિક લંડન જઈ રહ્યો હતો.
આ સમાચારથી મહેશ્વરી પરિવાર પર દુ:ખનો પહાડ તૂટી પડ્યો છે. તેના પિતા હજુ પણ પોતાના પુત્રના મોતને સ્વીકારવા તૈયાર નથી. પરિવારના સભ્યોની આંખોમાંથી આંસુ અટકતા નથી. જ્યાં બે દિવસ પહેલા લગ્નની મીઠાઈઓ વહેંચવામાં આવી હતી, ત્યાં આજે ગમગિની છવાઈ છે.
વિમાન દુર્ઘટનામાં 274 લોકોએ જીવ ગુમાવ્યો
જણાવી દઈએ કે, અમદાવાદથી લંડન જતી ફ્લાઇટ અકસ્માતમાં માત્ર વિમાન જ નહીં પરંતુ ઘણા પરિવારોના સપના, ભવિષ્ય અને આકાંક્ષાઓ પણ બરબાદ થઈ ગઈ હતી. આ અકસ્માતમાં 274 લોકોએ જીવ ગુમાવ્યા હતા. અનેક પરિવારો વિખેરાઈ ગયા. કોઈએ પોતાનો પુત્ર ગુમાવ્યો, કોઈએ માતા, પિતા અને પતિ ગુમાવ્યો અને કોઈએ પોતાની પુત્રી ગુમાવી.
