'જો અમે સત્તામાં આવીશું તો RSS પર પ્રતિબંધ મૂકીશું...', કોંગ્રેસ અધ્યક્ષ ખડગેના પુત્ર પ્રિયાંકની જાહેરાત

કોંગ્રેસ અધ્યક્ષ મલ્લિકાર્જુન ખડગેના પુત્ર અને કર્ણાટક સરકારના મંત્રી પ્રિયાંક ખડગેએ જાહેરાત કરી છે કે જો કોંગ્રેસ ફરીથી કેન્દ્રમાં સત્તામાં આવશે તો રાષ્ટ્રીય સ્વયંસેવક સંઘ (RSS) પર દેશભરમાં પ્રતિબંધ મૂકવામાં આવશે. કોંગ્રેસના વરિષ્ઠ નેતા અને લોકસભામાં વિરોધ પક્ષના નેતા રાહુલ ગાંધી સતત RSSની ટીકા કરી રહ્યા છે અને સંગઠન પર દેશને વિભાજીત કરવાનો આરોપ લગાવ્યો છે. પ્રિયાંક ખડગેએ RSS પર દેશવ્યાપી પ્રતિબંધની જાહેરાત કરીને નવો જ મુદ્દો છેડ્યો છે.

GSTVની એપ્લિકેશન ડાઉનલોડ કરો

   

'RSS સમાજમાં નફરત ફેલાવી રહ્યું છે'

પ્રિયાંક ખડગેએ કહ્યું કે, દેશમાં કોણ નફરત ફેલાવી રહ્યું છે? કોમી હિંસા માટે કોણ જવાબદાર છે? બંધારણ બદલવાની વાત કોણ કરી રહ્યું છે? પ્રિયાંક ખડગેએ કહ્યું કે RSS તેની રાજકીય પાંખ ભાજપને મહત્વપૂર્ણ પ્રશ્નો કેમ નથી પૂછતું? જેમ કે દેશમાં બેરોજગારી કેમ વધી રહી છે, પહેલગામમાં આતંકવાદી હુમલો કેવી રીતે થયો? આવું ન પૂછીને સંઘના લોકો સમાજમાં નફરત ફેલાવી રહ્યા છે. પ્રિયાંક ખડગેએ કહ્યું કે, સત્તામાં આવ્યા પછી કાયદાકીય પ્રક્રિયા હેઠળ દેશમાં RSS પર પ્રતિબંધ મૂકવામાં આવશે.

આ બધા મુદ્દાઓની તપાસ થવી જોઈએ

કર્ણાટક સરકારના મંત્રી પ્રિયાંકે કહ્યું કે શું ED, IT જેવી બધી તપાસ એજન્સીઓનો ઉપયોગ ફક્ત વિપક્ષને દબાવવા માટે છે, સરકાર RSSની તપાસ કેમ નથી કરતી, પૈસા ક્યાંથી આવી રહ્યા છે, તેમની આવકનો સ્ત્રોત શું છે. પ્રિયાંક ખડગેએ કહ્યું કે સંઘના લોકો દર વખતે નફરતભર્યા ભાષણો અને બંધારણ બદલવાની વાત કરીને કેવી રીતે છટકી શકે છે,  આર્થિક ગુનાઓ કર્યા પછી તેઓ કેવી રીતે છટકી જાય છે, આ બધા મુદ્દાઓની તપાસ થવી જોઈએ.

ભાજપનું હાઈકમાન્ડ કોણ છે?

તેજસ્વી સૂર્યાએ મલ્લિકાર્જુન ખડગેને કોંગ્રેસ હાઈકમાન્ડ વિશે પ્રશ્ન કર્યો હતો. જેનો જવાબ આપતા પ્રિયાંક ખડગેએ 'X' પર પોસ્ટ કરી હતી. પ્રિયાંકે સવાલ કર્યો કે, 'ભાજપનું હાઈકમાન્ડ કોણ છે? તમારા મોટાભાગના કાર્યકરો તમારા રાષ્ટ્રીય પક્ષના પ્રમુખનું નામ પણ કહી શકતા નથી, તેમના માટે મોદી જ રાષ્ટ્રપતિ, વડા પ્રધાન અને કદાચ પંચાયત સચિવ ત્રણેય છે.'

 RSSને રિપોર્ટ કરવા નાગપુર જાય છે

પ્રિયાંક ખડગેએ કહ્યું, 'જ્યારે દેશમાં પરિસ્થિતિ મુશ્કેલ બને ત્યારે વડાપ્રધાન સંસદમાં જતા નથી, પરંતુ RSSને રિપોર્ટ કરવા નાગપુર જાય છે.' તેમણે તેજસ્વી સૂર્યાને પડકાર ફેંકતા કહ્યું કે, તમે ખુલ્લા અવાજમાં કહો કે, મને RSS ની જરૂર નથી, હું ચૂંટણી જીતી શકું છું. કારણ કે મોદીજી અને નડ્ડાજી મારા એકમાત્ર હાઈકમાન્ડ છે, અત્યારે અને હંમેશા. 

જાતિ અને ધર્મના આધારે સમુદાયોમાં નફરત ના ફેલાવો

પ્રિયાંક ખડગે અગાઉ પણ આવું નિવેદન આપી ચૂક્યા છે. બે વર્ષ પહેલાં પણ કર્ણાટકના સંદર્ભમાં તેમણે કહ્યું હતું કે જો કોઈ સંગઠન રાજ્યમાં શાંતિ ભંગ કરવાનો અથવા સાંપ્રદાયિક વાતાવરણ બગાડવાનો પ્રયાસ કરશે, તો સરકાર તેના પર પ્રતિબંધ મૂકવામાં બિલકુલ અચકાશે નહીં. કોંગ્રેસે કર્ણાટકમાં પોતાના ચૂંટણી ઢંઢેરામાં કહ્યું હતું કે રાજ્યમાં સત્તામાં આવતાની સાથે જ તે બજરંગ દળ, પીએફઆઈ સહિત જાતિ અને ધર્મના આધારે સમુદાયો વચ્ચે નફરત ફેલાવતી તમામ સંસ્થાઓ સામે કડક કાર્યવાહી કરીને તેમના પર પ્રતિબંધ મૂકશે.

પ્રિયાંક ખડગેએ આ ચૂંટણી ઢંઢેરામાં કહ્યું હતું કે અમે કાયદા અનુસાર જ કાર્યવાહી કરીશું. એવા લોકો સામે પણ કાર્યવાહી કરીશું જે કાયદો તોડશે. જ્યારે પ્રિયાંકને પૂછવામાં આવ્યું કે શું સરકાર આરએસએસ અને બજરંગ દળ પર પણ પ્રતિબંધ મૂકશે? તો કહ્યું કે, 'શાંતિ ભંગ કરવાનો પ્રયાસ કરતી કોઈપણ સંસ્થા કે વ્યક્તિ સામે કાર્યવાહી કરવામાં આવશે. ભલે તે હું જ ન હોઉં?'

3 વખત RSS પર લાગી ચૂક્યો છે પ્રતિબંધ

કેશવ બલરામ હેડગેવારે 27 સપ્ટેમ્બર 1925 ના રોજ વિજયાદશમીના દિવસે આરએસએસની સ્થાપના કરી હતી. પરંતુ અત્યાર સુધીમાં આ સંગઠન પર ત્રણ વાર અલગ અલગ કારણોસર પ્રતિબંધ મૂકવામાં આવ્યો છે. ૧૯૪૮માં મહાત્મા ગાંધીની હત્યા પછી સંઘ પર ૧૮ મહિના માટે પ્રતિબંધ મૂકવામાં આવ્યો હતો કારણ કે બાપુની હત્યા RSS સાથે જોડાયેલી હતી. આ પછી ૧૯૭૫માં ઇન્દિરા ગાંધીની સરકારે કટોકટીનો વિરોધ કરવા બદલ RSS પર પ્રતિબંધ મૂક્યો હતો, જે બે વર્ષ સુધી રહ્યો. ત્રીજી વખત, ૧૯૯૨માં RSS પર પ્રતિબંધ મૂકવામાં આવ્યો હતો, કારણ કે અયોધ્યામાં બાબરી મસ્જિદ ધ્વંસમાં સંઘની ભૂમિકા હતી. પરંતુ ૬ મહિના પછી આ પ્રતિબંધ હટાવી લેવાયો હતો.