Surat News: અમરનાથ યાત્રાના રજીસ્ટ્રેશન પર વિવાદ, પૂરતાં ટોકન ન અપાતા લોકોમાં આક્રોશ

સુરતમાં દર વર્ષની જેમ આ વર્ષે પણ અમરનાથ યાત્રાનું રજીસ્ટ્રેશન શરૂ થઈ ગયું છે. 14 એપ્રિલથી દેશમાં વિવિધ બેંકો મારફતે રજીસ્ટ્રેશનની પ્રક્રિયા ચાલુ કરવામાં આવી છે. પરંતુ શરૂઆતના જ દિવસે રજીસ્ટ્રેશન વ્યવસ્થાને લઈને વિવાદ ઉભો થયો છે અને લોકોમાં ભારે આક્રોશ જોવા મળ્યો છે. જમ્મુ-કાશ્મીર બેંક, સ્ટેટ બેંક ઓફ ઇન્ડિયા (SBI), પંજાબ નેશનલ બેંક (PNB) અને યસ બેંક જેવી નિર્ધારિત બેંકોમાં રજીસ્ટ્રેશન માટે શિવભક્તોની ભારે ભીડ જમાઈ છે. યાત્રાળુઓ સવારથી લાઈનમાં ઊભા રહે છે છતાં રજીસ્ટ્રેશન ન થઈ શકવાના કારણે નિરાશ થઈને પાછા ફરતા જોવા મળ્યા.

GSTVની એપ્લિકેશન ડાઉનલોડ કરો

   

દરરોજ ફક્ત 25 ટોકન મળતા લોકોમાં નારાજગી

સત્તાવાર રીતે દરરોજ 200 યાત્રાળુઓ માટે રજીસ્ટ્રેશન થવાની જાહેરાત કરવામાં આવી છે. જેમાં 100 રજીસ્ટ્રેશન પહેલગામ રૂટ માટે અને 100 બાલતાલ રૂટ માટે રાખવામાં આવ્યા છે. છતાં સ્થિતિ એવી છે કે બેંકો દ્વારા ફક્ત 25 જેટલા ટોકન જ આપવામાં આવી રહ્યા છે. પરિણામે 100 રજીસ્ટ્રેશન માટે લાઇનમાં ઊભેલા અનેક યાત્રાળુઓનું નામ પણ નહીં આવે અને તેઓ રજીસ્ટ્રેશન વિના પાછા ફરતા રહે છે.

આ પણ વાંચો :

અમરનાથ યાત્રાએ જનારા શ્રદ્ધાળુઓ માટે ખુશખબરી, આ તારીખથી શરૂ થશે પ્રી રજીસ્ટ્રેશન

Surat News: અમરનાથ યાત્રા માટે ફિટનેસ સર્ટિફિકેટની કામગીરી શરૂ, સિવિલ – સ્મીમેર હોસ્પિટલમાં અલાયદી વ્યવસ્થા

'પાછલા બારણેથી' ટોકન આપવાની ફરિયાદ

યાત્રાળુઓનો આક્ષેપ છે કે બેંકોમાં પારદર્શિતા નહીં હોવાથી કેટલીક જગ્યાએ 'પાછલા બારણેથી' ટોકન અપાય છે. પરિણામે સામાન્ય શ્રદ્ધાળુઓ સાથે અન્યાય થાય છે અને જે વ્યક્તિઓ જાણ-ઓળખ ધરાવે છે તેઓને વરીયતા આપવામાં આવે છે. આ અવ્યવસ્થાના વિરોધમાં જિલ્લાના વિવિધ હિસ્સાઓમાંથી આવેલા શિવભક્તોએ એક સાથે વિરોધ નોંધાવ્યો છે. ઘણા સ્થળોએ શાંતિપૂર્ણ ધરણા અને નારાબાજી પણ કરવામાં આવી. યાત્રાળુઓની આગેવાની કરતા શિવભક્ત જગદીશભાઈ મેરે મીડિયાને જણાવ્યું કે, "અમે ભગવાન શિવની યાત્રા માટે દુર્ગમ માર્ગો પસાર કરવા તૈયાર છીએ, પરંતુ વ્યવસ્થાઓમાં આવું ભ્રષ્ટાચાર અસહ્ય છે. અમને માત્ર ટોકન માંગે છે, દાન નહીં."

પારદર્શિતા દાખવવાની માગ

શિવભક્તો અને સ્થાનિક આગેવાનો દ્વારા રજીસ્ટ્રેશનની ટોકન સંખ્યા વધારવાની તથા ટોકન વિતરણ પ્રક્રિયામાં પારદર્શિતા લાવવાની મુખ્ય માંગણી કરવામાં આવી છે. તેમનું કહેવું છે કે જો યાત્રાને સુચારૂ બનાવવા છે તો તમામ શ્રદ્ધાળુઓ સાથે સમાન વ્યવહાર જરૂરી છે. આ સમગ્ર ઘટનાક્રમ વચ્ચે અત્યાર સુધીમાં સ્થાનિક પ્રશાસન કે બેંકો તરફથી કોઈ સત્તાવાર નિવેદન આપવામાં આવ્યું નથી. જોકે, સ્થિતિને ધ્યાનમાં લઈને લોકોમાં વણસતી સ્થિતિને કાબૂમાં લેવાની જરૂરિયાત અનુભવાઈ રહી છે.