શેરબજારના ત્રણ દિવસના ઘટાડાને બ્રેકઃ રેપો રેટમાં ઘટાડાની આશાએ સેન્સેક્સ 261 પોઇન્ટ વધ્યો 

વૈશ્વિક બજારોમાંથી સકારાત્મક સંકેતો મળતાં, ભારતીય શેરબજાર બુધવારે (૪ જૂન) લીલા નિશાનમાં બંધ થયું. બજારમાં છેલ્લા ત્રણ ટ્રેડિંગ સત્રોથી ચાલ્યો આવતો ઘટાડાનો ટ્રેન્ડ અટકી  ગયો. અમેરિકા-ચીન વેપાર વાટાઘાટોમાં પ્રગતિની અપેક્ષા અને આ અઠવાડિયાના અંતમાં ભારતીય રિઝર્વ બેંક દ્વારા વ્યાજ દરમાં ઘટાડો થવાની અપેક્ષાને કારણે આજે બજારમાં તેજી જોવા મળી. મેટલ અને આઇટી ક્ષેત્રના શેરોમાં ખરીદદારો તરફથી બજારને વેગ મળ્યો.

GSTVની એપ્લિકેશન ડાઉનલોડ કરો

   

બીએસઈ સેન્સેક્સ આજે ૫૦ પોઈન્ટથી વધુ વધીને ૮૦,૭૭૭ પોઈન્ટ પર ખુલ્યો. ટ્રેડિંગ દરમિયાન, તે ૮૦,૭૦૫ પોઈન્ટના નીચા સ્તરે અને ૮૧,૦૮૭ પોઈન્ટના ઉચ્ચ સ્તરે પહોંચ્યો. અંતે, સેન્સેક્સ ૨૬૦.૭૪ પોઈન્ટ અથવા ૦.૩૨ ટકાના વધારા સાથે ૮૦,૯૯૮.૨૫ પર બંધ થયો. જ્યારે નેશનલ સ્ટોક એક્સચેન્જનો નિફ્ટી-50 આજે 24,560.45 પોઈન્ટ પર મજબૂત રીતે ખુલ્યો. ટ્રેડિંગ દરમિયાન, તે 24,644 પોઈન્ટની ઊંચી સપાટી અને 24,530 પોઈન્ટની નીચી સપાટીએ પહોંચ્યો. અંતે, તે 77.70 પોઈન્ટ અથવા 0.32% ના વધારા સાથે 24,620 પર બંધ થયો.

રોકાણકારોએ એક જ સત્રમાં લગભગ રૂ. ૨ લાખ કરોડનો ફાયદો  મેળવ્યો

બ્રોડર માર્કેટમાં, નિફ્ટી મિડકેપ ઇન્ડેક્સ અને નિફ્ટી સ્મોલકેપ ઇન્ડેક્સ અનુક્રમે 0.51% અને 0.82% વધીને બંધ થયા. ક્ષેત્રીય મોરચે, નિફ્ટી મેટલ ઇન્ડેક્સ સૌથી વધુ 0.8% વધ્યો. આ ઉપરાંત, નિફ્ટી આઇટી ઇન્ડેક્સ 0.62% અને ઓટો ઇન્ડેક્સ 0.5% વધ્યો. આ વધારાને કારણે બીએસઇ પર લિસ્ટેડ બધી કંપનીઓનું માર્કેટ કેપ પાછલા સત્રમાં રૂ. ૪૪૩ લાખ કરોડથી વધીને રૂ. ૪૪૫ લાખ કરોડ થયું. આના પરિણામે રોકાણકારોએ એક જ સત્રમાં લગભગ રૂ. ૨ લાખ કરોડનો ફાયદો  મેળવ્યો.

ટોપ ગેનર્સ અને લૂઝર્સ
આજે સેન્સેક્સમાં ભારતી એરટેલ, એટરનલ, ઇન્ડસઇન્ડ બેંક, ટાટા મોટર્સ, ટેક મહિન્દ્રા અને બજાજ ફિનસર્વના શેર સૌથી વધુ ૨.૯ ટકા વધ્યા હતા. બીજી તરફ, ટીસીએસ, ટાઇટન, એશિયન પેઇન્ટ્સ, આઇસીઆઇસીઆઇ  બેંક, અદાણી પોર્ટ્સ, સન ફાર્મા અને એક્સિસ બેંકના શેર ૧.૫ ટકા સુધી ઘટ્યા હતા.

રિલાયન્સ ઇન્ડસ્ટ્રીઝમાં 1.29 ટકાનો વધારો નોંધાયો 

નિફ્ટી-50ના ટોપ ગેનર્સની વાત કરવામાં આવે તો ઇન્ટરનલનો શેર ટોચ પર રહ્યો, જેમાં 3.36 ટકાનો વધારો જોવા મળ્યો હતો. આ પછી જિયો ફાયનાન્સિયલ સર્વિસીઝમાં 2.28 ટકાનો વધારો ભારતી એરટેલમાં 1.86 ટકાનો વધારો ઇન્ડસઇન્ડ બેન્કમાં 1.69 ટકાનો વધારો અને રિલાયન્સ ઇન્ડસ્ટ્રીઝમાં 1.29 ટકાનો વધારો નોંધાયો હતો. 

નિફ્ટી ૫૦ ના ટોચના લુઝર્સની વાત કરીએ તો, બજાજ ફિનસર્વમાં સૌથી મોટો ઘટાડો થયો, જે ૧.૮ ટકા ઘટ્યો. આ પછી, ટ્રેન્ટ ૧.૫ ટકા, શ્રીરામ ફાઇનાન્સ ૧.૦૯ ટકા, એક્સિસ બેંક ૦.૮૯ ટકા અને ટીસીએસ ૦.૭૨ ટકા ઘટ્યો.

ટેકનિકલ દૃષ્ટિએ શેરબજારની સ્થિતિ
એલકેપી  સિક્યોરિટીઝના સિનિયર ટેકનિકલ વિશ્લેષક રૂપક ડેના મતે, નિફ્ટી મંદીનો ટ્રેન્ડ ધરાવે છે. ટ્રેડર્સ આરબીઆઇના વ્યાજ દરના નિર્ણયની રાહ જોઈ રહ્યા છે. શુક્રવારે જાહેરાત અને કમેન્ટ્સ  આવે ત્યાં સુધી બજાર બીજા કારોબારી સત્ર માટે ચડાવ ઉતારવાળું રહેવાની શક્યતા છે. ચાર્ટ ટૂંકા ગાળાની મંદીનો સંકેત આપે છે.  નિફ્ટીમાં તાત્કાલિક સપોર્ટ લેવલ 24,500 પર છે. નિફ્ટી આ સ્તરથી નીચે  જશે તો વધુ નરમાઇ આવવાની શક્યતા છે એમ બજારના જાણકારોનું કહેવું છે. 

વૈશ્વિક બજારોમાંથી શું સંકેતો મળી રહ્યા છે?

બુધવારે એશિયન બજારોમાં તેજી જોવા મળી. વોલ સ્ટ્રીટમાં વધારાને કારણે એશિયન બજારોમાં પણ મજબૂતી જોવા મળી. ટેક શેરોમાં થયેલા વધારાને કારણે આ સ્થિતિ સર્જાઈ. રોઇટર્સ દ્વારા મતદાન કરાયેલા અર્થશાસ્ત્રીઓ પ્રથમ ક્વાર્ટરમાં જીડીપી વૃદ્ધિ 1.5 ટકા રહેવાની અપેક્ષા રાખે છે, જે અગાઉના ક્વાર્ટરમાં 1.3 ટકાથી વધુ છે.