Last Update :
02 May 2025
ગઈકાલે મુંબઈ ઈન્ડિયન્સ (MI) એ રાજસ્થાન રોયલ્સ (RR) ને 100 રનથી હરાવ્યું હતું. આ મેચમાં MI તરફથી બોલરો અને બેટ્સમેનોએ શાનદાર પ્રદર્શન કર્યું હતું. RR માટે, કેપ્ટન રિયાન પરાગે ટોસ જીતીને પહેલા બોલિંગ કરવાનો નિર્ણય લીધો, જે ખોટો સાબિત થયો. પ્રથમ બેટિંગ કરતા મુંબઈએ 217 રન બનાવ્યા હતા. રોહિત શર્મા અને રિયન રિકેલ્ટન ટીમ માટે સૌથી મોટા હીરો સાબિત થયા. બંને બેટ્સમેનોએ અડધી સદી ફટકારી હતી.
GSTVની એપ્લિકેશન ડાઉનલોડ કરો
મુંબઈને 13 વર્ષ પછી જીત મળી
MIને 13 વર્ષ પછી જયપુરમાં જીત મળી છે. આ પહેલા મુંબઈએ 2012માં જયપુરમાં RR સામેની મેચ 10 વિકેટથી જીતી હતી. હવે 13 વર્ષ પછી હાર્દિક પંડ્યાની કેપ્ટનશિપમાં જયપુરમાં મુંબઈની જીત થઈ છે. આ સિઝનમાં હાર્દિકની કેપ્ટનશિપ હેઠળ મુંબઈની આ સતત છઠ્ઠી જીત છે. મુંબઈએ જયપુરના સવાઈ માનસિંહ સ્ટેડિયમમાં કુલ 9 IPL મેચ રમી છે, જેમાંથી ટીમે ફક્ત 3 મેચ જીતી છે અને 6 મેચ હારી છે.
રોહિત અને રિકેલ્ટને મજબૂત શરૂઆત આપી
MI માટે, રોહિત શર્મા અને રિયન રિકેલ્ટને ઈનિંગની શરૂઆતથી જ સારી બેટિંગ કરી. આ બંને ખેલાડીઓએ પહેલી વિકેટ માટે 116 રનની પાર્ટનરશિપ કરી. બંને બેટ્સમેનોએ અડધી સદી ફટકારી હતી. રોહિતે 36 બોલમાં ખૂબ જ સરળતાથી 53 રન બનાવ્યા, જેમાં 9 ચોગ્ગાનો સમાવેશ થાય છે. તેના સિવાય, રિકેલ્ટને 61 રનનું યોગદાન આપ્યું. રિકેલ્ટનને મહેશ તીક્ષાણાએ બોલ્ડ આઉટ કર્યો હતો. જ્યારે રોહિતને રિયાન પરાગે પવેલિયન મોકલ્યો હતો. આ બે સિવાય રાજસ્થાનના અન્ય કોઈ બોલરને વિકેટ નહતી મળી.
સૂર્યકુમાર યાદવે પણ જોરદાર બેટિંગ કરી હતી
સૂર્યકુમાર યાદવ અને હાર્દિક પંડ્યાએ પણ સારી બેટિંગ કરી હતી. આ બંને ખેલાડીઓએ છેલ્લી ઓવરોમાં ઝડપથી રન બનાવ્યા હતા. સૂર્યાએ 23 બોલમાં 48 રન બનાવ્યા. હાર્દિકે પણ 23 બોલમાં 48 રનનું યોગદાન આપ્યું. રાજસ્થાનના બોલરો મેચમાં ખરાબ રીતે ફ્લોપ રહ્યા.
રાજસ્થાનના બેટ્સમેન પણ ફ્લોપ રહ્યા
RRની શરૂઆત ખરાબ રહી હતી કારણ કે છેલ્લી મેચમાં સદી ફટકારનાર વૈભવ ખાતું ખોલાવ્યા વિના જ આઉટ થઈ ગયો. આ પછી, યશસ્વી જયસ્વાલ પણ ક્રીઝ પર ટકી ન શક્યો અને તે ટ્રેન્ટ બોલ્ટના બોલ પર ક્લીન બોલ્ડ થયો. નીતિશ રાણા, કેપ્ટન રિયાન પરાગ અને શિમરોન હેટમાયર પર મોટી ઈનિંગ રમવાની જવાબદારી હતી, પરંતુ આ ખેલાડીઓ ખરાબ રીતે નિષ્ફળ ગયા. શુભમન દુબેએ 15 રન બનાવ્યા.
મુંબઈ ઈન્ડિયન્સ માટે, હાર્દિક પંડ્યા, દીપક ચહર, ટ્રેન્ટ બોલ્ટ અને જસપ્રીત બુમરાહની ફાસ્ટ બોલિંગ ચોકડીએ શાનદાર પ્રદર્શન કર્યું અને RRના બેટ્સમેનોને હાથ ખોલવાની કોઈ તક ન આપી.
