Last Update :
27 Apr 2025
IPL 2025ની 44મી મેચનું કોઈ પરિણામ ન આવી શક્યું. કોલકાતાના ઈડન ગાર્ડન્સ ખાતે પંજાબ કિંગ્સ (PBKS) અને કોલકાતા નાઈટ રાઇડર્સ (KKR) વચ્ચે મુકાબલો થયો હતો. ટોસ જીતીને પ્રથમ બેટિંગ કરતા PBKSની ટીમે 20 ઓવરમાં 4 વિકેટ ગુમાવીને 201 રન બનાવ્યા હતા. PBKS તરફથી પ્રભસિમરન સિંહે 83 અને પ્રિયાંશ આર્યએ 69 રન બનાવ્યા હતા. જવાબમાં, ટાર્ગેટ ચેઝ કરવા આવેલી KKRની ટીમને ફક્ત એક જ ઓવર રમવાની તક મળી. આ પછી વરસાદને કારણે મેચ રોકવી પડી. વરસાદ બંધ થાય તેની લગભગ દોઢ કલાક રાહ જોવામાં આવી, પરંતુ તેનો કોઈ ફાયદો ન થયો. અંતે, રાત્રે 11 વાગ્યે, મેચ રદ્દ કરવાની જાહેરાત કરવામાં આવી.
GSTVની એપ્લિકેશન ડાઉનલોડ કરો
વરસાદે મેચ બગાડી
જ્યારે KKRની ટીમ PBKSના સ્કોરને ચેઝ કરવા માટે ઉતરી ત્યારે હવામાન ખરાબ થવા લાગ્યું હતું. KKRની ઓપનિંગ જોડીએ એક ઓવર રમી હતી ત્યારે જ મેદાન પર વાવાઝોડું આવ્યું અને વરસાદ શરૂ થઈ ગયો. વાવાઝોડું એટલું જોરદાર હતું કે ગ્રાઉન્ડ સ્ટાફને કવરથી મેદાનને ઢાંકવા માટે સખત મહેનત કરવી પડી. ભારે પવનને કારણે કેટલાક કવર ફાટી ગયા અને કેટલાક બાઉન્ડ્રી તરફ ઉડી ગયા. લગભગ 1 કલાક અને 30 મિનિટ રાહ જોયા પછી, મેચ રદ્દ જાહેર કરવામાં આવી અને PBKS અને KKRને એક-એક પોઈન્ટ આપવામાં આવ્યો. આ મેચ પછી પોઈન્ટ્સ ટેબલ બદલાઈ ગયું છે. ચાલો જાણીએ કે PBKS અને KKR વચ્ચેની મેચ રદ્દ થયા પછી પોઈન્ટ્સ ટેબલમાં કઈ ટીમ ક્યાનંબર પર છે.
કઈ ટીમ કયા સ્થાન પર છે?
KKR અને PBKSની મેચ રદ્દ થયા બાદ પોઈન્ટ્સ ટેબલમાં મોટો ફેરફાર થયો છે. ગુજરાત ટાઈટન્સ (GT) ની ટીમ 12 પોઈન્ટ સાથે પ્રથમ સ્થાને છે. આ પછી, દિલ્હી કેપિટલ્સ (DC) અને રોયલ ચેલેન્જર્સ બેંગલુરુ (RCB) ની ટીમો અનુક્રમે બીજા અને ત્રીજા સ્થાને છે. બંનેના 12-12 પોઈન્ટ છે. IPL 2025ની 44મી મેચ વરસાદને કારણે રદ્દ થઈ ગઈ, પરંતુ તેનાથી PBKSને ફાયદો થયો છે. PBKSના હવે 11 પોઈન્ટ છે અને તે મુંબઈ ઈન્ડિયન્સ (MI) ને પાછળ છોડીને ચોથા સ્થાને પહોંચી ગયું છે. આ પહેલા PBKSની ટીમ પાંચમા સ્થાને હતી. પંજાબે 9માંથી 5 મેચ જીતી છે અને 3 હારનો સામનો કરવો પડ્યો છે. વરસાદને કારણે એક મેચ રદ્દ કરવામાં આવી હતી. MI પાંચમા સ્થાને સરકી ગયું છે જ્યારે લખનૌ સુપર જાયન્ટ્સ (LSG) છઠ્ઠા સ્થાને છે.
KKRને થયું નુકસાન
KKR એક પોઈન્ટ મેળવવા છતાં 7મા સ્થાને છે. તેના હવે 7 પોઈન્ટ છે. મેચ રદ થવાથી KKRને નુકસાન થયું છે. KKR પ્લેઓફની રેસમાં પહેલાથી જ પાછળ છે અને હવે તેના માટે આગળનો રસ્તો વધુ મુશ્કેલ બની ગયો છે. પ્લેઓફમાં સ્થાન મેળવવા માટે KKRને હવે બાકીની બધી 5 મેચ જીતવી પડશે. સનરાઈઝર્સ હૈદરાબાદ (SRH) ટેબલમાં 8મા સ્થાને છે. તેના 6 પોઈન્ટ છે. આ પછી, રાજસ્થાન રોયલ્સ (RR) 4 પોઈન્ટ સાથે 9મા સ્થાને છે. ચેન્નાઈ સુપર કિંગ્સ (CSK) 4 પોઈન્ટ સાથે સૌથી નીચલા સ્થાને એટલે કે 10મા સ્થાને છે.
