Last Update :
04 Apr 2025
સનરાઈઝર્સ હૈદરાબાદ ટીમે IPL 2025માં શાનદાર શરૂઆત કરી હતી. જ્યારે તેણે તેની પહેલી જ મેચમાં રાજસ્થાન રોયલ્સને 44 રનથી હરાવ્યું હતું, પરંતુ તે પછી તેની જીતની ગાડી પાટા પરથી ઉતરી ગઈ. હૈદરાબાદના બેટ્સમેન KKR સામે ફ્લોપ સાબિત થયા. રન બનાવવાનું તો ભૂલી જાવ, બેટ્સમેન માટે ક્રીઝ પર ટકી રહેવું પણ મુશ્કેલ બની રહ્યું હતું. બેટ્સમેનોના નબળા પ્રદર્શનને કારણે ટીમ 80 રનથી હારી ગઈ.
GSTVની એપ્લિકેશન ડાઉનલોડ કરો
હૈદરાબાદને IPLમાં સૌથી મોટી હાર મળી
કોલકાતા નાઈટ રાઈડર્સ સામે 201 રનનો ટાર્ગેટ ચેઝ કરતી વખતે, હૈદરાબાદ ફક્ત 120 રનમાં ઓલઆઉટ થઈ ગયું અને 80 રનથી મેચ હારી ગયું. આ IPLમાં હૈદરાબાદનો સૌથી મોટો પરાજય છે. અગાઉ IPLમાં, હૈદરાબાદની ટીમ 2024માં ચેન્નાઈ સુપર કિંગ્સ સામે 78 રનથી હારી હતી, જે તેની સૌથી મોટી હાર હતી, પરંતુ હવે હૈદરાબાદની ટીમે તે ખરાબ રેકોર્ડને પણ પાછળ છોડી દીધો છે.
પહેલી મેચમાં 286 રન બન્યા હતા
જ્યારે સનરાઈઝર્સ હૈદરાબાદ ટીમે IPL 2015ની તેની પહેલી મેચમાં 286 રન બનાવ્યા હતા. ત્યારે તેના કેપ્ટન પેટ કમિન્સે 300થી વધુ રન બનાવવાનો સંકલ્પ લીધો હતો. ક્રિકેટ એક્સપર્ટનું પણ માનવું હતું કે હૈદરાબાદની બેટિંગ મજબૂત છે અને તે IPL 2025માં 300 રનના આંકડાને સ્પર્શી શકે છે. પરંતુ પહેલી મેચ જીત્યા પછી પણ હૈદરાબાદનું નબળું પ્રદર્શન ચાલુ રહ્યું છે. તે પછી, કેપ્ટન પેટ કમિન્સની દરેક ચાલ વિપરીત સાબિત થઈ રહી છે.
સતત ત્રણ મેચ હારી
પહેલી મેચમાં SRH ટીમે 286 રન બનાવ્યા હતા. પરંતુ તે પછી, આગામી ત્રણ મેચોમાં ટીમના બેટ્સમેન 200નો સ્કોર પણ પાર ન કરી શક્યા. ટીમ લખનૌ સુપર જાયન્ટ્સ સામે માત્ર 190 રન બનાવી શકી, જેમાં તેને પાંચ વિકેટથી હારનો સામનો કરવો પડ્યો. આ પછી, દિલ્હી કેપિટલ્સ સામે તેની સ્થિતિ વધુ ખરાબ થઈ ગઈ. જ્યારે હૈદરાબાદની ટીમ પૂરી 20 ઓવર પણ ન રમી શકી અને માત્ર 163 રનમાં ઓલઆઉટ થઈ ગઈ. આ મેચમાં તેને 7 વિકેટથી હારનો સામનો કરવો પડ્યો હતો. હવે KKR સામેની હારથી તેનો માથાનો દુખાવો વધી ગયો છે. IPLમાં સતત ત્રણ મેચ હાર્યા બાદ, SRH પોઈન્ટ્સ ટેબલમાં છેલ્લા સ્થાને પહોંચી ગઈ છે.
સ્ટાર ખેલાડીઓ નિષ્ફળ ગયા
હૈદરાબાદ પાસે ટ્રેવિસ હેડ, અભિષેક શર્મા, ઈશાન કિશન, નીતિશ કુમાર રેડ્ડી જેવા મહાન બેટ્સમેન છે, પરંતુ આ ખેલાડીઓ KKR સામેની મેચમાં સારું પ્રદર્શન ન કરી શક્યા. ટીમે પાવર પ્લેમાં જ ત્રણ વિકેટ ગુમાવી દીધી. આના કારણે તે ભારે મુશ્કેલીમાં મુકાઈ ગઈ અને આખી મેચ દરમિયાન તેમાંથી બહાર ન આવી શકી. ટીમ તરફથી હેનરિક ક્લાસેને સૌથી વધુ 33 રન બનાવ્યા હતા. તેના સિવાય કમિન્ડુ મેન્ડિસે 27 રનનું યોગદાન આપ્યું. છતાં, ટીમ 16.4 ઓવર પછી 120 રનમાં ઓલઆઉટ થઈ ગઈ હતી.
