Last Update :
04 Jul 2025
શુભમન ગિલે લીડ્સમાં રમાયેલી ટેસ્ટમાં કેપ્ટન તરીકેની પોતાની ડેબ્યુ મેચમાં 147 રનની શાનદાર ઈનિંગ રમી હતી અને બુધવારે બર્મિંઘમના એજબેસ્ટન મેદાન પર એન્ડરસન-તેંડુલકર ટ્રોફીની બીજી ટેસ્ટ મેચમાં જ્યારે તે મેદાન પર આવ્યો ત્યારે તેણે એ જ લય જાળવી રાખી અને પહેલા દિવસે 114 રન બનાવીને અણનમ પાછો ફર્યો અને આ યુવા કેપ્ટન અહીં ન અટક્યો.
GSTVની એપ્લિકેશન ડાઉનલોડ કરો
ગુરુવારે, ગિલે એવું કર્યું જે આજ સુધી કોઈ ભારતીય કે એશિયન કેપ્ટન ઈંગ્લેન્ડની ધરતી પર નથી કરી શક્યો. શુભમન ગિલે આઠ કલાક અને ૪૮ મિનિટ સુધી બેટિંગ કરી અને ઈંગ્લેન્ડના બોલરોને મુશ્કેલીમાં મુક્યા. પહેલા તેણે 311 બોલમાં 200 રનનો આંકડો પૂર્ણ કર્યો અને પછી તેણે 250 રનનો આંકડો પણ સ્પર્શ કર્યો.
અંતે, તે 387 બોલમાં 269 રન બનાવીને પવેલિયન પાછો ફર્યો. ગિલની આ ઈનિંગને કારણે ભારતે પ્રથમ ઈનિંગમાં 587 રનનો વિશાળ સ્કોર બનાવ્યો હતો. બીજા દિવસના અંત સુધીમાં, ઈંગ્લેન્ડે 3 વિકેટ ગુમાવીને 77 રન બનાવી લીધા છે. જો રૂટ 18 અને હેરી બ્રુક 30 રને અણનમ છે. ભારત માટે, આકાશ દીપે 2 વિકેટ લીધી છે અને સિરાજે 1 વિકેટ લીધી છે.
દિગ્ગજોને પાછળ છોડી દીધા
ગિલે જોશ ટંગના બોલ પર ડીપ ફાઈન લેગ તરફ દોડીને પોતાની પ્રથમ ટેસ્ટ બેવડી સદી પૂર્ણ કરી. ગિલે તેની 200 રનની ઈનિંગમાં 311 બોલનો સામનો કર્યો અને 21 ચોગ્ગા અને 2 છગ્ગા ફટકાર્યા હતા. આ બેવડી સદી કેપ્ટન તરીકે તેની પ્રથમ અને ખૂબ જ યાદગાર ઈનિંગ બની ગઈ છે.
આ સિદ્ધિ સાથે, શુભમન ગિલ મન્સૂર અલી ખાન પટૌડી, સુનીલ ગાવસ્કર, સચિન તેંડુલકર અને એમએસ ધોનીની પ્રતિષ્ઠિત યાદીમાં જોડાઈ ગયો છે, જેમણે ભારત માટે કેપ્ટન તરીકે ટેસ્ટમાં બેવડી સદી ફટકારી છે. ગિલ પહેલા, ભારતીય કેપ્ટન તરીકે SENA (સાઉથ આફ્રિકા, ઇંગ્લેન્ડ, ન્યુઝીલેન્ડ, ઓસ્ટ્રેલિયા) દેશોમાં સૌથી વધુ સ્કોર મોહમ્મદ અઝહરુદ્દીનના નામે હતો, જેમણે 1990માં ઓકલેન્ડમાં ન્યુઝીલેન્ડ સામે 192 રન બનાવ્યા હતા.
અઝહરુદ્દીનનો ઈંગ્લેન્ડમાં કેપ્ટન તરીકેનો સૌથી વધુ સ્કોર 179 રન (માન્ચેસ્ટર, 1990) હતો, જેને હવે ગિલે વટાવી દીધો છે. અગાઉ, ગિલે લીડ્સમાં કેપ્ટન તરીકેની પોતાની ડેબ્યુ મેચમાં 147 રન બનાવ્યા હતા અને હવે એજબેસ્ટનમાં બેવડી સદી ફટકારીને, તેણે સાબિત કર્યું છે કે ભારતીય ટેસ્ટ ટીમની કમાન એક વિશ્વસનીય અને મજબૂત બેટ્સમેનના હાથમાં છે. શુભમન ગિલ ઈંગ્લેન્ડમાં બેવડી સદી ફટકારનાર ભારતનો ત્રીજો બેટ્સમેન બન્યો છે. તેની પહેલા, આ સિદ્ધિ ફક્ત સુનીલ ગાવસ્કર અને રાહુલ દ્રવિડે મેળવી હતી.
જાડેજા સાથે ઐતિહાસિક પાર્ટનરશિપ
ગિલ સિવાય, રવિન્દ્ર જાડેજાએ 89 રનની શાનદાર ઈનિંગ રમી અને ભારતીય ટીમને વિશાળ સ્કોર સુધી પહોંચવાનો પાયો નાખ્યો. ઈંગ્લેન્ડના ફાસ્ટ બોલરોને પીચ પરથી કોઈ મદદ નહતી મળી રહી, જેનો ફાયદો ઉઠાવતા ગિલ અને જાડેજાએ છઠ્ઠી વિકેટ માટે 203 રનની પાર્ટનરશિપ કરી. ભારતે બીજા દિવસની શરૂઆત પાંચ વિકેટે 310 રનથી કરી અને સવારના સેશનમાં 25 ઓવરમાં 109 રન ઉમેર્યા અને જાડેજાના રૂપમાં એક વિકેટ ગુમાવી.
બીજા દિવસે, વોશિંગ્ટન સુંદર ફિફ્ટી ચૂકી ગયો. તેણે 103 બોલમાં 42 રન બનાવ્યા. આકાશ દીપે 6 અને મોહમ્મદ સિરાજે 8 રન બનાવ્યા. પ્રસિદ્ધ કૃષ્ણા 5 રન બનાવી અણનમ રહ્યો હતો સ્પિનર શોએબ બશીરને 3 સફળતા મળી. જોશ ટંગ અને ક્રિસ બોક્સે 2-2 વિકેટ લીધી હતી.
ઈંગ્લેન્ડે પોતાની પહેલી ઈનિંગ બેઝબોલ સ્ટાઇલમાં શરૂ કકરી અને આકાશ દીપની પહેલી ઓવરમાં 12 રન બનાવ્યા. જોકે, ઈનિંગની ત્રીજી ઓવરમાં, આકાશે ઈંગ્લેન્ડને સતત 2 ઝટકા આપ્યા. બેન ડકેટ અને ઓલી પોપ પોતાનું ખાતું પણ ન ખોલી શક્યા. 8મી ઓવરમાં, સિરાજે ઓપનર જેક ક્રોલીને સ્લિપમાં કરુણ નાયરના હાથે કેચ આઉટ કરાવ્યો. ક્રોલીએ 30 બોલમાં 19 રનની ઈનિંગ રમી હતી.
