Last Update :
10 Mar 2025
ટીમ ઈન્ડિયાએ ચેમ્પિયન્સ ટ્રોફી 2025નો ખિતાબ જીત્યો છે. ટ્રોફી જીત્યા બાદ ભારતને કરોડો રૂપિયાની ઈનામી રકમ મળી છે. ફાઈનલમાં ભારતની ટક્કર ન્યુઝીલેન્ડ સામે થઈ હતી. હારવા છતાં ન્યુઝીલેન્ડને મોટી રકમ મળી છે. સેમીફાઈનલમાં પહોંચનારી ટીમોને પણ ઈનામ આપવામાં આવ્યું છે. રોહિત શર્માની કેપ્ટનશિપ હેઠળની ટીમ ઈન્ડિયાને લગભગ 20 કરોડ રૂપિયા મળ્યા છે.
GSTVની એપ્લિકેશન ડાઉનલોડ કરો
રવિવારે રમાયેલી ફાઈનલ મેચમાં ભારતે ન્યુઝીલેન્ડને 4 વિકેટે હરાવ્યું હતું. ટીમ ઈન્ડિયાને 252 રનનો ટાર્ગેટ મળ્યો હતો. તેણે 49 ઓવરમાં આ ટાર્ગેટ ચેઝ કરી લીધો હતો. ભારતને આ ટ્રોફી જીતવા બદલ 2.24 મિલિયન ડોલર એટલે કે લગભગ 20 કરોડ રૂપિયા મળ્યા છે. જ્યારે ન્યુઝીલેન્ડને ફાઈનલમાં હારવા છતાં મોટી રકમ મળી છે. તેમને 1.12 મિલિયન ડોલર (લગભગ 9.74 કરોડ રૂપિયા) ની ઈનામી રકમ મળી છે.
સેમીફાઈનલમાં હારેલી ટીમોને પણ મળ્યું ઈનામ
ICC એ સેમીફાઈનલમાં હારેલી ટીમોને પણ ઈનામી રકમ આપી છે. ભારતે ઓસ્ટ્રેલિયાને હરાવ્યું હતું અને ન્યુઝીલેન્ડે સેમીફાઈનલમાં સાઉથ આફ્રિકાને હરાવ્યું હતું. આ બંને ટીમોને સમાન રકમ મળી છે. બંને ટીમોને લગભગ 4.87 કરોડ રૂપિયા મળ્યા છે.
અફઘાનિસ્તાન અને બાંગ્લાદેશને પણ પૈસા મળ્યા
અફઘાનિસ્તાન અને બાંગ્લાદેશની ટીમો ગ્રુપ સ્ટેજ સુધી મર્યાદિત હતી. જોકે, બંનેને પણ ઈનામી રકમ મળી છે. બાંગ્લાદેશ અને અફઘાનિસ્તાનને લગભગ 3 કરોડ રૂપિયા મળ્યા છે. ટૂર્નામેન્ટમાં સાતમા અને આઠમા ક્રમે રહેલી ટીમો, પાકિસ્તાન અને ઈંગ્લેન્ડને પ્રતિ ટીમ લગભગ 1.22 કરોડ રૂપિયા મળ્યા છે.
ટૂર્નામેન્ટમાં ભારતનું પ્રદર્શન
ભારતે ચેમ્પિયન્સ ટ્રોફી 2025માં શાનદાર પ્રદર્શન કર્યું હતું. તેને એક પણ મેચમાં હારનો સામનો નથી કરવો પડ્યો. ભારતે ગ્રુપ સ્ટેજની મેચોમાં બાંગ્લાદેશ, પાકિસ્તાન અને ન્યુઝીલેન્ડને હરાવ્યા હતા. ટીમ ઈન્ડિયાએ સેમીફાઈનલમાં ઓસ્ટ્રેલિયાને હરાવ્યું હતું. આ પછી, ફાઈનલમાં ન્યુઝીલેન્ડને હરાવીને ટાઈટલ જીત્યું હતું.
