Last Update :
21 Jun 2025
ટીમ ઈન્ડિયા શુભમન ગિલના નેતૃત્વમાં ઈંગ્લેન્ડમાં 5 મેચની ટેસ્ટ સિરીઝ રમી રહી છે. સિરીઝની પહેલી મેચ 20 જૂનથી લીડ્સમાં શરૂ થઈ ગઈ છે. પહેલા દિવસે ભારતીય બેટ્સમેનોએ શાનદાર પ્રદર્શન કર્યું. કેપ્ટન શુભમન ગિલ અને યશસ્વી જયસ્વાલે પહેલા જ દિવસે સદી ફટકારી હતી, જયસ્વાલ 101 રન બનાવીને આઉટ થયો હતો, તો બીજી તરફ શુભમન ગિલ 127 રન બનાવીને અણનમ છે. હવે સદી ફટકાર્યા બાદ શુભમનનું ટેન્શન વધી રહ્યું હોય તેવું લાગે છે, કારણ કે લીડ્સ ટેસ્ટના પહેલા દિવસે ગિલે ICCના નિયમનું ઉલ્લંઘન કર્યું હતું. જેના માટે તેને ટૂંક સમયમાં સજા મળી શકે છે.
GSTVની એપ્લિકેશન ડાઉનલોડ કરો
ગિલે આ ICC નિયમ તોડ્યો
શુભમન ગિલ લીડ્સ ટેસ્ટના પહેલા દિવસે કાળા મોજા પહેરીને રમતા જોવા મળ્યો હતો, જ્યારે ટેસ્ટ ક્રિકેટમાં કાળા નહીં પણ સફેદ મોજા પહેરવાનો નિયમ છે. મેરીલેબોન ક્રિકેટ ક્લબે આ નિયમ બનાવ્યો હતો જેને ICC દ્વારા ટેસ્ટ ક્રિકેટમાં લાગુ કરવામાં આવ્યો હતો. હવે ICC શુભમન ગિલને ડ્રેસ કોડનું ઉલ્લંઘન કરવા બદલ દંડ ફટકારી શકે છે. શુભમન ગિલના કાળા મોજા પહેર્યાની તસવીર પણ સોશિયલ મીડિયા પર વાયરલ થઈ રહી છે. જોકે, આ મામલે ICC તરફથી હજુ સુધી કોઈ નિવેદન નથી આવ્યું.
https://twitter.com/SkyCricket/status/1936048650645356688
ગિલે શાનદાર સદી ફટકારી
શુભમન ગિલ ટેસ્ટ ટીમના કેપ્ટન બન્યા પછી પોતાની પહેલી ટેસ્ટ મેચ રમી રહ્યો છે. ગિલે કેપ્ટનશિપ ડેબ્યુ કરતી વખતે પહેલી જ મેચમાં શાનદાર સદી ફટકારી હતી. આ સાથે, ગિલ હવે વિરાટ કોહલી પછી ટેસ્ટ ક્રિકેટમાં કેપ્ટનશિપ ડેબ્યુ કરતી વખતે સદી ફટકારનાર ચોથો ભારતીય ખેલાડી બની ગયો છે. આ ઉપરાંત, ગિલે ટેસ્ટ ક્રિકેટમાં પોતાના 2 હજાર રન પણ પૂરા કર્યા છે.
પ્રથમ દિવસની રમતના અંત સુધીમાં, ટીમ ઈન્ડિયા સારી સ્થિતિમાં હતી. ટીમ ઈન્ડિયાએ 3 વિકેટ ગુમાવીને પ્રથમ દિવસે 359 રન બનાવ્યા હતા. ભારતને પહેલા દિવસે કેએલ રાહુલ, યશસ્વી જયસ્વાલ અને સાઈ સુદર્શનના રૂપમાં 3 ઝટકા લાગ્યા હતા. વાઈસ-કેપ્ટન રિષભ પંતે પણ અડધી સદી ફટકારી છે. હવે બીજા દિવસે ટીમ ઈન્ડિયા તરફથી વધુ એક સદી આવશે કે નહીં તે જોવું રસપ્રદ રહેશે.
