Last Update :
20 May 2025
અરૂણ દેવ હવે આકાશમાંથી આગ ઓકી રહ્યાં છે. બપોરે ઘરથી બહાર નીકળો તો એવું લાગે જાણે ત્વચા તતડી ઉઠશે. આમ છતાં કામ માટે ઘરથી બહાર તો નીકળવું જ પડે. આવી સ્થિતિમાં કરવું શું? આનો જવાબ છે ઊનાળામાં સૌથી પહેલા તમારો વૉર્ડરોબ બદલો. આ ઋતુમાં તમારા સિન્થેટિક કે સિલ્કના વસ્ત્રો કબાટના એક અલગ ખાનામાં મૂકી દો. અને ગરમીને અનુરૂપ પોશાક પહેરો. જેમ કે કોટન,લીનન,ખાદી ઇત્યાદિ.
GSTVની એપ્લિકેશન ડાઉનલોડ કરો
નિષ્ણાતો કહે છે કે હળવા રંગના સુતરાઉ, ખાદી, લીનન જેવા ફેબ્રિકના વસ્ત્રો ગરમીમાં ઘણી રાહત આપે છે. આ પ્રકારના કપડાંમાંથી હવાની અવરજવર થઇ શક્તી હોવાથી પરસેવો પ્રમાણમાં ઓછો થાય છે. અને થાય તોય તે કપડાંની અંદર સંઘરાઇ નથી રહેતો. સ્વાભાવિક રીતે જ આપણને તેને કારણે પરસેવાની અકળામણ અને ગંધમાંથી રાહત મળે છે. વળી આ પ્રકારના વસ્ત્રો પહેરતી વખતે ફેશન સાથે ખાસ કોઇ બાંધછોડ નથી કરવી પડતી. આ બધા ફેબ્રિકમાં પણ તમને ટ્રેન્ડી પેટર્ન મળી રહે છે. તેથી આ બાબતે ફેશનેબલ માનુનીઓ પણ એકદમ નચિંત બની શકે છે.નિષ્ણાતો કોલેજ કન્યાઓને આ બાબતે સલાહ આપતાં કહે છે કે જરૂરી નથી કે તમે કોલેજમાં ડેનિમ અને ટી-શર્ટ કે ક્રોપ ટોપ જ પહેરો. તમે લીનની પેન્ટ પર પણ ક્રોપ ટોપ પહેરી શકો. તે તમને આધુનિક લુક આપવા સાથે કમ્ફર્ટ પણ આપશે. તેવી જ રીતે તમે ક્રોપ ટોપ સાથે કોટનનું ખુલતું સ્કર્ટ પણ પહેરી શકો. તે લીનનની પેન્ટ કરતાં પણ વધું કમ્ફર્ટેબલ લાગશે.વળી પલાઝોની ફેશન તો યથાવત્ છે જ.
આ દિવસોમાં સવારના ૧૦-૧૧ વાગે પણ આકરો તડકો લાગે છે. તેથી જો તમે ઘરની બહાર નીકળો તો સૌથી પહેલા ત્વચા પર સનસ્ક્રીન લોશન અચૂક લગાવો. તેનાથી તમારી ચામડી કાળી પડતી અટકશે. આ સિવાય માથે સ્કાર્ફ બાંધો અથવા હેટ પહેરો. આજે બજારમાં અનેક જાતના સ્કાર્ફ મળે છે. તમે વિવિધ રંગ-ડિઝાઇનના બેથી ત્રણ સ્કાર્ફ ખરીદી રાખીને તમારા પોશાક સાથે તેને મિક્સ એન્ડ મેચ કરીને પહેરી શકો છો.આ જ સ્કાર્ફ સાંજના સમયે વિવિધ રીતે ગાંઠ બાંધીને પહેરવાથી તમે સ્ટાઇલિશ દેખાશો. તમે ચાહો તો માથા સાથે ચહેરા પર પણ સ્કાર્ફ બાંધી શકો છો. તેની સાથે આંખો પર ગોગલ્સ ચડાવી દો. આટલું કરવાથી તમને બળબળતી ગરમીમાં પ્રમાણમાં ઘણી રાહત મળશે.
જોકે આ દિવસોમાં કાળા ચશ્મા પહેર્યા વિના ઘરથી બહાર નીકળવાની ભૂલ કરવા જેવી નથી. સૂર્યના પારાજાંબલી કિરણો તમારી આંખોને નુક્સાન પહોંચાડી શકે છે. વળી તમારી આંખો નીચે કાળા કુંડાળા પણ ઝડપથી આવી શકે છે. તેથી નેણ અને તેની આસપાસનો ભાગ સારી રીતે ઢંકાઇ જાય એવા ગોગલ્સ પહેર્યા પછી જ ઘરથી બહાર નીકળો.
ઊનાળામાં પુષ્કળ પરસેવો થતો હોવાથી જો તમે સ્પોર્ટ્સ શૂઝ કે બંધ પગરખાં પહેરશો તો થોડાં કલાકમાં જ તમે અકળઆઇ ઉઠશો. આવી સ્થિતિને પહોંચી વળવા સ્ટ્રેપવાળા સેંડલ અથવા ગ્લેડિયેટર્સ પહેરો. બજારમાં આ પ્રકારના પગરખાંમાં પણ ઘણી સરસ વિવિધતા જોવા મળે છે. મહત્વની વાત એ છે કે આવા સેંડલ શોર્ટ્સ સાથે પણ ખૂબ જચે છે. જોકે ઘણી યુવતીઓ પગની ત્વચાને તડકાથી કાળી થતી બચાવવા સેંડલ સાથે પણ મોજાં પહેરે છે. પરંતુ તમે જ્યારે સેંડલ સાથે મોજાં પહેરો ત્યારે તે તમારા સેંડલને અનુરૂપ હોય તેની ખાસ કાળજી રાખો. અથવા સ્કીન કલરના મોજાં પહેરો.
