Last Update :
27 Mar 2025
ઉત્તરપ્રદેશમાંથી એક અનોખો કિસ્સો સામે આવ્યો છે. અહીં એક પતિને તેની પત્નીના અફેર વિષે ખબર પડતા તેણે જાતે જ પત્નીના તેના પ્રેમી સાથે લગ્ન કરાવી દીધા હતા. મજાની વાત એ છે કે આ મહિલા બે બાળકોની માતા પણ છે.
GSTVની એપ્લિકેશન ડાઉનલોડ કરો
ઉત્તરપ્રદેશના સંત કબીર નગરના બબલુના લગ્ન 2017 માં ભૂલન ચક ગામની રાધિકા સાથે થયા હતા. તેમનું લગ્નજીવન સામાન્ય રીતે ચાલી રહ્યું હતું અને તેમને બે બાળકો પણ હતા - એક 7 વર્ષનો પુત્ર અને 2 વર્ષની પુત્રી. જ્યારે બબલુ રોજીરોટી કમાવવા માટે બહાર ગયો, ત્યારે રાધિકાને તે જ ગામના એક યુવાન વિકાસ સાથે પ્રેમ થઈ ગયો.
પતિએ પત્નીએ સમજાવી
જ્યારે બબલુને આ સંબંધની ખબર પડી ત્યારે તેણે રાધિકાને મનાવવાનો પ્રયાસ કર્યો. પણ રાધિકાએ સ્પષ્ટ કહ્યું કે તે હવે વિકાસ સાથે રહેવા માંગે છે. પત્નીની ઇચ્છા જોઈને, બબલુએ ગામના વડીલો સાથે સલાહ લીધી અને નક્કી કર્યું કે બંનેના લગ્ન થઈ જવા જોઈએ જેથી કંઈ અપ્રિય ન બને.
શિવ મંદિરમાં થયા લગ્ન
બબલુ પોતે રાધિકા અને વિકાસને ધનઘાટા તાલુકામાં લઈ ગયો અને સોગંદનામું કરાવ્યા પછી, તેની પત્નીને તેના પ્રેમીને સોંપી દીધી. આ પછી, બંનેના લગ્ન ધનઘાટા સ્થિત શિવ મંદિરમાં થયા. આ લગ્નમાં ગામના લોકોએ પણ ભાગ લીધો હતો.
સોશિયલ મીડિયા પર વીડિયો વાયરલ થયો
લગ્નનો વીડિયો સોશિયલ મીડિયા પર વાયરલ થઈ રહ્યો છે. વીડિયોમાં, રાધિકા વાદળી સાડી પહેરેલી અને માથે ઓઢીને ઉભેલી જોવા મળે છે અને વિકાસ પણ આ વીડિયોમાં ખુશ જોવા મળી રહ્યો છે. આ દરમિયાન બબલુ પણ ત્યાં હાજર હતો, પરંતુ તેની પત્નીથી અલગ થવાનું દુઃખ તેના ચહેરા પર સ્પષ્ટ દેખાઈ રહ્યું હતું.
સોશિયલ મીડિયા પર લોકોની પ્રતિક્રિયા
સોશિયલ મીડિયા પર આ વીડિયો પર મિશ્ર પ્રતિક્રિયાઓ જોવા મળી રહી છે. કેટલાક લોકોએ પતિના આ પગલાની પ્રશંસા કરી. તેમણે કહ્યું કે બબલુએ ડહાપણ બતાવ્યું અને મેરઠ અને ઔરૈયામાં જે બન્યું તેના જેવી કોઈપણ ગુના કે હત્યાની પરિસ્થિતિ ટાળી. તે જ સમયે, કેટલાક લોકોએ બાળકો વિશે ચિંતા વ્યક્ત કરી. તેમણે પ્રશ્ન ઉઠાવ્યો કે હવે બાળકોને તેમની માતાનો પ્રેમ કેવી રીતે મળશે અને તેઓ આ પરિસ્થિતિને કેવી રીતે સમજશે.
કેટલાક લોકોએ પતિ પ્રત્યે સહાનુભૂતિ વ્યક્ત કરી અને તેમના ધૈર્યની પ્રશંસા કરી, જ્યારે કેટલાક લોકોએ કહ્યું કે આ એક એવું પગલું હતું જે સમાજના મૂલ્યો પર પ્રશ્ન ઉઠાવે છે. હવે આ મામલો સોશિયલ મીડિયા પર ચર્ચાનો વિષય બની ગયો છે, જ્યાં લોકો તેને પ્રેમ અને સંબંધોની નવી વ્યાખ્યા તરીકે ગણી રહ્યા છે.
