શતરંગ / ઇન્ટરનેશનલ સ્પેસ સ્ટેશન ઉપર અટવાઈ પડેલું બોઇંગ સ્ટારલાઈનર: ભાગ 1

- વિજ્ઞાન વિહાર

રશિયા અને યુક્રેન વચ્ચે છેલ્લા બે વર્ષથી સતત યુદ્ધ ચાલી રહ્યું છે અને બીજા વિશ્વયુદ્ધ પછી કદાચ પહેલી વખત આવી રીતે આટલા મોટા પાયે અને આટલા લાંબા સમય સુધી યુરોપની ભૂમિ ઉપર યુદ્ધના કાળા વાદળો છવાઈ રહયા છે. જો કે 2022માં તો રશિયાએ વિધિવત રીતે યુક્રેનમાં સૈન્ય કાર્યવાહી કરી આક્રમણ કર્યું. આ યુદ્ધના પડઘમ તો એ પહેલા ઘણા વર્ષોથી વાગી રહ્યા હતા. શરૂઆત થયેલી 2014ના ફેબ્રુઆરી મહિનામાં જ્યારે રેવોલ્યૂશન ઓફ ડીગ્નીટી એટલે કે ગૌરવ ક્રાંતિ નામે યુક્રેનમાં ચાલી રહેલી રાજકીય ઉથલ પાથલમાં દરમિયાનગીરી કરી રશિયાએ ક્રાઇમિયા પ્રદેશમાં આક્રમણ કર્યું અને એ પ્રદેશને યુક્રેનથી અલગ કરી દીધો. ત્યારથી શરુ થયેલી અથડામણો અને સંઘર્ષ અંતે છેલ્લા બે વર્ષમાં સંપૂર્ણ યુદ્ધમાં ફેરવાઈ ગયા અને તેના પરિણામ સ્વરૂપ   બદલાયેલા જીઓપોલિટિક્લ સમીકરણો અને આંતરરાષ્ટ્રીય તણાવ આજે આખી દુનિયાને અસર કરી રહ્યા છે. જો કે આજે આપણે આ જીઓપોલિટિક્લ સમીકરણો નહિ પણ રુસો-યુક્રેન સંઘર્ષના પરિણામે એક આંતરરાષ્ટ્રીય વૈજ્ઞાનિક પ્રોજેક્ટમાં થયેલા બદલાવ અને તેની વર્તમાનમાં થતી અસરો વિશે વાત કરીએ.