શતરંગ / ગુરુ-પૂર્ણિમા: જેટલો ગુરુનો મહિમા, એટલી જ ગુરુની જવાબદારી પણ

- વિજ્ઞાન વિહાર

અમેરિકાના મિનેસોટા રાજ્યના રોસેસ્ટર શહેરમાં રહેતો એક 14 વર્ષનો છોકરો. નામ ઈથન મેન્યુઅલ. રોસેસ્ટર સેન્ટ્રલ લુથરન નામની સ્કૂલમાં આંઠમાં ધોરણમાં અભ્યાસ કરતો હતો. એક વખત તેના ટીચર મિસિસ ઓમલેન્ડે તેને સ્કુલના વિજ્ઞાન મેળા માટે એક પ્રોજેક્ટ બનાવવા કહ્યું. ઈથને નક્કી કર્યું કે તે તેના ટોય-રૂમમાં પડેલા કેટલાક પ્લાસ્ટિકના ઇન્સેક્ટ્સને પૈડાની જગ્યાએ માત્ર વાઈબ્રેશન્સ એટલે કે ધ્રુજારી ઉત્પન્ન કરાવીને સરીસૃપ પ્રાણીઓની જેમ ચલાવશે અને તેમની મૂવમેન્ટ કંટ્રોલ કરશે. આ માટે તેણે કેટલાક અળસિયા જેવા પ્લાસ્ટિકના રમકડાના બગ્સ શોધી કાઢ્યા. હવે વાઇબ્રેશન ઉત્પન્ન કરવા માટે બેટરીની જરૂર પડી. ઈથન ચાર વર્ષનો હતો ત્યારથી તેને સાંભળવાની તકલીફ હોવાથી ડાબા કાનમાં ધ્વનિ યંત્ર (hearing aid) યુઝ કરતો હતો. આ ધ્વનિ યંત્ર માટે સામાન્ય રીતે ઝીંક-એર બેટરી વપરાય એટલે તેના ઘરે એ બેટરીનો સ્ટોક સારા એવા પ્રમાણમાં રહેતો. માટે તેણે પોતાના પ્રોજેક્ટ માટે પણ આ જ બેટરી વાપરવાનું નક્કી કર્યું.