Last Update :
08 Feb 2025
સાઉદી અરેબિયાએ તેના વિઝા નિયમોમાં ફેરફાર કર્યો છે જેની અસર ભારત સહિત 14 દેશો પર પડશે. બદલાયેલા વિઝા નિયમો 1 ફેબ્રુઆરી 2025થી અમલમાં આવ્યા છે, જે અંતર્ગત આ દેશોમાંથી આવતા પ્રવાસીઓને રાજ્યમાં પ્રવેશવા માટે માત્ર સિંગલ એન્ટ્રી વિઝા મળશે. સાઉદીએ તેના વિઝા નિયમોમાં ફેરફાર કર્યો છે જેથી લાંબા ગાળાના વિઝા સાથે દેશમાં આવતા લોકો અનધિકૃત રીતે હજ યાત્રા ન કરી શકે.
GSTVની એપ્લિકેશન ડાઉનલોડ કરો
સાઉદી અરેબિયાના મલ્ટીપલ એન્ટ્રી વિઝા ધરાવતા લોકો હજ દરમિયાન હજ પરમિટ વિના અનધિકૃત રીતે હજ કરે છે, જેના કારણે પવિત્ર શહેર મક્કામાં ભીડ વધે છે. તેનાથી સાઉદી અધિકારીઓની માથાનો દુખાવો વધી જાય છે.
સિંગલ એન્ટ્રી વિઝા વ્યક્તિને માત્ર એક જ વાર દેશમાં પ્રવેશવાની મંજૂરી આપે છે, જ્યારે મલ્ટિપલ એન્ટ્રી વિઝા એ લાંબા ગાળાના વિઝા છે જે વિઝા ધારકને તે દેશની ઘણી વખત મુલાકાત લેવાની મંજૂરી આપે છે.
જેની અસર 14 દેશો થશે
સાઉદી અરેબિયાના વિઝા નિયમોમાં ફેરફારથી જે 14 દેશોને અસર થશે તેમના નામ અલ્જીરિયા, બાંગ્લાદેશ, ઇજિપ્ત, ઇથોપિયા, ભારત, ઇન્ડોનેશિયા, ઇરાક, જોર્ડન, મોરોક્કો, નાઇજીરિયા, પાકિસ્તાન, સુદાન, ટ્યુનિશિયા અને યમન છે.
તેના વિઝા નિયમોમાં ફેરફારના ભાગ રૂપે, સાઉદી અરેબિયાએ આ દેશોમાંથી પર્યટન, વ્યવસાય અને પરિવારની મુલાકાત માટે આવતા લોકો માટે એક વર્ષના મલ્ટિપલ એન્ટ્રી વિઝા અનિશ્ચિત રૂપે સ્થગિત કર્યા છે.
આ તમામ 14 દેશો એવા દેશો છે જ્યાંથી મોટાભાગના લોકો હજ યાત્રા અથવા ઉમરાહ માટે સાઉદી અરેબિયાના પવિત્ર શહેરો મક્કા અને મદીના જાય છે.
સાઉદી વિઝા નીતિમાં મોટા ફેરફારો-
બદલાયેલા નિયમો અનુસાર, અસરગ્રસ્ત દેશોમાંથી આવતા પ્રવાસીઓ સિંગલ એન્ટ્રી વિઝા માટે જ અરજી કરી શકે છે. આ વિઝા 30 દિવસ માટે માન્ય રહેશે અને પ્રવાસીઓ સાઉદીમાં વધુમાં વધુ 30 દિવસ જ રહી શકશે. જો કે, હજ, ઉમરાહ, રાજદ્વારી અને નિવાસ વિઝા પર આ ફેરફારથી કોઈ અસર થશે નહીં.
સાઉદી અધિકારીઓનું કહેવું છે કે મલ્ટીપલ વિઝા એન્ટ્રીનો દુરુપયોગ કરવામાં આવી રહ્યો છે. કેટલાક પ્રવાસીઓ લાંબા ગાળાના વિઝા પર દેશમાં આવતા હતા અને બાદમાં સાઉદી અરેબિયામાં હજ કરવા અથવા કામ કરવા માટે અનધિકૃત સમયગાળા માટે રોકાયા હતા.
હજમાં ભીડ જોઈને પગલું ભરવું પડ્યું
સાઉદી અરેબિયા હજમાં વધુ ભીડને નિયંત્રિત કરવા માટે કડક પગલાં લે છે. આ માટે તેણે દરેક દેશ માટે હજ ક્વોટા નક્કી કર્યો છે. દર વર્ષે, તે દેશમાંથી એટલી જ સંખ્યામાં મુસ્લિમો તેમને મળેલા ક્વોટા અનુસાર હજ માટે મક્કા જાય છે.
તાજેતરના વર્ષોમાં, હજ દરમિયાન મક્કામાં ભીડ એક મોટી સમસ્યા બની ગઈ છે કારણ કે ઘણા લોકો હજ પરમિટ વિના હજ માટે જાય છે. ગયા વર્ષે, હજ દરમિયાન, 1,200 થી વધુ હજયાત્રીઓ સખત ગરમી અને સૂર્યના કારણે મૃત્યુ પામ્યા હતા. મૃતકોમાં મોટાભાગના અનધિકૃત હજ યાત્રીઓ હતા જેઓ પરમિટના અભાવે સાઉદી સરકાર દ્વારા કરવામાં આવેલી હજ તૈયારીઓનો લાભ લઈ શક્યા ન હતા અને ગરમીથી મૃત્યુ પામ્યા હતા.
આટલી મોટી સંખ્યામાં હાજીઓના મૃત્યુને કારણે સાઉદી અરેબિયાની ઘણી ટીકા થઈ રહી છે, જેને ધ્યાનમાં રાખીને કિંગડમ આ હજમાં આવી કોઈ દુર્ઘટનાને રોકવા માટે તૈયારીઓ શરૂ કરી દીધી છે. આ ક્રમમાં હજ દરમિયાન અનધિકૃત યાત્રાળુઓને રોકવા માટે મલ્ટિપલ એન્ટ્રી વિઝા સસ્પેન્ડ કરવામાં આવ્યા છે.
સાઉદી સરકારને આશા છે કે વિઝાના નિયમોમાં ફેરફારથી માત્ર અધિકૃત હજયાત્રીઓ જ હજ કરી શકશે, જેનાથી શહેરમાં ભીડ ઓછી થશે અને દરેક વ્યક્તિ ગરમીથી બચવા માટે કરાયેલી વ્યવસ્થાનો લાભ લઈ શકશે.
સાઉદી અધિકારીઓએ મલ્ટીપલ એન્ટ્રી વિઝાના સસ્પેન્શનને કામચલાઉ ગણાવ્યું છે. આ સસ્પેન્શન ક્યાં સુધી ચાલુ રહેશે તે હજુ સ્પષ્ટ નથી.
