ઇઝરાયેલે હમાસના આ ટોપ કમાન્ડરને ઠાર કર્યો, ખુદ વડાપ્રધાન નેતન્યાહૂએ આપી માહિતી

ઇઝરાયલી વડાપ્રધાન બેન્જામિન નેતન્યાહૂએ બુધવારે જાહેરાત કરી હતી કે ઇઝરાયલી સેનાએ હમાસના વડા અને સંગઠનના નેતા યાહ્યા સિનવારના નાના ભાઈ મોહમ્મદ સિનવારને મારી નાખ્યો છે. આ કાર્યવાહી ખાન યુનિસમાં યુરોપિયન હોસ્પિટલ નજીક એક સુરંગમાં કરવામાં આવી હતી, જ્યાં ઇઝરાયલી સંરક્ષણ દળે હવાઈ હુમલો કર્યો હતો.

GSTVની એપ્લિકેશન ડાઉનલોડ કરો

   

નેતન્યાહૂએ તેમના નિવેદનમાં કહ્યું હતું કે, "મોહમ્મદ સિનવારને મારી નાખવામાં આવ્યો છે. તે હમાસની લશ્કરી પાંખનું નેતૃત્વ કરી રહ્યો હતો. આ હમાસ માટે એક મોટો ફટકો છે, પરંતુ અમારું ઓપરેશન હજુ પૂરું થયું નથી. તેમણે ચેતવણી પણ આપી હતી કે ગાઝામાં બંધકોને નુકસાન પહોંચાડનારાઓ સામે કડક કાર્યવાહી ચાલુ રહેશે.

અહેવાલો અનુસાર, ઓક્ટોબર 2024 માં તેના ભાઈ યાહ્યા સિનવારના મૃત્યુ પછી મોહમ્મદ સિનવારે હમાસનું લશ્કરી અને રાજકીય નેતૃત્વ સંભાળ્યું હતું. તે 7 ઓક્ટોબર 2023ના હમાસ હુમલાનો મુખ્ય આયોજક માનવામાં આવતો હતો, જેમાં ઇઝરાયલમાં 1,200 લોકો માર્યા ગયા હતા અને 250 લોકોને બંધક બનાવ્યા હતા.

અગાઉ, ઇઝરાયલી મીડિયાએ અહેવાલ આપ્યો હતો કે આ મહિનાની શરૂઆતમાં દક્ષિણ ગાઝામાં ઇઝરાયલી હવાઈ હુમલામાં સિનવારને નિશાન બનાવવામાં આવ્યો હતો. જોકે, તે સમયે ઇઝરાયલી સંરક્ષણ દળોએ તેની પુષ્ટિ કરી ન હતી. હવે ખુદ પીએમએ તેની પુષ્ટિ કરી છે. હમાસના રફાહ બ્રિગેડ કમાન્ડર મોહમ્મદ શબાના અને 10 અન્ય સાથીઓ પણ આ હુમલામાં માર્યા ગયા હોવાના અહેવાલ છે. સાઉદી ચેનલની એક ચેનલ અનુસાર, સિનવારનો મૃતદેહ અને તેના સાથીઓના અવશેષો ટનલમાંથી મળી આવ્યા હતા.

જોકે, હમાસે હજુ સુધી મોહમ્મદ સિનવારના મૃત્યુની સત્તાવાર પુષ્ટિ કરી નથી. ગાઝાના ખાન યુનિસ શરણાર્થી શિબિરમાં જન્મેલો મોહમ્મદ ઇબ્રાહિમ હસન સિનવાર ઘણા દાયકાઓ સુધી હમાસનો ટોપ કમાન્ડર હતો. તેમની ગુપ્ત પ્રવૃત્તિઓને કારણે ઇઝરાયલી અધિકારીઓ દ્વારા તેને શેડોનું હુલામણું નામ આપવામાં આવ્યું હતું. વર્ષ 2006માં તે ઇઝરાયલી સૈનિક ગિલાદ શાલિતના અપહરણમાં સામેલ હતો. આ કાર્યવાહી પછી 2011 માં કેદીઓની અદલાબદલીનો સોદો થયો હતો.

ઇઝરાયલી અને પેલેસ્ટિનિયન જેલોમાં વર્ષો વિતાવતા  તેણે અન્ય હમાસ નેતૃત્વ સાથે ગાઢ સંબંધો વિકસાવ્યા અને 1991 માં હમાસના લશ્કરી ચળવળમાં જોડાયો. ઇઝરાયલે અગાઉ સિનવારની હત્યા કરવાના ઘણા પ્રયાસો કર્યા છે. વર્ષ 2014માં હમાસે જાહેરાત કરી હતી કે સિનવાર ઇઝરાયલ-ગાઝા યુદ્ધ દરમિયાન માર્યા ગયા હતા, પરંતુ આ માહિતી ખોટી સાબિત થઈ હતી.