Jeff Bezos 60 વર્ષે ફરી કરશે લગ્ન, 5000 કરોડનો કરશે ધુમાડો, જાણો કોણ છે તેમની નવી પત્ની

વિશ્વના સૌથી ધનિક વ્યક્તિઓમાંના એક અને એમેઝોનના સ્થાપક જેફ બેઝોસ ટૂંક સમયમાં તેની મંગેતર લોરેન સાંચેઝ સાથે લગ્ન કરવા જઈ રહ્યા છે. આ લગ્ન કોલોરાડોના એસ્પેન શહેરમાં યોજાશે અને તે અત્યાર સુધીના સૌથી ભવ્ય લગ્નોમાંથી એક માનવામાં આવે છે. અહેવાલો અનુસાર, આ લગ્નનો ખર્ચ લગભગ 600 મિલિયન ડોલર એટલે કે 5096 કરોડ રૂપિયા હોઈ શકે છે.

GSTVની એપ્લિકેશન ડાઉનલોડ કરો

   

લગ્ન ક્યારે થશે?

ન્યૂયોર્ક પોસ્ટ અનુસાર જેફ બેઝોસ અને લોરેન સાંચેઝના લગ્ન આવતા શનિવારે યોજાશે. જો કે, અત્યાર સુધી બેઝોસ અથવા સાંચેઝ તરફથી લગ્નની તારીખ અંગે કોઈ સત્તાવાર પુષ્ટિ કરવામાં આવી નથી.

લગ્નમાં કોણ હાજરી આપશે?

આ ભવ્ય લગ્નમાં અનેક હાઈ-પ્રોફાઈલ હસ્તીઓ હાજરી આપે તેવી શક્યતા છે. મીડિયા રિપોર્ટ્સ અનુસાર, બિલ ગેટ્સ, લિયોનાર્ડો ડી કેપ્રિયો અને જોર્ડનની રાણી રાનિયા જેવી હસ્તીઓ લગ્નમાં હાજરી આપી શકે છે.

ભવ્ય લગ્ન સમારોહ

પાર્ટી આયોજકોએ આ ભવ્ય કાર્યક્રમની તૈયારી માટે નોન-ડિસ્કલોઝર એગ્રીમેન્ટ (ગોપનીયતા કરાર) પર હસ્તાક્ષર કરવાના હતા, જેથી લગ્ન સંબંધિત સંપૂર્ણ માહિતી સાર્વજનિક ન થઈ શકે. એસ્પેનમાં આયોજિત આ લગ્નને ખાસ બનાવવા માટે દુનિયાભરમાંથી પસંદગીની વસ્તુઓ લાવવામાં આવશે. એસ્પેનના લગ્નના આયોજકે જણાવ્યું હતું કે દંપતીની મનપસંદ કેક પેરિસથી લાવવામાં આવશે, હેર સ્ટાઈલિસ્ટ ન્યૂયોર્કથી લાવવામાં આવશે અને સમારંભમાં તેમનું મનપસંદ મ્યુઝિક બેન્ડ પરફોર્મ કરશે.

પ્રપોઝ કરતી વખતે 20 કેરેટનો હીરો આપ્યો

બેઝોસે સાંચેઝને પ્રપોઝ કરવા માટે જે રિંગ આપી હતી તેમાં હૃદયના આકારનો હીરો હતો. આ હીરો 20 કેરેટનો હતો. જો તમે વિચારી રહ્યા હોવ કે સાંચેઝ શું કરે છે, તો સાંચેઝ એક બ્રોડકાસ્ટ જર્નાલિસ્ટ રહી ચૂક્યા છે. તે હેલિકોપ્ટર પાઈલટ અને બ્લેક ઓપ્સ એવિએશનના સ્થાપક પણ છે.

લોરેનના લગ્ન 2019માં તૂટી ગયા

બેઝોસ સાથેના સંબંધો શરૂ કરતા પહેલા, લોરેને 2005માં હોલીવુડ એજન્ટ પેટ્રિક વ્હાઇટસેલ સાથે લગ્ન કર્યા હતા. આ લગ્ન 13 વર્ષ સુધી ચાલ્યા અને વર્ષ 2019માં બંનેના છૂટાછેડા થઈ ગયા. પેટ્રિક સાથે તેણીને બે બાળકો છે. પુત્રનું નામ ઇવાન અને એક દીકરીનું નામ એલા છે. 

લોરેન સાંચેઝ કોણ છે?

લોરેન સાંચેઝ એક પ્રખ્યાત પત્રકાર, ટીવી હોસ્ટ અને હેલિકોપ્ટર પાઇલટ છે. તેણી 2023 થી જેફ બેઝોસ સાથે સંબંધમાં છે. આ લગ્ન વિન્ટરલેન્ડ થીમ પર સજાવવામાં આવશે, જે આ સિઝનના સૌથી યાદગાર લગ્ન બની શકે છે. આ લગ્નને યાદગાર બનાવવા માટે કરવામાં આવેલી વ્યવસ્થા લગ્ન સમારંભો માટે એક નવું માઈલ્સટોન સ્થાપિત કરી શકે છે.

બેઝોસે 25 વર્ષ પછી મેકેન્ઝી સ્કોટને છૂટાછેડા આપ્યા હતા 

બેઝોસે 25 વર્ષ પછી મેકેન્ઝી સ્કોટને છૂટાછેડા આપી દીધા હતા. બંનેએ છૂટાછેડા પહેલા 1994માં 25 વર્ષ પહેલાં લગ્ન કર્યા હતા. બેઝોસને ત્રણ પુત્રો અને એક દત્તક પુત્રી છે. મેકેન્ઝી પણ વિશ્વની સૌથી અમીર મહિલાઓમાંથી એક છે. તેણે  વિજ્ઞાન શિક્ષક ડેન જેવેટ સાથે લગ્ન કર્યા છે.

એમેઝોનના સ્થાપક જેફ બેઝોસની કુલ સંપત્તિ 20.26 લાખ કરોડ રૂપિયા છે. વિશ્વના બીજા સૌથી ધનિક ઉદ્યોગપતિ બેઝોસ એમેઝોનના સ્થાપક અને સીઈઓ છે. તે ન્યૂઝ મીડિયા હાઉસ ધ વોશિંગ્ટન પોસ્ટના માલિક અને બ્લુ ઓરિજિન નામની સબ-ઓર્બિટલ સ્પેસફ્લાઇટ સેવાના સ્થાપક પણ છે.