Last Update :
25 Apr 2025
Pahalgam આતંકી હુમલા બાદ ચારે બાજુથી ઘેરાયેલું પાકિસ્તાન પોતાની બેશરમી છોડતું નથી. પાકિસ્તાનના વિદેશ મંત્રી અને નાયબ વડાપ્રધાન ઇશાક ડારે નીમ્ન કક્ષાનું નિવેદન આપ્યું છે. ઈશાક ડારે પહેલગામ પર હુમલો કરનારા આતંકવાદીઓને સ્વતંત્રતા સેનાનીઓ ગણાવી દીધા છે. તેણે કહ્યું કે પહેલગામમાં હુમલો કરનારા લોકો સ્વતંત્રતા સેનાની હોઈ શકે છે.
GSTVની એપ્લિકેશન ડાઉનલોડ કરો
પહેલગામ હુમલા બાદ ભારતે પાકિસ્તાન સામે કડક નિર્ણયો લીધા છે. પાકિસ્તાન આ નિર્ણયોથી ડરી ગયું છે પણ તેની બેશરમી ઓછી થવાના કોઈ સંકેત દેખાઈ રહ્યા નથી. પાકિસ્તાનના નાયબ વડા પ્રધાન અને વિદેશમંત્રી ઇશાક ડારે આતંકવાદીઓને સ્વતંત્રતા સેનાનીઓ ગણાવ્યા. સિંધુ જળ સંધિને મુલતવી રાખવાના ભારતના નિર્ણય અંગે ડારે કહ્યું કે, તે 24 કરોડ પાકિસ્તાનીઓ માટે જીવનરેખા છે. જો ભારત પાણી રોકશે તો તે યુદ્ધ ગણાશે. પાકિસ્તાનની સાર્વભૌમત્વ અને સુરક્ષા સામેના કોઈપણ ખતરોનો તમામ પ્રદેશોમાં સખત જવાબ આપશે.
પાકિસ્તાનના સંરક્ષણ મંત્રી ખ્વાજા મુહમ્મદ આસિફે કહ્યું કે, ભારત પાકિસ્તાનમાં હુમલો કરવાની યોજના બનાવી રહ્યું છે. આસિફે કહ્યું કે જો ભારત અમારા નાગરિકોને નુકસાન પહોંચાડશે તો ભારતીય નાગરિકો પણ સુરક્ષિત નહીં રહે.
આતંકવાદી ઘટના ક્યારે અને ક્યાં બની હતી?
જમ્મુ અને કાશ્મીરના પહેલગામ શહેર નજીક 'મીની સ્વિટ્ઝર્લૅન્ડ' તરીકે ઓળખાતા પર્યટન સ્થળ પર મંગળવારે બપોરે થયેલા આતંકવાદી હુમલામાં 26 લોકો માર્યા ગયા, જેમાં મોટાભાગના પ્રવાસીઓ હતા. ૨૦૧૯માં પુલવામા હુમલા પછી ખીણમાં આ સૌથી ઘાતક હુમલો છે. એક વરિષ્ઠ અધિકારીએ જણાવ્યું હતું કે ૨૬ મૃતકોમાં બે વિદેશી અને બે સ્થાનિક રહેવાસીઓનો સમાવેશ થાય છે. પાકિસ્તાન સ્થિત પ્રતિબંધિત આતંકવાદી જૂથ લશ્કર-એ-તૈયબા (LeT) ના ફ્રન્ટ સંગઠન, રેઝિસ્ટન્સ ફ્રન્ટ (TRF) એ આ હુમલાની જવાબદારી સ્વીકારી છે.
ભારતે પાંચ સખત નિર્ણયો લીધા
પહેલગામ હુમલાના એક દિવસ પછી PM નરેન્દ્ર મોદીના નેતૃત્વમાં સુરક્ષા પરની કેબિનેટ સમિતિ (CCS) બુધવારે સાંજે નવી દિલ્હીમાં મળી અને મહત્વપૂર્ણ નિર્ણયો લીધા. ૧૯૬૦ની સિંધુ જળ સંધિને સ્થગિત કરવાનો અને અટારી ખાતેની સંકલિત ચેક પોસ્ટને તાત્કાલિક અસરથી બંધ કરવાનો પણ નિર્ણય લેવામાં આવ્યો. એવી જાહેરાત કરવામાં આવી હતી કે પાકિસ્તાની નાગરિકોને સાર્ક વિઝા મુક્તિ યોજના (SVES) હેઠળ ભારતની મુસાફરી કરવાની મંજૂરી આપવામાં આવશે નહીં અને ભૂતકાળમાં પાકિસ્તાની નાગરિકોને જારી કરાયેલા આવા કોઈપણ વિઝા રદ માનવામાં આવશે.
