Last Update :
29 Apr 2025
ભારત અને ઈંગ્લેન્ડ વચ્ચે પાંચ ટેસ્ટ મેચની સિરીઝ જૂનમાં શરૂ થશે. આ માટે ટીમ ઈન્ડિયા (Team India) ઈંગ્લેન્ડનો પ્રવાસ કરશે. આ જ સમયે ભારતની A ટીમ ત્યાં જશે. હવે સમાચાર આવી રહ્યા છે કે ભારતની અંડર-19 ટીમ પણ IPL પછી ઈંગ્લેન્ડનો પ્રવાસ કરશે. ટીમ ત્યાં 5 વનડે અને 2 ટેસ્ટ મેચ રમશે. BCCIના સોર્સના જણાવ્યા અનુસાર, ટીમ 21 જૂને યુકે પહોંચશે. આ સમય દરમિયાન, ભારતીય મહિલા ટીમ અને ભારતીય મિશ્ર દિવ્યાંગ ટીમ પણ ઈંગ્લેન્ડના પ્રવાસે હશે. આ સિઝનમાં શાનદાર પ્રદર્શન કરી રહેલા કેટલાક IPL સ્ટાર્સને અંડર-19 ટીમમાં તક મળે તેવી શક્યતા છે.
GSTVની એપ્લિકેશન ડાઉનલોડ કરો
વૈભવ સૂર્યવંશી અને આયુષ મ્હાત્રેને તક મળી શકે છે
રાજસ્થાન રોયલ્સ (RR) ના ઓપનર સૂર્યવંશી (Vaibhav Suryavanshi) અને ચેન્નાઈ સુપર કિંગ્સ (CSK) ના યુવા બેટ્સમેન આયુષ મ્હાત્રે (Ayush Mhatre) ને ઈંગ્લેન્ડના પ્રવાસે જઈ રહેલી અંડર-19 ટીમમાં સ્થાન મળી શકે છે. આ બંને બેટ્સમેન હાલમાં IPLમાં ધૂમ મચાવી રહ્યા છે. વૈભવ સૂર્યવંશી (Vaibhav Suryavanshi) એ ગુજરાત ટાઈટન્સ (GT) સામે IPLના ઈતિહાસમાં બીજી સૌથી ઝડપી સદી ફટકારી છે. તેણે માત્ર 35 બોલમાં સદી ફટકારી. જ્યારે CSK બેટ્સમેન આયુષ મ્હાત્રેએ બે IPL મેચમાં શાનદાર બેટિંગ કરી હતી. તેણે મુંબઈ ઈન્ડિયન્સ સામે 32 રનની ઈનિંગ રમી હતી. જ્યારે સનરાઈઝર્સ હૈદરાબાદ સામે તે 30 રન બનાવીને આઉટ થયો હતો.
વૈભવ અંડર-19 ટીમમાં રમી ચૂક્યો છે
RRનો ઓપનર વૈભવ સૂર્યવંશી (Vaibhav Suryavanshi) ઓસ્ટ્રેલિયા સામે ભારતીય અંડર-19 ટીમ માટે પણ રમી ચૂક્યો છે. તેણે આ ટીમ સામે સદી પણ ફટકારી હતી. આ ઉપરાંત, વૈભવ અને આયુષ મ્હાત્રેએ અંડર-19 એશિયા કપમાં પણ ભાગ લીધો હતો. બંને ટીમ ઈન્ડિયાના ઓપનર હતા. મ્હાત્રે અને સૂર્યવંશી બંનેએ IPLમાં જે પ્રકારની રમત બતાવી છે તેણે બધાનું ધ્યાન ખેંચ્યું છે. તે પછી જ ટીમમાં તેની પસંદગીના સમાચાર આવી રહ્યા છે. તમને જણાવી દઈએ કે અંડર-19 વર્લ્ડ કપ આવતા વર્ષની શરૂઆતમાં યોજાવાનો છે. આ ટૂર્નામેન્ટ ઝિમ્બાબ્વે અને નામિબિયાની યજમાની હેઠળ રમાશે. તેથી ભારત માટે ઈંગ્લેન્ડનો પ્રવાસ મહત્ત્વપૂર્ણ છે.
ભારતના ઈંગ્લેન્ડ પ્રવાસનું શેડ્યૂલ
- પહેલી વનડે: 27 જૂન, હોવ
- બીજી વનડે: 30 જૂન, નોર્થમ્પ્ટન
- ત્રીજી વનડે: 2 જુલાઈ, નોર્થમ્પ્ટન
- ચોથી વનડે: 5 જુલાઈ, વોર્સેસ્ટર
- પાંચમી વનડે: 7 જુલાઈ, વોર્સેસ્ટર
- પહેલી ટેસ્ટ: 12-15 જુલાઈ, સ્થળ નક્કી નથી
- બીજી ટેસ્ટ: 20-23 જુલાઈ, ચેમ્સફોર્ડ
