જનરેશન ગેપની જંજાળ! સ્માર્ટ વર્કના જમાનામાં હાર્ડવર્કની અપેક્ષા કેટલી યોગ્ય? સર્વેમાં ચોંકાવનારો ખુલાસો

જનરેશન ગેપ સદીયોથી ચાલ્યું આવે છે.એક પેઢીને તેની આવતી પેઢી સાથે હમેશા ખટરાગ રહ્યો છે. પરંતુ આ ખટરાગ હવે ઘરના ઉંબરા ઓળંગી કોર્પોરેટ્સ સુધી પહોંચી ગયો છે. જૂની પેઢીના લોકોને આજની પેઢી સાથે કામ કરવામાં અકળામણ થતી હોય તેવું પણ ક્યારેક જોવામાં આવ્યું છે. 

હાલમાં જ અમેરિકાની એક કંપની દ્વારા આ નવી પેઢી પ્રત્યે કોર્પોરેટ્સના અભિગમ પર એક સર્વે કરવામાં આવ્યો હતો. જેમાં વર્ષ 2000ની આસપાસ જન્મેલી પેઢી એટલે કે જેને Gen Z (‘જેન ઝી’ કે ‘જનરેશન ઝેડ’) કહેવામાં આવે છે તેના પ્રત્યે વરિષ્ઠ કોર્પોરેટ્સ અધિકારીઓ શું વિચારે છે, તેમનો આ  Gen Z કામ કરવાનો અનુભવ જેવી બાબતોનો સમાવેશ કરવામાં આવ્યો હતો. Intelligent.com નામની વેબસાઇટ દ્વારા આ રસપ્રદ સર્વે કરવામાં આવ્યો હતો. કંપનીના જણાવ્યા અનુસાર સર્વેમાં 1000 કંપનીઓના પ્રતિનિધિઓએ ભાગ લીધો હતો. 

આ  મુજબ આવ્યા સર્વેના પરિણામો.. 

10માંથી 6 કંપનીઓએ કહ્યું હતું કે તેમણે તાજા ભરતી થયેલા ઘણા કૉલેજ સ્નાતકોને નોકરીમાંથી કાઢી મૂક્યા છે.
7માંથી 1 કંપનીએ કહ્યું હતું કે તેઓ આવતા વર્ષે તેમની કંપનીમાં નવા સ્નાતકોની ભરતી કરવા જ નથી ઈચ્છતા. 
સર્વેમાં ભાગ લેનાર 75 ટકા કંપનીઓએ જણાવ્યું હતું કે તેમને તાજેતરના કોલેજ સ્નાતકોનું કામ સંતોષકારક લાગ્યું નથી.
50 ટકાથી  વધુ ભરતીકારોએ કહ્યું હતું કે Gen Z યુવાનોમાં પ્રેરણાનો અભાવ જોવા મળે છે.
39 ટકા  કંપનીએ કહ્યું હતું કે યુવાનો પાસે કોમ્યુનિકેશન સ્કીલનો અભાવ છે.

આવો જાણીએ હકીકત શું છે? 

આ Gen Z સાથે કામ કરતાં અથવા તેમની પાસે કામ લેતા અમદાવાદના કોર્પોરેટ્સના લીડર્સ તેમના વિશે શું વિચારે છે? શું ખરેખર આ Gen Z તરીકે ઓળખાતી પેઢી આટલી બધી બેદરકાર છે ખરી? 

આ અંગે ‘The Young CEO Club’ના ફાઉન્ડર, ઓથર, લીડરશીપ કોચ અને મેન્ટર પયંક પટેલનું કહેવું કઈંક અલગ જ છે. તેમના જણાવ્યા અનુસાર દરેક જનરેશનનું પોતાની સોસાયટીને કન્ટ્રીબ્યુટ કરવાનો એક અલગ જ નજરીયો હોય છે. વ્યૂ હોય છે. ખાસ કરીને Gen Zની વાત કરીએ તો આ એક એવી જનરેશન છે જેણે  મેચ્યોર થતાં પહેલા જ ટેક્નોલોજીને જોઈ છે. સ્વભાવિક છે કે ટેકનોલોજી લાઈફને વધુ સરળ બનાવે છે. સરળ લાઈફ એ તેમની લાઇફનો મોટો પ્લસ પોઈન્ટ છે. દરમિયાન ઈકોનોમી ગ્રો થઈ છે. આપણે જે વસ્તુ જાત મહેનતથી શીખ્યા છીએ, અથવા મેળવી છે તે તમામ તેમને બહુ સહેલાઈથી મળી ગઈ છે. એટલે જ તમે લાઈફના હાર્ડ ફેસથી તેમને કશું જ લર્ન નહીં કરાવી શકો. 

જો શાળા જીવનની જ વાત કરી તો ત્યાં પણ હવે ટીચરની અભ્યાસ કરાવવાની સ્ટાઈલ બદલાઈ ગઈ છે. લેશન ડાયરીનું સ્થાન હવે વોટ્સએપ ગ્રુપે લઈ લીધું છે. બ્લેક બોર્ડનું સ્થાન સ્માર્ટ બોર્ડે લઈ લીધું છે. તો કામમાં પણ તેમની પાસે સ્માર્ટ વર્કની જ અપેક્ષા રાખી શકાય. અહી ઓલ્ડ થોટ અને ન્યુ થોટ વચ્ચે વિરોધાભાસ છે. જૂની જનરેશનને લાગે છે આ લોકોએ કામ નથી કરવું પરંતુ નવી જનરેશનને લાગે છે પોતાની પધ્ધતિથી કામ કરવું છે. તેમની કામ કરાવવાની પદ્ધતિ અલગ છે. 

જે લીડર તેમની કામ કરવાની પદ્ધતિ નહિ સમજે તેને એમ જ લાગશે કે તેમની સાથે કામ નથી કરવું, પરંતુ જે લીડર્સને આ જનરેશન સાથે કામ કરતાં આવડી ગયું, આ જનરેશનને મેનેજ કરતાં આવડી ગયું તો આ Gen Z આપના કરતાં પણ વધુ સારી રીતે વર્ક કરી શકે છે. 

આ પેઢી વ્યાવસાયિક રીતે શીખવા અને વિકાસ કરવા આતુર છે- મેનેજમેન્ટ એક્સપર્ટ ભાવેશ ઉપાધ્યાય

મેનેજમેન્ટ એક્સપર્ટ ભાવેશ ઉપાધ્યાય સાથે વાત કરતાં તેમણે પણ જણાવ્યું હતું કે GEN Z, 1990ના દાયકાના મધ્ય અને 2010ના દાયકાની શરૂઆતમાં જન્મેલી, સ્માર્ટફોન, સોશિયલ મીડિયા અને ઇન્ટરનેટ સાથે મોટી થઈ. તેઓ ટેક્નોલોજી સાથે આરામદાયક છે અને ડિજિટલ કોમ્યુનિકેશન પસંદ કરે છે, જે તેમને વિવિધ પ્લેટફોર્મ પર મલ્ટિટાસ્કિંગમાં પારંગત બનાવે છે. તેમની ડિજિટલ ફ્લુઅન્સી તેમને નવા ટૂલ્સ અને સૉફ્ટવેર સાથે ઝડપથી વર્ક કરવામાં સક્ષમ બનાવે છે. 

જો કે, તેમને ફક્ત ટેક જંક તરીકે મૂલવવું એ ગંભીર ભૂલ હશે. આ પેઢી મહત્વાકાંક્ષી છે, વૈશ્વિક સ્તરે વિચારે છે અને વિશ્વના પડકારો – આબોહવા પરિવર્તન, સામાજિક અસમાનતા અને આર્થિક અસ્થિરતાથી વાકેફ છે. 

વર્ક પ્લેસમાં ફ્લેક્સિબ્લિટી તેમની પ્રયોરિટી છે, અગાઉની પેઢીઓની સરખામણીમાં, તેઓ પરંપરાગત 9થી 5 વર્ક મોડલને અનુસરે તેવી શક્યતા નહિવત છે. તેઓ કેવી રીતે, ક્યારે અને ક્યાં કામ કરશે તેઓ જાતે નક્કી કરે છે. મોટા ભાગે તેઓ સકારાત્મક વાતાવરણમાં વર્ક કરવાનું વધુ પસંદ કરે છે. જ્યાં ટીમ વર્ક અને વિચારોના આદાનપ્રદાનની સ્વતંત્રતા હોય, નિર્ણય લેવાની પ્રક્રિયામાં યોગદાન આપી શકે.

આ પેઢી વ્યાવસાયિક રીતે શીખવા અને વિકાસ કરવા આતુર છે. તેઓ સતત નવું શીખવા, કૌશલ્ય વિકાસ અને કારકિર્દીની પ્રગતિ માટે તકો શોધે છે. GEN Z નોકરીદાતાઓ પાસેથી પારદર્શિતાની અપેક્ષા રાખે છે. જે કંપનીઓ તેમની નીતિઓ, મૂલ્યો અને ધ્યેયો વિશે ઓપન માઇન્ડેડ છે, તેમની  GEN Z કર્મચારીઓનો વિશ્વાસ અને વફાદારી જીતવાની શક્યતા વધારે છે.

નવી પેઢી એટલે કે GEN Z બહુજ  ઉત્સાહી, ખંતીલી છે. કેરિયર ઓરીએન્ટેડ છે. તેમની મહત્ત્વકાંક્ષા બહુ ઊંચી હોય છે. અને રિસ્ક લેવામાં જરા પણ ડરતી નથી. પોતાના વર્ક લોડને પૂરું કરવા માટે સ્ટ્રેસ સાથે કામ કરતાં પણ આચકતી નથી તો સાથે કામ પૂરું કરવા માટે હેલ્થનો પણ વિચાર કરતાં નથી. તેઓ જે ઇચ્છે છે તે તરત જ મેળવવાનું પસંદ કરે છે. અને તેના માટે કોઇ પણ રિસ્ક લેતા અચકાતા નથી. આજની પેઢી નાનકડા સેલરી વધારા માટે પણ તરત જ જમ્પ કરી લેવાનું જોખમ લઈ લે છે. અને નાના જમ્પ તેમને મોટી ઊંચાઈએ લઈ જાય છે. 

GEN Z યુવા વધુ એનર્જેટિક, મહત્ત્વકાંક્ષા અને આત્મવિશ્વાસથી ભરેલી છે. જીવનમાં તેમના ગોલ હાઇ છે. અને ગોલ પૂરા કરવા માટે કઈ પણ કરી છૂટવા તત્પરતા ધરાવે છે. 

GEN Z યુવા શું કહે છે? 

આ તો થાય લીડર્સના મંતવ્યો છે, પરંતુ જો આપણે GEN Zના લોકો સાથે જ વાત કરી તો તેમને પણ આવા સર્વે સાથે કોઇ ખાસ લેવાદેવા ન હોય તેવું લાગે છે. તેઓ પોતાની મસ્તીમાં મસ્ત છે. તેમના પણ લાઈફમાં પોતાના ગોલ છે. અને તે પૂરા કરવા માટે પ્લાનિંગ પણ છે. પોતાના ગોલ પૂરા કરવા તેઓ કોઇ રિસ્ક લેતા અચકાટ નથી. ઘર પરિવારથી દૂર રહેવું તેમણે પરેશાન નથી કરતું. પોતાની લાઈફ સેટ કરવા કટીબદ્ધ છે. 

યુતિ નામની યુવતી જે હાલમાં જ સ્ટડી પૂરું કરી જોબમાં જોડાઈ છે તેના જણાવ્યા અનુસાર કોઇ એક વ્યક્તિ સાથે થયેલા અનુભવના આધારે આખી પેઢીને દોષ દેવો યોગ્ય નથી. અમે ટેકનોલોજી સાથે મોટા થયા છીએ તો સતત કઈક નવું શીખવાની આદત સાથે આગળ વધ્યા છીએ. ભવિષ્યમાં પણ નવું શિખતા રહીશું. મારા કામથી મને અને મારા HOD કોઈને કોઇ તકલીફ નથી. 

આવું જ મીત પટેલનું કહેવું છે. મને મારા કામને કારણે કોઇ જ ખરાબ અનુભવ થયા નથી. મારા વર્ક પ્લેસનું વાતાવરણ પણ ખૂબ સારું છે. અમે બધા જ એકબીજાના કામથી સેટિસ્ફાય  છીએ. હા તમારામાં સતત નવું શીખવાની ધગસ હોવી જોઈએ. કામ પ્રત્યે નિષ્ઠા હોવા જરૂરી છે.