Last Update :
30 May 2025
ભ્રષ્ટાચારની એક ચોંકાવનારી ઘટના સામે આવી છે. EDના ડેપ્યુટી ડાયરેક્ટર જ લાંચ લેતા ઝડપાયા છે. EDના આ ડેપ્યુટી ડાયરેક્ટરનું નામ ચિન્તન રઘુવંશી છે. ચિંતન રઘુવંશીને 20 લાખ રૂપિયાની લાંચ લેતા CBIએ રંગે હાથ પકડ્યો છે. તે એક બિઝનેસમેન પાસે મની લૉન્ડ્રિંગ (PMLA) કેસને સેટલ કરવાના બદલામાં લાંચ માંગતો હતો.
GSTVની એપ્લિકેશન ડાઉનલોડ કરો
EDના અધિકારીએ 5 કરોડની માંગી હતી લાંચ
સૂત્રો અનુસાર, આરોપી EDના ડેપ્યુટી ડાયરેક્ટર ચિન્તન રઘુવંશીએ બિઝનેસમેન પાસે 5 કરોડ રૂપિયાની લાંચની માંગ કરી હતી. બાદમાં આ સોદો 2 કરોડમાં નક્કી થયો હતો. તે શુક્રવારે પ્રથમ હપ્તા તરીકે 50 લાખમાંથી 20 લાખ રૂપિયા લેતા ઝડપાયો હતો.
કેવી રીતે થયો કાંડ
આ ઘટના ઓડિશાના પાટનગર ભૂવનેશ્વરની છે જ્યાં EDની એક ટીમ સર્ચ ઓપરેશન માટે ગઇ હતી. આ દરમિયાન આ લાંચની ઘટના સામે આવી છે. ચિન્તન રઘુવંશી IRS અધિકારી છે અને તેને CBIએ ફરિયાદ મળ્યા બાદ ટ્રેપ કરીને પકડ્યો હતો.
કેવી રીતે લાંચ લેતા ઝડપાયો EDનો અધિકારી?
CBIના અધિકારીઓ અનુસાર, ડેપ્યુટી ડાયરેક્ટર રઘુવંશીએ પીડિત બિઝનેસમેનને મની લૉન્ડ્રિંગ કેસમાં રાહત આપવા માટે લાલચ આપી હતી જેના બદલામાં ભારે રકમ લાંચ તરીકે માંગવામાં આવી હતી. બિઝનેસમેને જેવો જ પ્રથમ હપ્તો આપ્યો, CBIએ જાળ પાથરીને તેને પકડી લીધો હતો. CBIએ રઘુવંશીની ધરપકડ કરી છે અને હવે તેની પૂછપરછ ચાલી રહી છે. આ ઘટના સામે આવતા જ ED જેવી સંસ્થાની સાખ પર સવાલ ઉભા થયા છે જે દેશભરમાં આર્થિક ગુનાઓ અને મની લૉન્ડ્રિંગ જેવા કેસની તપાસ કરે છે.
