Last Update :
08 Mar 2025
ગુવાહાટી પોલીસે શુક્રવારે (7 માર્ચ) યુટ્યુબર રણવીર અલ્હાબાદિયાની 'ઈન્ડિયાઝ ગોટ લેટેન્ટ' કેસમાં પૂછપરછ કરી હતી. અલ્હાબાદિયા ગુરુવારે રાત્રે પૂછપરછ માટે આસામના ગુવાહાટી પહોંચ્યો જ્યાં તે ક્રાઈમ બ્રાન્ચ સમક્ષ હાજર થયો હતો. અહીં તેની સાથે ઘણા કલાકો સુધી પૂછપરછ કરવામાં આવી અને આ દરમિયાન તેના વકીલ પણ તેની સાથે હાજર રહ્યા હતા.
GSTVની એપ્લિકેશન ડાઉનલોડ કરો
રણવીર અલ્હાબાદિયાનો એક વીડિયો સોશિયલ મીડિયા પર વાયરલ થઈ રહ્યો છે જેમાં ગુવાહાટી પોલીસ તેને પૂછપરછ માટે લઈ જતી જોવા મળે છે. સફેદ શર્ટ પહેરેલા અલ્હાબાદિયાના બંને હાથ પકડીને પોલીસ તેને ઝડપથી સીડીઓ ઉપર લઈ જતી જોવા મળે છે.
4 કલાકથી વધુ ચાલી પૂછપરછ
યુટ્યુબર રણવીર અલ્હાબાદિયાની પૂછપરછ કરનારી પોલીસ સમિતિનું નેતૃત્વ સંયુક્ત કમિશનર અંકુર જૈને કર્યું હતું. પૂછપરછ પછી જૈને મીડિયાને જણાવ્યું, 'તે બપોરે લગભગ 12:30 વાગ્યે ક્રાઈમ બ્રાન્ચ ઓફિસ પહોંચ્યો અને તેની પૂછપરછ ચાર કલાકથી વધુ સમય સુધી ચાલી. તેણે પોલીસને સહકાર આપ્યો અને અમારા બધા પ્રશ્નોના જવાબ આપ્યા હતા.'
આ કેસમાં ચાર લોકોના નિવેદનો નોંધવાના બાકી છે
જૈને કહ્યું કે, રણવીર અલ્હાબાદિયાએ પોલીસને વધુ સહયોગની ખાતરી આપી છે અને એમ પણ કહ્યું છે કે જ્યારે પણ તેને કેસ માટે બોલાવવામાં આવશે ત્યારે તે ગુવાહાટી આવશે. તેમણે કહ્યું, 'તપાસ ચાલુ છે અને હજુ ચાર લોકો આવવાના બાકી છે. શોના ત્રણ કન્ટેસ્ટન્ટ, જેઓ અમારી સમક્ષ હાજર નથી થયા, તેમણે અમને મેઈલ મોકલીને કહ્યું છે કે તેઓ દેશની બહાર છે. અમે તેમને ફરીથી નોટિસ મોકલીશું અને તે મુજબ કાર્યવાહી કરીશું.' તેમણે કહ્યું કે, 'પાંચ યુટ્યુબર્સ સાથે, જ્યાં શો શૂટ થયો હતો તે સ્થળના માલિકનું નામ પણ FIRમાં નોંધવામાં આવ્યું છે.'
