Last Update :
02 Mar 2025
બોલીવૂડની પ્રખ્યાત અભિનેત્રી વિદ્યા બાલન AI જનરેટેડ વીડિયોને કારણે ચિંતિત છે. તે કહે છે કે તેના કેટલાક AI જનરેટેડ વીડિયો વાયરલ થઈ રહ્યા છે, અને તે બનાવવામાં તેનો કોઈ હાથ નથી. તેણે પોતાના ફેન્સને આવા વીડિયોથી સાવધાન રહેવા પણ કહ્યું છે.
GSTVની એપ્લિકેશન ડાઉનલોડ કરો
વિદ્યાએ ઇન્સ્ટાગ્રામ પર એક વીડિયો પોસ્ટ કર્યો છે, જે એક AI જનરેટેડ વીડિયો છે. વીડિયોની ઉપર લખ્યું છે, 'સ્કેમ એલર્ટ'. વિદ્યાએ એક નોંધ પણ શેર કરી, જેમાં તેણે લખ્યું, "વોટ્સએપ અને સોશિયલ મીડિયા પર ઘણા વીડિયો ફરતા થઈ રહ્યા છે. હું સ્પષ્ટ કરવા માંગુ છું કે તે વીડિયો AI જનરેટેડ અને નકલી છે."
વિદ્યા બાલને ફેન્સને કરી અપીલ
વિદ્યાએ આગળ લખ્યું, "આવા વીડિયો બનાવવા અને ફેલાવવામાં મારો કોઈ હાથ નથી. હું આવા કન્ટેન્ટને કોઈપણ રીતે સપોર્ટ નથી કરતી. વીડિયોમાં જે પણ દાવા કરવામાં આવી રહ્યા છે તેને મારી સાથે ન જોડો, કારણ કે આવા વીડિયો મારા મંતવ્યો અને કાર્યને નથી દર્શાવતા. હું દરેકને વિનંતી કરું છું કે કંઈપણ શેર કરતા પહેલા ચકાસણી કરે અને આવા AI કન્ટેન્ટથી સાવધ રહે."
આ પહેલી વાર નથી જ્યારે કોઈ કલાકાર AI વિશે ચિંતિત હોય. દરરોજ, કોઈને કોઈ સ્ટારના AI જનરેટેડ ફોટો સોશિયલ મીડિયા પર વાયરલ થાય છે. વિદ્યાએ ફેન્સને એલર્ટ કરવા માટે પોસ્ટ કરેલો વીડિયો જોઈને, આ વીડિયો અસલી છે કે નકલી તે ઓળખવું ખૂબ મુશ્કેલ છે.
વિદ્યા બાલનનું વર્ક ફ્રંટ
જો વિદ્યા બાલનના વર્ક ફ્રંટની વાત કરીએ તો, વિદ્યા છેલ્લે 2024માં 'ભૂલ ભુલૈયા 3' માં જોવા મળી હતી. આ ફિલ્મમાં તેની સાથે તૃપ્તિ ડિમરી, માધુરી દીક્ષિત અને કાર્તિક આર્યન પણ જોવા મળ્યા હતા. લોકોને આ ફિલ્મ ખૂબ જ ગમી. આ ફિલ્મે વિશ્વભરમાં 389 કરોડ રૂપિયાની કમાણી કરી હતી. હવે ફેન્સ તેની આગામી ફિલ્મની રાહ જોઈ રહ્યા છે. જોકે, હજુ સુધી તેની કોઈ ફિલ્મની જાહેરાત નથી કરવામાં આવી.
