શતરંગ / વડોદરા: લોકોનાં ડુબકાં, તંત્રના ડચકાં, ધૂળ ખાતી બોટ્સ અને કાર્યકારણનો સંબંધ!

વડોદરાવાળા ડુબકાં ખાઈ રહ્યા હતા ત્યારે બોટ્સ સહિતની બચાવ સામગ્રી ધૂળ ખાઈ રહી હતી. આ બંન્ને વચ્ચે કાર્યકારણનો સંબંધ છે. ધૂળ પ્રજાના ઝમીર પર ચડેલી છે. આવું જ બને જ્યારે તમે લોક પ્રતિનિધિઓને બેજવાબદાર કરી મુકો. ફટવી મારો.

આ પણ વાંચો: ઈન્દિરા ઈઝ ઈન્ડિયા...' ઈન્ડિયા ઈઝ ભારત... મોદી ઈઝ 'મહાભારત'!

આ એ જ શહેર છે જેણે નરેન્દ્ર મોદી સહિતના ભાજપના ઉમેદવારોને પાંચ પાંચ લાખની લીડથી જીતાવ્યા છે. લોક પ્રતિનિધિમાંથી પ્રજાનો રોષ વિરોધી મતોમાં તબદિલ થવાનો ભય ગાયબ થઈ જાય ત્યારે એમની ચામડી વિશ્વામિત્રીમાંથી વડોદરાની સોસાયટીઓમાં ઘુસી આવતા મગરો જેટલી જાડી થઈ જતી હોય છે. શાસકોમાં વિરોધી મતદાનનો ભય એ પાણી પહેલાની પાળ હોય છે એ ન બાંધો તો પાણી ઘરમાં ઘૂસે જ ને?