AMRELI : પ્રેમી-પ્રેમિકાના લફડામાં અન્ય યુવકની હત્યા, જાણો સમગ્ર મામલો

Amreli News  : અમરેલી જિલ્લાના રાજુલા તાલુકાના  જૂની બારપટોળી ગામમાં પ્રેમ પ્રકરણમાં પ્રેમીના મિત્રની હત્યા કરવામાં આવી છે. મૃતક યુવક પોતાના મિત્રની સાથે મોટરસાયકલ પર તેની પ્રેમિકાને મળવા ગયો હતો. એ દરમિયાન યુવતીના સંબંધીઓએ આ યુવકને ઢોર માર મારતા સારવાર દરમિયાન તેનું મોત થયું છે. 

યુવતીના સંબંધીઓએ અગાઉથી કાવતરું રચીને બંનેને માર માર્યો

અમરેલી- રાજુલા તાલુકાના જૂની બારપટોળી ગામ નજીક નાગભાઇ વણઝર નામનો યુવક તેની પ્રેમિકા મળવા માટે ગયો હતો. આ સમયે મોટરસાયકલ પર તેનો મિત્ર મનુભાઈ  મકવાણા તેની સાથે હતો. આ દરમિયાન યુવતીના સંબંધીઓએ અગાઉથી કાવતરું રચીને ગેરકાયદેસર મંડળી રચી બંનેને માર માર્યો હતો. 

સારવાર દરમિયાન યુવકનું મોત

યુવતીનો પ્રેમી નાગભાઇ વણઝર ઘટનાસ્થળેથી નાસી જવામાં સફળ થયો હતો, જયારે તેના મિત્ર મનુભાઈ મકવાણાને યુવતીના સંબંધીઓએ જીવલેણ માર માર્યો હતો. ગંભીર રીતે ઈજાગ્રસ્ત મનુભાઈ મકવાણાને સારવાર માટે હોસ્પિટલ ખસેડવામાં આવ્યા હતા, જ્યાં સારવાર દરમિયાન તેનું મોત થયું હતું. 

5 આરોપીઓ નોંધાયો ગુનો

પોલીસે આ ઘટનામાં માર મારનારા 5 આરોપીઓ વિરુદ્ધ હત્યા સહિતની કલમો હેઠળ ગુનો નોંધી આરોપીઓને ઝડપવા અલગ અલગ ટીમો બનાવી તપાસ શરૂ કરી છે. જયારે મૃતક મનુભાઈના મૃતદેહના પેનલ પોસ્ટમોર્ટમ માટે ભાવનગર સર ટી. સિવિલ હોસ્પિટલ ખસેડ્યો છે.