Last Update :
09 May 2025
Ankleshwar News: ગુજરાતભરમાંથી સાયબર ફ્રોડ તેમજ ડિજિટલ એરેસ્ટના અનેક કિસ્સાઓ સામે આવી રહ્યા છે. એવામાં વધુ એક નિવૃત્ત શિક્ષક દંપતીએ ૧૬ લાખ ગુમાવવાની નોબત આવતા સમગ્ર મામલો સાયબર પોલીસ મથકમાં પહોંચ્યો હતો. સાયબર ગઠીયાઓ પોલીસના કપડામાં વીડિયો કોલિંગ કરી શિક્ષક દંપતી સાથે છેતરપિંડી કરી હોવાની ફરિયાદ નોંધાતા રાજકોટથી બે આરોપીની અટકાયત કરવામાં આવી હતી.
GSTVની એપ્લિકેશન ડાઉનલોડ કરો
વોટ્સએપ વીડિયો કોલમાં અજાણ્યા શખ્સોએ પોલીસની ઓળખ આપી
અંકલેશ્વરમાં જુના દીવા રોડ ઉપર આવેલી નીલ માધવ રેસીડેન્સીમાં રહેતા નિવૃત્ત શિક્ષિકા પ્રેમીબેન મોતીભાઈ રોહિતે ભરૂચ સાયબર ક્રાઈમ પોલીસ મથકમાં ફરિયાદ નોંધાવી છે. જેમાં તેઓએ આક્ષેપ કર્યા છે કે, તેઓને ગત તારીખ ૪ મેના રોજ અજાણ્યા નંબર પરથી વોટ્સએપ વીડિયો કોલ આવ્યો હતો. જેમાં વીડિયો કોલ કરનારે પોલીસના કપડાં પહેર્યા હતા અને તેણે વિનોય કુમાર તરીકે સાયબર ક્રાઈમ દિલ્હીના પોલીસ અધિકારી હોવાની ઓળખ આપી હતી.
નિવૃત શિક્ષક દંપતીએ ફ્રોડ કર્યું છે તેમ કહી ડરાવ્યા
અને તેઓએ ફરિયાદી પ્રેમીબેન તથા તેમના પતિ મોતીભાઈ રોહિતને કહ્યું હતું કે, દિલ્હીમાં નરેશ ગોયલ નામના ઈસમે ૨ કરોડનું સાયબર ફ્રોડ કર્યું છે જેના ૨૦ ટકા તમારા ખાતામાં આવ્યા છે જેના અનુસંધાને આપની ધરપકડ કરવા સિવિલ ડ્રેસમાં પોલીસ તમારા ઘરની આજુબાજુ પહોંચી ગઈ છે.
પતિ પત્ની બંનેના બેંક એકાઉન્ટને ખાલી કરાવ્યું
વીડિયો કોલમાં પોલીસના વસ્ત્રોમાં અધિકારી તરીકે વાતચીત કરતા ફરિયાદી પ્રેમીબેન રોહિત તથા તેમના પતિ મોતીભાઈ રોહિત બંને નિવૃત્ત શિક્ષક હોઈ પોલીસના વીડિયો કોલથી તેઓ ગભરાઈ ગયા હતા. અને વીડિયો કોલ કરનારે કહ્યું હતું કે, પ્રેમીબેનના બેંક એકાઉન્ટમાં ૭,૫૦,૦૦૦ બેલેન્સ છે અને મોતીભાઈ રોહિતના બેન્ક એકાઉન્ટમાં ૮,૫૦,૦૦૦ જેટલું બેલેન્સ છે, જે બંને બેંક એકાઉન્ટમાં ઝિરો બેલેન્સ કરવું પડશે.
આખરે સમગ્ર મામલે 2 આરોપી ઝડપાયા
તેમ કહી સાઇબર ફ્રોડોએ બંને નિવૃત્ત શિક્ષકના બેન્ક એકાઉન્ટમાંથી તમામ રકમ બંસીલાલ ટ્રેડર્સ નામના બેન્ક એકાઉન્ટમાં જમા કરાવડાવી. ભરૂચ સાઈબર ક્રાઈમ પોલીસ મથકમાં ફરિયાદ નોંધાતા પોલીસે તપાસનો ધમધમાટ શરૂ કર્યો હતો અને રાજકોટથી બે આરોપી અદનાન મોગલ અને રાહુલ જાદવની અટકાયત કરવામાં આવી હતી.
