Last Update :
03 Apr 2025
ખેડા જીલ્લાના ખેડા તાલુકાના રઢુ ગામમાં મામલતદાર અને ખાણ ખનીજ વિભાગની મોટી કાર્યવાહી જોવા મળી છે. જેમાં ખનીજ માફિયાઓ દ્વારા નદી પર બનાવવામાં આવેલા ગેરકાયદેસર બ્રિજ પર તંત્રએ સપાટો બોલાવ્યો છે. રઢુ નજીક વાત્રક નદી પરના 15 નંગ પાઈપોના ગેરકાયદેસર બ્રિજ પર તંત્રનું બુલડોઝર ફેરવી દેવામાં આવ્યું છે. ખનીજ માફિયાઓએ ગેરકાયદેસર ખનીજ ચોરી કરી વાત્રક નદી પરથી તેનુ વહન કરવા ગેરકાયદેસર બ્રિજ બનાવ્યો હતો.
GSTVની એપ્લિકેશન ડાઉનલોડ કરો
રઢુ ગામથી મહેલજ ગામની સીમને જોડતા બ્રિજનુ મામલતદારની હાજરીમાં ડિમોલેશન કરવામાં આવ્યું, જેમાં બે જેસીબીની મદદથી નદીના વહેણને અવરોધી 15 પાઈપો નાખી ખનીજ માફિયાઓએ બનાવેલો બ્રિજ તોડી પડાયો હતો. સમગ્ર મામલે ખેડા મામલતદાર જે.કે.ખસીયાએ નિવેદન આપ્યું છે.
મામલતદારે ગેરકાયદેસર બ્રિજ મામલે આપ્યું નિવેદન
નિવેદન આપતાં જણાવ્યું હતું કે, અગાઉ રઢુ સરપંચે તાલુકા સ્વાગત કાર્યક્રમમા રજુઆત કરતા SDMએ સ્થળ વિઝિટ કરવા સૂચના આપી હતી. મામલતદાર અને ખાણ ખનીજ વિભાગ ની ટીમ દ્વારા જોઈન્ટ વિઝીટ કરતા ગેરકાયદેસર બ્રિજ મળી આવ્યો હતો. ગેરકાયદેસર બ્રિજ મામલે મામલતદારે SDMને રજૂઆત કરી અને SDMએ કલેકટરને રજુઆત કરી હતી. આખરે કલેકટર દ્વારા તાત્કાલિક ગેરકાયદેસર બ્રિજ તોડી પાડવા આદેશ કરાયો હતો.
સૌની હાજરીમાં કાર્યવાહી કરવામાં આવી
રઢુ ગામના સરપંચ, ગામના આગેવાનો, ખેડૂતો, ખાણ ખનીજ વિભાગ ફ્લાઈંગ સ્કવોર્ડની ટીમ, મામલતદાર, ખેડા ટાઉન રઢુ આઉટ પોસ્ટ પોલીસ સાથે રાખી કાર્યવાહી કરાઈ હતી. સવારથી મહેનત કરીએ છીએ પણ આજુબાજુ કોઈના પણ દ્વારા ગેરકાયદેસર પુલ કોણે બનાવ્યો તે અંગે માહિતી નથી મળી. આ પુલ સંપૂર્ણ તોડી ખાણ ખનીજ વિભાગ દ્વારા આગળની વધુ તપાસ કાર્યવાહી હાથ ધરાશે. ખાણ ખનીજ વિભાગ ખનીજ માફિયાઓ વિરુદ્ધ કડકમાં કડક કાર્યવાહી કરશે.
રઢુ ગામના સરપંચે તંત્રની કામગીરી બદલ માન્યો આભાર
તો આ મામલે રઢુ ગામના સરપંચે કહ્યું હતું કે, આવા બેફામ ખનીજ માફિયાઓ ઉપર સો ટકા સરકારે કડકમાં કડક પગલાં લેવા જોઈએ. મારી તાલુકા સ્વાગત કાર્યક્રમમા કરેલ અરજીના ભાગરૂપે અધિકારીઓએ આ કાર્યવાહી કરી તે બદલ અધિકારીઓનો આભાર.
