Last Update :
02 May 2025
ગુજરાતમાં નકલીની બોલબાલા ઠેર ઠેર જોવા મળે છે. ત્યારે સુરત શહેરના ઉત્રાણ વિસ્તારમાં આવેલી તાપીનગર વિભાગ-૨ સોસાયટીમાં અચાનક કેટલાક મકાનોની દિવાલો પર ડિમોલીશનની નોટિસો લગાવવામાં આવી છે., જેના પગલે સ્થાનિક રહીશો ભયમાં આવી ગયા છે. ભારે ઊહાપોહ વચ્ચે હકીકત બહાર આવી છે કે આ નોટિસો નકલી છે – ન તો મનપા દ્વારા બહાર પાડવામાં આવી છે કે ન પોલીસનો તેમાં કોઈ રોલ છે.
GSTVની એપ્લિકેશન ડાઉનલોડ કરો
નકલી નોટિસથી ભય
તાપીનગર વિભાગ-૨ જેવી મધ્યમ અને નીચલા વર્ગની વસાહતમાં વસતા રહીશોએ જ્યારે પોતાના ઘરોની બહાર તખ્તીઓ અને નોટિસો જોઈ કે જેમાં લખાયું હતું “મનપાની સૂચના મુજબ આ મકાન ૭ દિવસમાં તોડી પાડવામાં આવશે,” ત્યારે લોકોના પગ નીચેની જમીન ખસી ગઈ. નોટિસમાં મનપા અને પોલીસ બંનેના નામનો ઉલ્લેખ હતો અને કહેવામાં આવ્યું હતું કે દરેક ગલીમાંથી પાંચ મકાનો તોડવામાં આવશે.
મનપા અને પોલીસનો ઇનકાર
જ્યારે રહીશોએ સુરત મ્યુનિસિપલ કોર્પોરેશન (SMC) અને નજીકની પોલીસ ચોકીનો સંપર્ક કર્યો ત્યારે તેમને જાણવા મળ્યું કે આવી કોઈ નોટિસ મનપા તરફથી જારી કરવામાં આવી નથી. પોલીસના વરિષ્ઠ અધિકારીઓએ પણ હકીકતની પુષ્ટિ કરતા જણાવ્યું કે “આ નોટિસો સંપૂર્ણપણે નકલી છે અને કોઈ અજાણ્યા તત્વો દ્વારા ભ્રમ ફેલાવવાનો પ્રયાસ છે.”
લોકોમાં ભયનો માહોલ
આ ખોટી નોટિસોના કારણે ઘણા ગરીબ શ્રમિક પરિવારોના મનમાં અશાંતિ અને ભય વ્યાપી ગયો છે. કેટલાક પરિવારો તો પોતાનો સામાન પેક કરીને ખસેડવાની તૈયારી પણ કરવા લાગ્યા હતા. બાળકોનું શાળાનું ભણતર અને વડીલોનાં રોજિંદા વ્યવહારો અસરગ્રસ્ત થયા છે.સ્થાનિક લોકોએ સવાલ કર્યો છે કે કોઈ અજાણ્યો વ્યક્તિ આવું દાહક કારસ્તાન કેવી રીતે કરી શકે? અને કેમ સમયસર સોસાયટી કે શહેર વહીવટીતંત્ર તરફથી યોગ્ય માહિતી આપવામાં નહીં આવી? રહીશો આરોપી સામે કડક કાર્યવાહી કરવાની માંગ કરી રહ્યા છે.
પોલીસે તપાસ શરૂ કરી
પોલીસે આખા બનાવની ગંભીરતાને ધ્યાનમાં રાખીને અજાણ્યા શખ્સો સામે IPC કલમ ૧૮૨, ૪૨૦, ૫૦૬ સહિતની જોગવાઈઓ હેઠળ ગુનો દાખલ કર્યો છે. CCTV ફૂટેજ, સોસાયટીના સાક્ષીઓ અને નોટિસની છાપાઈ અંગે તપાસ ચાલી રહી છે. મનપા પણ જાણકારી મેળવી રહી છે કે ક્યાંકથી અંદરથી માહિતી તો લીક થઈ નથી.
