Last Update :
04 Jul 2025
શું અલગ અલગ વિચાર અને બેકગ્રાઉન્ડ ધરાવતા લોકો તેના લગ્નજીવનને સફળ બનાવી શકે છે? અક્ષય કુમાર અને ટ્વિંકલ ખન્નાની જોડી આનું ઉત્તમ ઉદાહરણ છે. સાદું જીવન જીવતા અક્ષય અને સ્ટારડમમાં ઉછરેલી ટ્વિંકલના ઉછેર અને વિચારસરણીમાં ઘણો બધો ફરક છે. તેમ છતાં તેની સમજણ, પરસ્પર આદર અને સીમાઓની સ્પષ્ટતાએ તેના સંબંધોને મજબૂત રાખ્યા છે. 20 વર્ષથી વધુના લગ્નજીવન અને બે બાળકો સાથે આ જોડી બતાવે છે કે બે અલગ અલગ વ્યક્તિત્વ અને વિચારસરણી હોવા છતાં સંબંધ કેવી રીતે સફળ બનાવી શકાય છે. જો તમે પણ તમારા સંબંધને મજબૂત અને સુખી બનાવવા માંગતા હો, તો અક્ષય-ટ્વિંકલના લગ્નજીવનમાંથી પ્રેરણા લો.
GSTVની એપ્લિકેશન ડાઉનલોડ કરો
વિપરીત ઉછેર, છતાં મજબૂત બંધન
તાજેતરમાં અક્ષયે એક મુલાકાતમાં જણાવ્યું હતું કે તેનું બાળપણ એક નાના શહેરમાં ખૂબ જ સરળ વાતાવરણમાં વિત્યું હતું, જ્યારે ટ્વિંકલનું બાળપણ દક્ષિણ મુંબઈના સ્ટારડમથી ભરેલા વાતાવરણમાં વિત્યું હતું. ટ્વિંકલના માતાપિતા, રાજેશ ખન્ના અને ડિમ્પલ કાપડિયા, તેના સમયના પ્રખ્યાત સ્ટાર હતા. તેમ છતાં બંનેના અલગ જીવન અને વિચારોએ તેના સંબંધને વધુ ખાસ બનાવ્યો. અક્ષયના શબ્દોમાં, "અમે બંને સંપૂર્ણપણે અલગ રીતે વિચારીએ છીએ, અને તે અમારા માટે એક વિચિત્ર રીતે કાર્ય કરે છે."
વ્યક્તિગત અને વ્યાવસાયિક સીમાઓની સમજ
અક્ષય અને ટ્વિંકલે તેના કામની સ્પષ્ટ સમજ વિકસાવી છે. બંને એકબીજાના વ્યવસાયમાં ત્યારે જ દખલ કરે છે જ્યારે તેનો અભિપ્રાય માંગવામાં આવે છે. જો ટ્વિંકલ તેના કોઈપણ લેખ પર અક્ષયનો અભિપ્રાય માંગે છે, તો તે તેને વાંચે છે અને પ્રામાણિક પ્રતિસાદ આપે છે. તેવી જ રીતે અક્ષયને તેના કામમાં ટ્વિંકલ પાસેથી કોઈ અપેક્ષા નથી રહેતી. આ પરસ્પર સમજણ અને સીમાઓ પ્રત્યેનો આદર તેના સંબંધોને સંતુલિત રાખે છે.
સાદગીમાં જ સાચું સુખ છુપાયેલું છે
અક્ષયે એક ઘટના શેર કરી જ્યારે તે એક ગામમાં એક ખેડૂતના ઘરે ગયો હતો. ત્યાંની સાદગી અને શાંતિએ તેના પર ઊંડી અસર કરી. તેને સમજાયું કે શહેરી જીવનની દોડધામમાં આપણે વાસ્તવિક ખુશીને ખૂબ પાછળ છોડી દઈએ છીએ. આ અનુભવે તેને શીખવ્યું કે વાસ્તવિક ખુશી સાદગી અને જીવનમાં સંતુલન જાળવવામાં છુપાયેલી છે.
મતભેદો પ્રત્યે આદર એ સંબંધમાં હૂફ
અક્ષય અને ટ્વિંકલનો સંબંધ શીખવે છે કે લગ્નજીવનમાં ફક્ત સમાનતા જ મહત્વપૂર્ણ નથી, પરંતુ એકબીજાના મતભેદોને સ્વીકારવા અને આદર આપવાનું પણ ખૂબ જ મહત્વપૂર્ણ છે. આ યુગલ દરેક યુગલ માટે પ્રેરણારૂપ છે જે પોતાના સંબંધોને સુધારવા માંગે છે. તેનો સંબંધ એક ઉદાહરણ છે કે સમજણ અને સંતુલનથી દરેક મુશ્કેલીને સરળ બનાવી શકાય છે.
